![സിംബാബ്വെ പരമ്പരയിൽ ഗിൽ ക്യാപ്റ്റനായത് എന്ത് അടിസ്ഥാനത്തിൽ?; ചോദ്യവുമായി അമിത് മിശ്ര](http://media.assettype.com/reporterlive%2F2024-07%2F982a7a2d-b12d-45fb-9882-d5d0b3f08a92%2Famit%20mishra.jpg?w=480&auto=format%2Ccompress&fit=max)
ന്യൂഡൽഹി: സിംബാബ്വെയ്ക്കെതിരായ ട്വന്റി 20 പരമ്പരയിൽ ശുഭ്മൻ ഗില്ലിനെ ക്യാപ്റ്റനാക്കിയത് എന്ത് അടിസ്ഥാനത്തിലെന്ന് ഇന്ത്യൻ മുൻ താരം അമിത് മിശ്ര. ഒരു യുടുബ് ചാനലിന് നൽകിയ അഭിമുഖത്തിലാണ് താരം ഇക്കാര്യം പറഞ്ഞത്. താനാണെങ്കിൽ ഒരിക്കലും ഗില്ലിനെ ക്യാപ്റ്റൻ ആക്കില്ലായിരുന്നു. ഇന്ത്യൻ പ്രീമിയർ ലീഗിൽ ഗുജറാത്തിന്റെ ക്യാപ്റ്റനായിരുന്നു ഗിൽ. നായകസ്ഥാനം എങ്ങനെ കൈകാര്യം ചെയ്യണമെന്ന് താരത്തിന് ഒരു ആശയവും ഇല്ലായിരുന്നുവെന്നും മിശ്ര ചൂണ്ടിക്കാട്ടി.
ഇന്ത്യൻ ടീമിന്റെ ഭാഗമെന്ന് കരുതി ഒരാളെ ക്യാപ്റ്റനാക്കേണ്ടതില്ല. ഐപിഎല്ലിൽ മുൻ വർഷങ്ങളിലും ഇന്ത്യൻ ടീമിലും ഗില്ലിന്റെ ബാറ്റിംഗ് പ്രകടനം മികച്ചതായിരുന്നു. സിംബാബ്വെ പരമ്പരയിൽ ഇന്ത്യൻ ടീമിന്റെ നായകസ്ഥാനത്ത് ഒരു പരിക്ഷണം മാത്രമാണ് നടന്നത്. എന്നാൽ അത് മികവുള്ള ഒരു താരത്തിന് നൽകാമായിരുന്നുവെന്നും ഇന്ത്യൻ മുൻ സ്പിന്നർ പ്രതികരിച്ചു.
ട്വന്റി 20യിൽ ഇന്ത്യൻ ക്യാപ്റ്റനാകേണ്ട താരത്തേയും മിശ്ര ചൂണ്ടിക്കാട്ടി. സഞ്ജു സാംസൺ, റുതുരാജ് ഗെക്ക്വാദ്, റിഷഭ് പന്ത് എന്നിവരിലൊരാളെ ക്യാപ്റ്റൻ സ്ഥാനത്തേയ്ക്ക് തിരഞ്ഞെടുക്കാമെന്നും അമിത് മിശ്ര വ്യക്തമാക്കി. അഞ്ച് മത്സരങ്ങളുടെ സിംബാബ്വെ പരമ്പരയിൽ നാലിലും ഇന്ത്യയ്ക്കായിരുന്നു വിജയം. എങ്കിലും ശുഭ്മൻ ഗില്ലിന്റെ ക്യാപ്റ്റൻസിയിൽ ഏറെ പഴികേട്ടിരുന്നു.