ഡൽഹി: ഇന്ത്യൻ പ്രീമിയർ ലീഗിന്റെ അടുത്ത സീസണിൽ റിഷഭ് പന്തിനെ ഒഴിവാക്കുമെന്ന റിപ്പോർട്ടുകൾ നിഷേധിച്ച് ഡൽഹി ക്യാപിറ്റൽസ് വൃത്തങ്ങൾ. ചെന്നൈ സൂപ്പർ കിംഗ്സിൽ മഹേന്ദ്ര സിംഗ് ധോണിക്ക് പകരമായി യുവ ഇന്ത്യൻ വിക്കറ്റ് കീപ്പർ എത്തുമെന്ന് റിപ്പോർട്ടുകളുണ്ടായിരുന്നു. എന്നാൽ റിഷഭ് പന്ത് ഉൾപ്പടെ മൂന്ന് താരങ്ങളെ നിലനിർത്തുവാനാണ് തീരുമാനമെന്ന് ഡൽഹി ക്യാപിറ്റൽസ് അധികൃതർ സൂചിപ്പിക്കുന്നു. അക്സർ പട്ടേൽ, കുൽദീപ് യാദവ് തുടങ്ങിയവരാണ് ഡൽഹി നിലനിർത്താൻ ആഗ്രഹിക്കുന്ന മറ്റ് രണ്ട് താരങ്ങൾ.
ലഖ്നൗ സൂപ്പർ ജയന്റ്സ് നായകൻ കെ എൽ രാഹുലിനായി റോയൽ ചലഞ്ചേഴ്സ് ബെംഗളൂരു രംഗത്തുണ്ടെന്നതാണ് മറ്റൊരു റിപ്പോർട്ട്. കഴിഞ്ഞ സീസണിലൊടുവില്‍ ലഖ്നൗ ടീം ഉടമ സഞ്ജീവ് ഗോയങ്കയുമായുണ്ടായ അസ്വസ്ഥതകൾ കെ എൽ രാഹുലിന് തിരിച്ചടിയായേക്കും. ദിനേശ് കാർത്തിക്കിന് പകരം വിക്കറ്റ് കീപ്പറെ തേടുന്ന റോയൽ ചലഞ്ചേഴ്സ് രാഹുലിനെ സ്വന്തമാക്കാൻ ആഗ്രഹിക്കുന്നുണ്ടെന്നാണ് സൂചന. 2013 മുതൽ 2016 വരെ റോയൽ ചലഞ്ചേഴ്സിന്റെ താരമായിരുന്നു കെ എൽ രാഹുൽ.
ഐപിഎൽ മെഗാലേലത്തിന് മുമ്പ് ടീമുകൾക്ക് എത്ര താരങ്ങളെ നിലനിർത്താൻ കഴിയുമെന്ന് ഇനിയും വ്യക്തമായിട്ടില്ല. ടീം ഉടമകളുമായി ഈ മാസം ഒടുവിൽ ബിസിസിഐ ചർച്ച നടത്തുമെന്നാണ് സൂചന. ഒരു ടീമിന് പരമാവധി നാല് താരങ്ങളെ നിലനിർത്താൻ കഴിഞ്ഞേക്കുമെന്നാണ് ബിസിസിഐ വൃത്തങ്ങൾ നൽകിയ സൂചന.
