യുഎഇ: രണ്ട് ദിവസത്തെ സന്ദർശനത്തിനായി പ്രധാനമന്ത്രി നരേന്ദ്ര മോദി യു എ ഇയിൽ എത്തി. അബുദാബിയിലെ ആദ്യത്തെ ഹിന്ദു ശിലാ ക്ഷേത്രമായ ബോചസൻവാസി ശ്രീ അക്ഷര പുരുഷോത്തം സ്വാമിനാരായണ സൻസ്ത മന്ദിറിൻ്റെ ഉദ്ഘാടനമാണ് പ്രധാനമന്ത്രി മോദിയുടെ സന്ദർശനത്തിൻ്റെ പ്രധാന ആകർഷണം. അബുദാബിയിൽ ഏകദേശം 27 ഏക്കർ സ്ഥലത്താണ് ക്ഷേത്രം ഉയരുന്നത്. 2019 മുതൽ കെട്ടിടത്തിൻ്റെ പണികൾ നടന്നുകൊണ്ടിരിക്കുകയാണ്. ക്ഷേത്രത്തിനുള്ള സ്ഥലം യുഎഇ സർക്കാരാണ് സംഭാവന ചെയ്തത്. ​ഗൾഫ് മേഖലയിലെ ഏറ്റവും വലിയ ക്ഷേത്രമായിരിക്കും ഇന്ത്യൻ പ്രധാനമന്ത്രി ഉദ്ഘാടനം ചെയ്യുക.

ദുബായ്-അബുദാബി ഷെയ്ഖ് സായിദ് ഹൈവേയിൽ അൽ റഹ്ബയ്ക്ക് സമീപം അബു മുറൈഖയിലാണ് ക്ഷേത്രം സ്ഥിതി ചെയ്യുന്നത്. ക്ഷേത്രത്തിനുള്ള സ്ഥലം യുഎഇ സർക്കാരാണ് സംഭാവന ചെയ്തത്. ക്ഷേത്രം നിർമ്മിക്കാനുള്ള സഹായങ്ങൾ ചെയ്തതിന് യുഎഇ പ്രസിഡൻ്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനോട് പ്രധാനമന്ത്രി നരേന്ദ്ര മോദി നന്ദി പറഞ്ഞു. മറ്റ് മൂന്ന് ഹിന്ദു ക്ഷേത്രങ്ങൾ കൂടി യുഎഇയിലുണ്ട്. ശിലാ വാസ്തുവിദ്യയിൽ വിശാലമായ സ്ഥലത്ത് വ്യാപിച്ചുകിടക്കുന്ന ബോചസൻവാസി ശ്രീ അക്ഷര പുരുഷോത്തം സ്വാമിനാരായണ സൻസ്ത മന്ദിർ ഗൾഫ് മേഖലയിലെ ഏറ്റവും വലുതായിരിക്കും. യുഎഇയിലെ സന്ദർശനത്തിന് ശേഷം പ്രധാനമന്ത്രി മോദി ഖത്തർ സന്ദർശിക്കും. ഫെബ്രുവരി 15നാണ് മോദി ഇന്ത്യയിലേക്ക് മടങ്ങുക.

യു എ ഇയിലെത്തിയ ഇന്ത്യൻ പ്രധാനമന്ത്രി പ്രസിഡൻ്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി അദ്ദേഹം ചർച്ച നടത്തി. നരേന്ദ്ര മോദിയെ ഗാർഡ് ഓഫ് ഓണർ നൽകിയാണ് യുഎഇ പ്രസിഡൻ്റ് സ്വീകരിച്ചത്. 2015ന് ശേഷം ഇത് ഏഴാം തവണയാണ് മോദി യുഎഇ സന്ദർശിക്കുന്നത്. യുഎഇ വൈസ് പ്രസിഡൻ്റിൻ്റെ ക്ഷണപ്രകാരം ഫെബ്രുവരി 14 ന് ദുബായിൽ നടക്കുന്ന ലോക ഗവൺമെൻ്റ് ഉച്ചകോടിയിൽ പ്രധാനമന്ത്രി മോദി ലോക നേതാക്കളെയും അഭിസംബോധന ചെയ്യും.

ഇന്ത്യ-യുഎഇ നയതന്ത്ര ബന്ധത്തിലെ സുപ്രധാന നാഴികകല്ലായാണ് പ്രധാനമന്ത്രിയുടെ സന്ദർശനം വിലയിരുത്തപ്പെടുന്നത്. ഇന്ത്യയും യുഎഇയും തമ്മിലുള്ള ഉഭയകക്ഷി ബന്ധം കൂടുതൽ ദൃഢമാകുന്ന ഘട്ടത്തിലാണ് തുടർച്ചയായി ഇന്ത്യൻ പ്രധാനമന്ത്രി യുഎഇയിലെത്തുന്നത്. കഴിഞ്ഞ ഒമ്പത് വർഷമായി, വ്യാപാരം, പ്രതിരോധം, ഭക്ഷ്യ-ഊർജ്ജ സുരക്ഷ, വിദ്യാഭ്യാസം തുടങ്ങിയ മേഖലകളിൽ യുഎഇയുമായുള്ള ഇന്ത്യയുടെ സഹകരണം കൂടുതൽ ദൃഢമാണ്.. കഴിഞ്ഞ വർഷം പ്രധാനമന്ത്രി മോദിയുടെ അബുദാബി സന്ദർശന സമയത്ത് പ്രാദേശിക കറൻസി സെറ്റിൽമെൻ്റ്, പേയ്‌മെൻ്റ്, സന്ദേശമയയ്‌ക്കൽ സംവിധാനങ്ങൾ, പുനരുപയോഗിക്കാവുന്ന ഊർജം, നൂതന ആരോഗ്യ സംരക്ഷണം തുടങ്ങി വിവിധ മേഖലകൾ ഉൾക്കൊള്ളുന്ന നിരവധി ധാരണാപത്രങ്ങൾ ഒപ്പുവെച്ചിരുന്നു. 2022-23ൽ ഏകദേശം 85 ബില്യൺ ഡോളറിൻ്റെ ഉഭയകക്ഷി വ്യാപാരവുമായി ഇരു രാജ്യങ്ങളും പരസ്‌പരം മികച്ച വ്യാപാര പങ്കാളികളാണ്. 2022-23 ലെ നേരിട്ടുള്ള വിദേശ നിക്ഷേപത്തിൻ്റെ കാര്യത്തിൽ ഇന്ത്യയിലെ ഏറ്റവും മികച്ച നാല് നിക്ഷേപകരിൽ ഒന്നാണ് യുഎഇ.