കൊളംബോ: ശ്രീലങ്കയ്ക്കെതിരായ ഒന്നാം ട്വന്റി 20യ്ക്ക് മുമ്പായി മലയാളി താരം സഞ്ജു സാംസണ് ബാറ്റിംഗ് ടിപ്സുകൾ പറഞ്ഞുകൊടുത്ത് പരിശീലകൻ ഗൗതം ഗംഭീർ. ഇരുവരും പരിശീലനം നടത്തുന്ന ബിസിസിഐ പുറത്തുവിട്ട വീഡിയോയാണ് ഇപ്പോൾ സമൂഹമാധ്യമങ്ങളിൽ തരംഗമാകുന്നത്. ഇതോടെ ഈ മാസം 27ന് നടക്കുന്ന ഒന്നാം ട്വന്റി 20യിൽ സഞ്ജു സാംസൺ കളിക്കുമെന്ന പ്രതീക്ഷയിലാണ് ആരാധകർ.
ട്വന്റി 20 പരമ്പരയിൽ സഞ്ജുവിനൊപ്പം റിഷഭ് പന്തും വിക്കറ്റ് കീപ്പറായി ടീമിലുണ്ട്. ഇതോടെ ഇന്ത്യൻ ടീമിന്റെ ഒന്നാം വിക്കറ്റ് കീപ്പറായി പന്ത് കളിക്കാനുള്ള സാധ്യതയാണ് ആരാധകർ പറയുന്നത്. ട്വന്റി 20 ലോകകപ്പിൽ ഇന്ത്യൻ ടീമിന്റെ ഭാഗമായിരുന്ന സഞ്ജുവിന് ഒരു മത്സരം പോലും കളിക്കാൻ കഴിഞ്ഞിരുന്നില്ല.
ഗൗതം ഗംഭീർ ഇന്ത്യയുടെ പരിശീലകനാകുന്ന ആദ്യ പരമ്പരയാണിത്. ട്വന്റി 20 ലോകചാമ്പ്യനും ഏകദിന ലോകകപ്പ്, ടെസ്റ്റ് ചാമ്പ്യൻഷിപ്പുകളിൽ ഫൈനലിസ്റ്റുകളുമായ ടീമിനെ കൂടുതൽ ഉയരങ്ങളിൽ എത്തിക്കുകയാണ് ലക്ഷ്യമെന്ന് ഗൗതം ഗംഭീർ ആദ്യ വാർത്താസമ്മേളനത്തിൽ പറഞ്ഞിരുന്നു. മൂന്ന് ട്വന്റി 20യും മൂന്ന് ഏകദിനങ്ങളുമാണ് ഇന്ത്യ ശ്രീലങ്കയിൽ കളിക്കുക.
