ട്രെന്റ്ബ്രിഡ്ജ്: ടെസ്റ്റ് ക്രിക്കറ്റിൽ ചരിത്രനേട്ടവുമായി ഇംഗ്ലണ്ട് ടീം. ഇതാദ്യമായി ഒരു ടീം ടെസ്റ്റ് ക്രിക്കറ്റിന്റെ ആദ്യ ഇന്നിംഗ്സിൽ 4.2 ഓവറിൽ 50 റൺസ് പിന്നിട്ടു. ഇംഗ്ലണ്ടും വെസ്റ്റ് ഇൻഡീസും തമ്മിലുള്ള രണ്ടാം മത്സരത്തിലാണ് അപൂർവ്വ നേട്ടം. ഒരു വിക്കറ്റ് നഷ്ടത്തിലാണ് ഇംഗ്ലീഷ് ടീം നേട്ടത്തിലെത്തിയത്. മത്സരത്തിന്റെ ആദ്യ ഓവറിൽ തന്നെ സാക്ക് ക്രൗളിയെ ഇംഗ്ലണ്ടിന് നഷ്ടമായി.
റൺസൊന്നും എടുക്കാതെയാണ് സാക്ക് ക്രൗളി പുറത്തായത്. അൻസാരി ജോസഫിനാണ് ആദ്യ വിക്കറ്റ്. പിന്നാലെ ബെൻ ഡക്കറ്റും ഒലി പോപ്പും ചേർന്നാണ് റെക്കോർഡിലേക്കെത്തിയത്. വേഗത്തിൽ 50 റൺസ് നേടിയ റെക്കോർഡ് ഇംഗ്ലീഷ് ടീമിന്റെ തന്നെ പേരിൽ തന്നെയായിരുന്നു. 1994ൽ ദക്ഷിണാഫ്രിക്കയ്ക്കെതിരെ 4.3 ഓവറിൽ ഇംഗ്ലീഷ് ടീം 50 റൺസിലെത്തി.
വെസ്റ്റ് ഇൻഡീസിനെതിരായ മൂന്ന് ടെസ്റ്റുകളുടെ പരമ്പരയിൽ ആദ്യ മത്സരം ഇംഗ്ലണ്ടാണ് വിജയിച്ചത്. ഒരിന്നിംഗ്സിനും 114 റൺസിനുമായിരുന്നു ഇംഗ്ലീഷ് ടീമിന്റെ വിജയം. മത്സരത്തിൽ ആദ്യം ബാറ്റ് ചെയ്ത വെസ്റ്റ് ഇൻഡീസ് 121 റൺസിൽ എല്ലാവരും പുറത്തായി. ഇംഗ്ലണ്ട് ആദ്യ ഇന്നിംഗ്സിൽ 371 റൺസെടുത്തു. രണ്ടാം ഇന്നിംഗ്സിൽ വെസ്റ്റ് ഇൻഡീസിന് 136 റൺസ് മാത്രമാണ് നേടാനായത്. പരമ്പര കൈവിടാതിരിക്കാൻ വെസ്റ്റ് ഇൻഡീസിന് രണ്ടാം ടെസ്റ്റിൽ വിജയം അനിവാര്യമാണ്.
