![രാഹുൽ ദ്രാവിഡിനെ പരിശീലകനാക്കാൻ രാജസ്ഥാൻ റോയൽസ്; റിപ്പോർട്ട്](http://media.assettype.com/reporterlive%2F2024-07%2F779d897b-63a3-4014-91a9-2efb30b03ad2%2FRAHUL%20DRAVID%20(2).jpg?w=480&auto=format%2Ccompress&fit=max)
ന്യൂഡൽഹി: ഇന്ത്യൻ ക്രിക്കറ്റ് ടീം പരിശീലക സ്ഥാനത്ത് നിന്ന് പടിയിറങ്ങിയ രാഹുൽ ദ്രാവിഡുമായി ഇന്ത്യൻ പ്രീമിയർ ലീഗ് ക്രിക്കറ്റ് ടീം രാജസ്ഥാൻ റോയൽസ് ചർച്ച നടത്തിയതായി റിപ്പോർട്ട്. ദേശീയ മാധ്യമമായ ടൈംസ് ഓഫ് ഇന്ത്യയാണ് ഇക്കാര്യം റിപ്പോർട്ട് ചെയ്തിരിക്കുന്നത്. രാജസ്ഥാൻ റോയൽസിന്റെ മുഖ്യപരിശീലകനായി ദ്രാവിഡിനെ നിയമിക്കാൻ ചർച്ചകൾ നടക്കുന്നതായി റിപ്പോർട്ടിൽ പറയുന്നു.
ഇന്ത്യൻ പ്രീമിയർ ലീഗിൽ 2010 മുതൽ 2013 വരെ രാജസ്ഥാൻ റോയൽസിന്റെ താരമായിരുന്നു രാഹുൽ ദ്രാവിഡ്. പിന്നാലെ 2014, 2015 സീസണുകളിൽ രാജസ്ഥാൻ ടീമിന്റെ ഉപദേശക റോളിലും ദ്രാവിഡ് പ്രവർത്തിച്ചിരുന്നു. 2013ൽ നായകനായിരുന്നപ്പോൾ രാജസ്ഥാനെ ഐപിഎല്ലിൽ മൂന്നാം സ്ഥാനത്തും ചാമ്പ്യൻസ് ലീഗ് ട്വന്റി 20യിൽ രണ്ടാമതും എത്തിച്ചതാണ് രാഹുൽ ദ്രാവിഡിന്റെ നേട്ടം.
അതിനിടെ നിലവിലെ പരിശീലകൻ കുമാർ സംഗക്കാരയെ നിലനിർത്തുമോയെന്ന കാര്യത്തിൽ രാജസ്ഥാൻ റോയൽസ് ടീം അധികൃതർ വ്യക്തത വരുത്തിയിട്ടില്ല. 2021 മുതൽ രാജസ്ഥാൻ റോയൽസ് ടീമിന്റെ പരിശീലകനാണ് സംഗക്കാര. 2022ലെ ഐപിഎല്ലിൽ രാജസ്ഥാനെ ഫൈനലിലെത്തിച്ചതാണ് സംഗക്കാരയുടെ പ്രധാന നേട്ടം.