LIVE TV
തമിഴരശൻ പച്ചമുത്തു രചനയും സംവിധാനവും നിർവ്വഹിച്ച ഒരു സ്‌പോർട്‌സ് കോമഡി ഡ്രാമ ചിത്രമാണ് ലബ്ബർ പന്ത്. ഈ മാസം 25 ന് തിയേറ്ററുകളിൽ എത്തിയ ചിത്രം നിരൂപകരിൽ നിന്നും പ്രേക്ഷകരിൽ നിന്നും ഒരുപോലെ പ്രശംസ നേടിക്കൊണ്ടിരിക്കുകയാണ്. ചിത്രത്തിലെ നായക കഥാപാത്രങ്ങൾ എഴുതിയതിന് പിന്നിലെ പ്രചോദനം മലയാള സിനിമ അയ്യപ്പനും കോശിയുമാണെന്ന് പറഞ്ഞിരിക്കുകയാണ് സംവിധായകൻ തമിഴരശൻ പച്ചമുത്തു.
തൻ്റെ ജീവിതത്തിൻ്റെ ചില ഭാഗങ്ങളിൽ നിന്ന് പ്രചോദനം ഉൾക്കൊണ്ടാണ് ചിത്രത്തിന്റെ കഥയെഴുതിയതെങ്കിലും പ്രധാന കഥാപാത്രങ്ങൾ 2020-ലെ നിരൂപക പ്രശംസ നേടിയ മലയാളം ചിത്രമായ അയ്യപ്പനും കോശിയിൽ നിന്നും പ്രചോദനം ഉൾക്കൊണ്ടാണ് തയ്യാറാക്കിയതെന്ന് ഗലാറ്റ പ്ലസിന് നൽകിയ അഭിമുഖത്തിൽ തമിഴരശൻ വെളിപ്പെടുത്തി.
'അയ്യപ്പനും കോശിയും കഥാപാത്രങ്ങളുടെ രചനാരീതി എനിക്കേറെ ഇഷ്ടമാണ്. ചിത്രത്തിലെ ബിജു മേനോൻ്റെ കഥാപാത്രവും ഭാര്യയുടെ കഥാപാത്രവും എന്നെ വല്ലാതെ സ്വാധീനിച്ചു. സമാനമായ കഥാഗതിയുള്ള ഒരു സിനിമ ചെയ്യാൻ ഞാൻ ആഗ്രഹിച്ചില്ല, പക്ഷേ ആ കഥാപാത്രങ്ങൾക്ക് സമാനമായ എന്തെങ്കിലും സൃഷ്ടിക്കാൻ ആഗ്രഹിച്ചു. അങ്ങനെയാണ് എന്റെ ചിത്രത്തിലെ രണ്ടു കഥാപാത്രങ്ങൾക്കും അയ്യപ്പനും കോശിയിലെയും കഥാപാത്രങ്ങളുടെ സ്വഭാവം നൽകിയത്'. എന്നാണ് തമിഴരശൻ പറഞ്ഞത്.
ഹരീഷ് കല്യാൺ, അട്ടകത്തി ദിനേഷ്, സ്വാസിക, സഞ്ജന കൃഷ്ണമൂർത്തി എന്നിവരാണ് ലബ്ബർ പന്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. മികച്ച കളക്ഷനോടെ ചിത്രം ഇപ്പോൾ തിയേറ്ററുകളിൽ പ്രദർശനം തുടരുകയാണ്.
