![ഹൈദരാബാദിന്റെ സ്പിന്നിനെ നേരിടാൻ രാജസ്ഥാന് ആളുണ്ടായില്ല; സഞ്ജു സാംസൺ](http://media.assettype.com/reporterlive%2F2024-05%2F449249b1-6cf3-42bc-b743-35be9966d1fa%2Fsanju__7_.jpg?w=480&auto=format%2Ccompress&fit=max)
ചെന്നൈ: ഇന്ത്യൻ പ്രീമിയർ ലീഗിൽ നിന്ന് പുറത്തായിരിക്കുകയാണ് രാജസ്ഥാൻ റോയൽസ്. സൺറൈസേഴ്സ് ഹൈദരാബാദിനോട് 36 റൺസിന് പരാജയപ്പെട്ടാണ് രാജസ്ഥാൻ പുറത്തായത്. പിന്നാലെ തോൽവിയിൽ പ്രതികരണവുമായി ടീം നായകൻ സഞ്ജു സാംസൺ രംഗത്തെത്തി. വലിയൊരു മത്സരത്തിൽ രാജസ്ഥാൻ കളിച്ച രീതിയിൽ അഭിമാനമുണ്ടെന്നാണ് സഞ്ജുവിന്റെ പ്രതികരണം.
തന്റെ ടീം നന്നായി പന്തെറിഞ്ഞു. എന്നാൽ ഹൈദരാബാദ് സ്പിന്നർമാർക്കെതിരെ ബാറ്റ് ചെയ്യാൻ കഴിയുന്ന മികച്ച താരങ്ങൾ ടീമിൽ ഉണ്ടായില്ല. അതുകൊണ്ടാണ് മത്സരം പരാജയപ്പെട്ടത്. രണ്ടാം ഇന്നിംഗ്സിൽ മഞ്ഞുവീഴ്ച ഉണ്ടാകുമോയെന്ന് ഊഹിക്കാൻ കഴിയുമായിരുന്നില്ല. പിച്ചിന്റെ സ്വഭാവം മാറി. വിക്കറ്റിൽ ടേണിംഗ് ഉണ്ടായത് ഹൈദരാബാദ് നന്നായി ഉപയോഗിച്ചുവെന്നും സഞ്ജു പറഞ്ഞു.
സന്ദീപ് ശർമ്മ നന്നായി പന്തെറിഞ്ഞു. താരലേലത്തിൽ ആർക്കും വേണ്ടാതിരുന്ന താരം പിന്നീട് പകരക്കാരനായി എത്തുന്നു. കഴിഞ്ഞ രണ്ട് വർഷത്തെ സന്ദീപിന്റെ ബൗളിംഗ് പരിശോധിക്കൂ. ബുംറയ്ക്ക് ശേഷമുള്ള അടുത്ത താരം സന്ദീപാകും. മികച്ച ഒരുപിടി താരങ്ങളെ കണ്ടെത്താനും രാജസ്ഥാന് കഴിഞ്ഞു. റിയാൻ പരാഗും ധ്രുവ് ജുറേലും രാജസ്ഥാന്റെ മാത്രം താരങ്ങളല്ല. അവരൊക്കെയും ഇന്ത്യൻ ക്രിക്കറ്റിലെ മികച്ച താരങ്ങളാവുമെന്നും സഞ്ജു വ്യക്തമാക്കി.