Get the latest news at
your fingertips!
Download our app now
LIVE TV
Search
സോഷ്യൽ മീഡിയയിൽ ഒന്നാകെ നിറഞ്ഞു നിൽക്കുകയാണ് നടൻ സുരേഷ് കൃഷ്ണ. സിനിമകളിൽ അദ്ദേഹം ചെയ്ത കഥാപാത്രങ്ങളെ വെച്ച് ട്രോളുകളും ചർച്ചകളും സോഷ്യൽ മീഡിയയിൽ നിറഞ്ഞതോടെയാണ് സുരേഷ് കൃഷ്ണ ട്രെൻഡിങ് ലിസ്റ്റിൽ എത്തിയത്. 'കൺവിൻസിങ് സ്റ്റാർ' എന്നാണ് സോഷ്യൽ മീഡിയ സുരേഷ് കൃഷ്ണയെ വിളിക്കുന്നത്.
ഇത്തരം ചർച്ചകൾക്ക് പിന്നാലെ പുതിയ പോസ്റ്റുമായി എത്തിയിരിക്കുകയാണ് സുരേഷ് കൃഷ്ണ. സിനിമയിലെ 'കൺവിൻസിങ്' ഡയലോഗിനെ ഓർമിപ്പിക്കുന്ന തരത്തിൽ 'നിങ്ങൾ ലൈക്ക് അടിച്ചിരി, ഞാൻ ഇപ്പൊ വരാം' എന്ന അടിക്കുറിപ്പോടെ തന്റെ തന്നെ ചിത്രമാണ് സുരേഷ് കൃഷ്ണ പോസ്റ്റ് ചെയ്തിരിക്കുന്നത്.
ഇതിന് മറുപടിയായി 'ഒകെ ഞാൻ കൺവിൻസിങ് ആയി!' എന്ന് നടനും സംവിധായകനുമായ ബേസിൽ ജോസഫ് മറുപടി നൽകുകയും ചെയ്തിട്ടുണ്ട്. ടൊവിനോ തോമസ് നിർമിച്ച് ബേസിൽ ജോസഫ് നായകനാവുന്ന മരണമാസ് എന്ന ചിത്രത്തിന്റെ ലൊക്കേഷനിലാണ് സുരേഷ് കൃഷ്ണയുള്ളത്.
ഇതിനിടെ സുരേഷ് കൃഷ്ണയ്‌ക്കൊപ്പമുള്ള മരണമാസിലെ താരങ്ങളുടെ പുതിയ റീലും പുറത്തുവന്നിട്ടുണ്ട്. നടൻ സിജു സണ്ണിയാണ് പുതിയ റീലുമായി എത്തിയിരിക്കുന്നത്. സുരേഷ് കൃഷ്ണയെ 'കൺവിൻസ്' ചെയ്യുന്ന സിജുവും കൂട്ടരുമാണ് റീൽ വീഡിയോയിൽ ഉള്ളത്.
മരണമാസ് സിനിമയുടെ ലൊക്കേഷനിൽ നിന്ന് തന്നെയാണ് വീഡിയോ ഷൂട്ട് ചെയ്തിരിക്കുന്നത്. വ്യത്യസ്ത ലുക്കിൽ ബേസിൽ എത്തുന്ന ചിത്രം നവാഗതനായ ശിവപ്രസാദ് ആണ് സംവിധാനം ചെയ്യുന്നത്. സിജു സണ്ണിയാണ് ചിത്രത്തിന്റെ കഥ. സംവിധായകൻ ശിവപ്രസാദും സിജു സണ്ണിയും ചേർന്നാണ് തിരക്കഥ ഒരുക്കിയിരിക്കുന്നത്.
ടൊവിനോ തോമസ് പ്രൊഡക്ഷൻസും വേൾഡ് വൈഡ് ഫിലിംസും ചേർന്ന് അവതരിപ്പിക്കുന്ന ചിത്രത്തിന്റെ നിർമാതാക്കൾ ടോവിനോ തോമസ്, ടിങ്സ്റ്റൻ തോമസ്, തൻസീർ സലാം, റാഫേൽ പോഴോളിപറമ്പിൽ എന്നിവരാണ്.
