![ഇന്ത്യൻ ടെസ്റ്റ് ടീമിലും ഉപനായകനാകാൻ ശുഭ്മൻ ഗിൽ; റിപ്പോർട്ട്](http://media.assettype.com/reporterlive%2F2024-07%2F6dd6101a-5913-47a3-91b2-d41f868ee250%2Fgill%20(3).jpg?w=480&auto=format%2Ccompress&fit=max)
ഡൽഹി: ഇന്ത്യൻ ക്രിക്കറ്റ് ഏകദിന, ട്വന്റി 20 ടീമുകൾക്ക് പിന്നാലെ ടെസ്റ്റ് ടീമിന്റെയും ഉപനായകസ്ഥാനത്തേയ്ക്ക് ശുഭ്മൻ ഗില്ലിനെ പരിഗണിക്കുന്നതായി റിപ്പോർട്ട്. സെപ്റ്റംബറിൽ ബംഗ്ലാദേശിനെതിരെ നടക്കുന്ന ടെസ്റ്റ് പരമ്പരയിൽ ജസ്പ്രീത് ബുംറയ്ക്ക് പകരം ശുഭ്മൻ ഗിൽ ഇന്ത്യൻ ടീമിന്റെ ഉപനായകസ്ഥാനത്ത് എത്തിയേക്കും. റെവ്സ്പോർട്സ് ആണ് ഇക്കാര്യം റിപ്പോർട്ട് ചെയ്തിരിക്കുന്നത്.
സെപ്റ്റംബർ 19ന് ചെന്നൈയിലാണ് ഇന്ത്യയും ബംഗ്ലാദേശും തമ്മിലുള്ള ആദ്യ ടെസ്റ്റ് നടക്കുക. രോഹിത് ശർമ്മ നയിക്കുന്ന ടീമാകും ബംഗ്ലാദേശിനെതിരെ കളത്തിലിറങ്ങുക. മുമ്പ് രോഹിത് ശർമ്മയുടെ അഭാവത്തിൽ ഇന്ത്യൻ ടീമിന്റെ നായകനായിരുന്നത് പേസർ ജസ്പ്രീത് ബുംറയാണ്. 37കാരാനായ രോഹിത് ശർമ്മ അധികകാലം അന്താരാഷ്ട്ര ക്രിക്കറ്റിൽ തുടരില്ലെന്ന് വ്യക്തമാണ്. ഈ സാഹചര്യത്തിലാണ് ഇന്ത്യൻ ടീം പുതിയ നായകനെ തേടുന്നത്.
2019ൽ മാത്രം ഇന്ത്യൻ ക്രിക്കറ്റിലേക്ക് കടന്നുവന്ന താരമാണ് ഗിൽ. രോഹിത് ശർമ്മയ്ക്ക് പകരക്കാരനായ നായകരുടെ പട്ടികയിൽ നിരവധി താരങ്ങള് ഉണ്ടായിരുന്നെങ്കിലും ശുഭ്മൻ ഗില്ലിന്റെ പേര് ഉയർന്നുകേട്ടിരുന്നില്ല. എന്നാൽ ഈ മാസം ആദ്യം നടന്ന സിംബാബ്വെയ്ക്കെതിരായ ട്വന്റി 20 പരമ്പരയിൽ ഗിൽ ഇന്ത്യൻ ടീമിന്റെ നായകസ്ഥാനത്തേയ്ക്ക് കടന്നുവന്നു. ഐപിഎല്ലിൽ ഗുജറാത്ത് ടൈറ്റൻസിനെ നയിച്ചെങ്കിലും യുവ ഇന്ത്യൻ താരത്തിന് വിജയങ്ങൾ നേടാൻ കഴിഞ്ഞിരുന്നില്ല.