അഹമ്മദാബാദ്: വനിതാ പ്രീമിയര്‍ ലീഗില്‍ രണ്ടാം പതിപ്പിൽ ഗുജറാത്ത് ജയന്റ്‌സിനെ ബേത് മൂണി നയിക്കും. ഇന്ത്യന്‍ ഓള്‍റൗണ്ടര്‍ സ്‌നേഹ് റാണയാണ് വൈസ് ക്യാപ്റ്റന്‍. ട്വന്റി 20യില്‍ മൂന്ന് ലോകകപ്പ് കിരീടങ്ങൾ സ്വന്തമാക്കിയ ഓസ്ട്രേലിയൻ ടീമിൽ ബേത് മൂണി അം​ഗമായിരുന്നു. ഏകദിന ലോകകപ്പും കോമണ്‍വെല്‍ത്ത് ഗെയിംസ് സ്വര്‍ണവും ബേത് മൂണി അം​ഗമായ ഓസ്ട്രേലിയൻ ടീം നേടിയിട്ടുണ്ട്.

2023 ഫെബ്രുവരിയിൽ നടന്ന ട്വന്റി 20 ലോകകപ്പിന്റെ ഫൈനലിൽ ഓസ്ട്രേലിയയ്ക്കായി ബേത് മൂണി തകർപ്പൻ ബാറ്റിം​ഗാണ് പുറത്തെടുത്തത്. 53 പന്തുകള്‍ നേരിട്ട മൂണി 74 റണ്‍സ് നേടി പുറത്താകാതെ നിന്നു. മത്സരം 20 റൺസിന് ജയിച്ച ഓസ്ട്രേലിയ കിരീടവും സ്വന്തമാക്കി.

വനിതാ ഐപിഎല്ലിൽ ക്യാപ്റ്റനാക്കുന്ന മൂന്നാമത്തെ ഓസ്‌ട്രേലിയന്‍ താരമാണ് മൂണി. അഷ്‌ലി ഗാര്‍ഡ്‌നർ കഴിഞ്ഞ സീസണിൽ ​ഗുജറാത്ത് ജയന്റ്സിനെ നയിച്ചിരുന്നു. യുപി വാരിയേഴ്‌സിന്റെ ക്യാപ്റ്റൻ അലീസ ഹീലിയാണ്. വനിതാ ഐപിഎല്ലിന്റെ രണ്ടാം പതിപ്പിന് ഇനി എട്ട് ദിവസം മാത്രമാണ് ബാക്കിയുള്ളത്.