ട്രെന്റ്ബ്രിഡ്ജ്: വെസ്റ്റ് ഇൻഡീസിനെതിരായ രണ്ടാം ടെസ്റ്റിനിടെയുള്ള ഒരു ദൃശ്യമാണ് ഇപ്പോൾ സമൂഹമാധ്യമങ്ങളിൽ തരംഗമാകുന്നത്. ഇംഗ്ലണ്ട് ക്രിക്കറ്റ് ടീം ക്യാപ്റ്റൻ ബെൻ സ്റ്റോക്സുമായി സാമ്യമുള്ള ഒരാളെ സ്റ്റേഡിയത്തിലെ ഗ്യാലറിയിൽ കാണാൻ കഴിഞ്ഞു. ഇതുകണ്ട ബെൻ സ്റ്റോക്സിന്റെ പ്രതികരണമാണ് ആരാധക ഹൃദയം കീഴടക്കുന്നത്.
തന്റെ അപരനെ കണ്ട് ചിരിച്ച സ്റ്റോക്സ് രണ്ട് കൈകളും ദൂരദർശിനി മാതൃകയിൽ കണ്ണിൽ വെയ്ക്കുകയും ചെയ്തു. ആരാണ് ഈ വ്യക്തി, എത്രമാത്രം താനുമായി സാദൃശ്യം ഉണ്ടാവും എന്നായിരിക്കാം സ്റ്റോക്സ് ആ നിമിഷം ചിന്തിച്ചിട്ടുണ്ടാകുക എന്നാണ് ആരാധകർ പറയുന്നത്. ഇംഗ്ലണ്ട് നായകന് അരികിൽ മുൻ താരം ജെയിംസ് ആൻഡേഴ്സനുമുണ്ട്. മുൻ താരവും സ്റ്റോക്സിനൊപ്പം ചിരിക്കുന്നതായി ദൃശ്യങ്ങളിൽ കാണാം.
വെസ്റ്റ് ഇൻഡീസിനെതിരായ രണ്ടാം ടെസ്റ്റിൽ 241 റൺസിന്റെ വമ്പൻ വിജയമാണ് ഇംഗ്ലണ്ട് നേടിയത്. മത്സരത്തിൽ ആദ്യം ബാറ്റ് ചെയ്ത ഇംഗ്ലണ്ട് ആദ്യ ഇന്നിംഗ്സിൽ 416 റൺസിൽ ഓൾ ഔട്ടായി. വെസ്റ്റ് ഇൻഡീസ് ആദ്യ ഇന്നിംഗ്സിൽ 457 റൺസെടുത്തു. പിന്നാലെ ഇംഗ്ലണ്ട് രണ്ടാം ഇന്നിംഗ്സിൽ 425 റൺസെടുത്തു. ഇതോടെ വെസ്റ്റ് ഇൻഡീസിന്റെ വിജയലക്ഷ്യം 385 റൺസായി. എന്നാൽ 143 റൺസെടുക്കാനെ വിൻഡീസ് സംഘത്തിന് കഴിഞ്ഞുള്ളൂ.
