വിലങ്ങാട് മണ്ണിടിച്ചിൽ; ആശങ്കയോടെ നാട്ടുകാർ

കോഴിക്കോട്: ഒരു മാസം മുമ്പ് ഉരുള്പ്പൊട്ടല് ദുരന്തമുണ്ടായ വിലങ്ങാട് മണ്ണിടിച്ചിൽ. ഒരു മാസം മുമ്പ് ഉരുള്പ്പൊട്ടിയതിന് തൊട്ടുമുകളിലാണ് ഇപ്പോൾ മണ്ണിടിച്ചിലുണ്ടായിരിക്കുന്നത്. കഴിഞ്ഞ ദിവസം പെയ്ത അതിശക്തമായ മഴയില് ടൗണില് വെള്ളം കയറിയിരുന്നു. ഏഴ് കുടുംബങ്ങളെ ക്യാംപിലേക്ക് മാറ്റിപ്പാര്പ്പിച്ചിരിക്കുകയാണ്.

നാട്ടുകാരാണ് മണ്ണിടിച്ചിലുണ്ടായ വിവരം അറിയിച്ചത്. നേരത്തെ ഉരുള്പ്പൊട്ടലുണ്ടായതിന് മുകളില് നിന്ന് മണ്ണിടിഞ്ഞ് താഴേക്ക് വരുന്ന ചിത്രങ്ങള് നാട്ടുകാര് പങ്കുവെക്കുന്നുണ്ട്. ഇതിന്റെ ഭാഗമായി കല്ലുകളും മറ്റും ടൗണിലേക്ക് വന്നിരുന്നു. എന്നാൽ ചെളിയുടെ അസഹനീയമായ ദുര്ഗന്ധവുമുണ്ടായതടക്കം ഉരുള്പൊട്ടലിന്റെ സൂചനകളാണെന്നാണ് നാട്ടുകാര് പറയുന്നത്.

ഉരുള്പൊട്ടല് ദുരന്തമുണ്ടായ വിലങ്ങാട് ശക്തമായ മഴ; ആറ് കുടുംബങ്ങളെ ക്യാമ്പിലേക്ക് മാറ്റി

അതേസമയം പ്രദേശത്ത് കടുത്ത മൂടല്മഞ്ഞും, ചെറിയ രീതിയിലുള്ള മഴയും നിലനില്ക്കുന്നുണ്ട്. ടൗണിലെ വെള്ളം കുറയുകയും പുഴയിലെ വെള്ളം കുറയുകയും ചെയ്തെങ്കിലും ഉരുള്പ്പൊട്ടലുണ്ടായെന്ന ഉറപ്പിലാണ് നാട്ടുകാര്. നേരത്തെയുണ്ടായ ഉരുള്പൊട്ടലില് ഒരാള് മരിക്കുകയും നിരവധി വീടുകള്ക്ക് നാശനഷ്ടം സംഭവിക്കുകയും ചെയ്തിരുന്നു. 14 വീടുകള് പൂര്ണമായും ഒഴുകിപ്പോയി. 112 വീടുകള് വാസയോഗ്യമല്ലാതായി. നാല് കടകളും നശിച്ചു. ഉരുട്ടി പാലത്തിന്റെ അപ്രോച്ച് റോഡ്, വാളൂക്ക്, ഉരുട്ടി, വിലങ്ങാട് പാലങ്ങള് ഉള്പ്പെടെ തകര്ന്നതില് 156 ലക്ഷം രൂപയുടെ നഷ്ടമാണ് പൊതുമരാമത്ത് വകുപ്പു റോഡ് വിഭാഗം കണക്കാക്കിയത്.

ജലസേചന വകുപ്പിന്റെ നഷ്ടം 35 കോടയാണ്. 162 ഹെക്ടറില് അധികം കൃഷി നാശമുണ്ടായി. 225 കര്ഷകരെ ബാധിച്ചു. 11.85 കോടിയുടെ നഷ്ടം കാര്ഷിക മേഖലയില് സംഭവിച്ചതായാണ് കണക്ക്. 24 ഉരുള്പൊട്ടലുകള് ഒരു ഗ്രാമത്തില് ഉണ്ടായെന്നാണ് സര്ക്കാരിന്റെ ഔദ്യോഗിക കണക്ക്. നാല്പ്പത് ഉരുള്പ്പൊട്ടല് എങ്കിലുമുണ്ടായി എന്നാണ് നാട്ടുകാര് അഭിപ്രായപ്പെട്ടത്. വിലങ്ങാട്ട് സമഗ്ര പുനരധിവാസം ആസൂത്രണം ചെയ്ത് നടപ്പാക്കുമെന്ന് പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസും പറഞ്ഞിരുന്നു.