.jpg?w=480&auto=format%2Ccompress&fit=max)
ന്യൂഡൽഹി: ഇന്ത്യൻ ക്രിക്കറ്റ് ടീമിന്റെ ഉപനായകനായുള്ള ശുഭ്മൻ ഗില്ലിന്റെ നിയമനം താൽക്കാലികമെന്ന് മുഖ്യസിലക്ടർ അജിത്ത് അഗാർക്കർ. ഇപ്പോൾ മൂന്ന് ഫോർമാറ്റിലും കളിക്കുന്ന താരമാണ് ഗിൽ. താരത്തിന്റെ നേതൃമികവിനെക്കുറിച്ച് സഹതാരങ്ങളിൽ നിന്ന് അറിയാൻ കഴിഞ്ഞു. അതിനാൽ ഗില്ലിനെ ഉപനായകനാക്കുന്നു. എന്നാൽ ഭാവിയിൽ ഗിൽ ക്യാപ്റ്റനാകുമോയെന്ന് പറയാൻ കഴിയില്ലെന്നും അജിത്ത് അഗാർക്കർ പറഞ്ഞു.
ട്വന്റി 20 ടീമിന്റെ നായകസ്ഥാനത്ത് സൂര്യകുമാർ യാദവിനെ നിയമിച്ചതിലും അഗാർക്കർ പ്രതികരിച്ചു. എല്ലാ മത്സരങ്ങളും കളിക്കുന്ന ഒരാളെയാണ് ക്യാപ്റ്റനായി വേണ്ടത്. എന്നാൽ ഹാർദ്ദിക്കിന്റെ കായികക്ഷമത വെല്ലുവിളിയാണ്. ഹാർദ്ദിക്ക് ടീമിലുണ്ടാകും. എങ്കിലും അടുത്ത ട്വന്റി 20 ലോകകപ്പ് മുന്നിൽ കണ്ടാണ് ക്യാപ്റ്റനെ തിരഞ്ഞെടുത്തത്. ഇതൊന്നും ഒരു രാത്രിയിലെ തീരുമാനമല്ലെന്നും അഗാർക്കർ വ്യക്തമാക്കി.
രവീന്ദ്ര ജഡേജയെ ഇന്ത്യൻ ടീമിൽ നിന്ന് ഒഴിവാക്കിയിട്ടില്ലെന്നും അഗാർക്കർ പറഞ്ഞു. അക്സർ പട്ടേലിനെയും രവീന്ദ്ര ജഡേജയെയും ഒരേ മത്സരത്തിന് ഇറക്കുന്നതിൽ അർത്ഥമില്ല. ടെസ്റ്റ് ടീമിൽ ജഡേജ തുടരും. ഇന്ത്യൻ ടീമിലെ നിർണായക താരമാണ് ജഡേജയെന്നും അഗാർക്കർ പ്രതികരിച്ചു.
