തൃശൂർ: ഏഷ്യൻ ​ഗെയിംസ് താരങ്ങൾക്ക് സർക്കാർ നൽകുന്ന സ്വീകരണത്തിൽ പങ്കെടുക്കുമെന്ന് ഒളിംപ്യൻ പി ആർ ശ്രീജേഷ്. സംസ്ഥാനം നൽകുന്ന അംഗീകാരത്തിൽ സന്തോഷമുണ്ട്. അഭിനന്ദനം ലഭിക്കുന്നത് പ്രചോദനമാണ്. പ്രതീക്ഷിച്ച അം​ഗീകാരം ലഭിക്കാതെ വന്നപ്പോഴുള്ള നിരാശയാണ് താൻ മുമ്പ് പ്രകടിപ്പിച്ചതെന്നും പി.ആർ ശ്രീജേഷ് റിപ്പോർട്ടറിനോട് പറഞ്ഞു.

സംസ്ഥാന കായിക മേളയിലെ കുട്ടികളുടെ പ്രകടനം കാണുമ്പോൾ സന്തോഷമുണ്ട്. കുട്ടികൾക്ക് വേണ്ടത് കൃത്യമായ ഒരു വഴി ഒരുക്കി കൊടുക്കലാണ്. 10-ാം ക്ലാസും പ്ലസ് ടുവും കഴിഞ്ഞ് ഏത് സ്കൂളിൽ പോകണം. സർവ്വകലാശാല തലത്തിൽ എവിടെ പഠിച്ചാൽ ഉയരാൻ കഴിയും. ആ വഴി കുട്ടികൾക്ക് കാണിച്ച് കൊടുക്കണമെന്നും പി ആർ ശ്രീജേഷ് പ്രതികരിച്ചു.

കുട്ടികളുടെ കഴിവിനെ കൂടുതലായി ഉപയോ​ഗിക്കണം. കുറച്ചുകാലം മുന്നോട്ട് പോകുമ്പോൾ കുടുംബത്തിന്റെ ഉത്തരവാദിത്തം ഏറ്റെടുക്കണം. കായികമേഖല സുരക്ഷിതമെന്ന ബോധ്യം കുട്ടികളിൽ ഉണ്ടാകണം. കായിക മേഖലയോട് ചേർന്ന് നിൽക്കുന്ന ജോലികളെ കുറിച്ച് കുട്ടികളെ ബോധ്യപ്പെടുത്തണം. അങ്ങനെ ഉണ്ടായാൽ കുട്ടികൾ കൂടുതൽകാലം കായിക മേഖലയിൽ നിൽക്കുമെന്നും പി. ആർ ശ്രീജേഷ് വ്യക്തമാക്കി.