Get the latest news at
your fingertips!
Download our app now
LIVE TV
Search
സോഷ്യൽ മീഡിയയിലെ ഇപ്പോഴത്തെ സ്റ്റാർ സുരേഷ് കൃഷ്ണയാണ്. 'കൺവിൻസിങ് സ്റ്റാർ' എന്നാണ് സോഷ്യൽ മീഡിയയിലെ സുരേഷ് കൃഷ്ണയുടെ പുതിയ വിളിപ്പേര്. സിനിമകളിൽ അദ്ദേഹം ചെയ്ത കഥാപാത്രങ്ങളെ വച്ച് ട്രോളുകളും ചർച്ചകളും സോഷ്യൽ മീഡിയയിൽ നിറഞ്ഞതോടെയാണ് സുരേഷ് കൃഷ്ണ ട്രെൻഡിങ് ലിസ്റ്റിൽ എത്തിയത്. ഈ മീമുകളെല്ലാം കണ്ടതിന് ശേഷം, ഒരുപാട് സിനിമകളിൽ താൻ ഒരു വഞ്ചകനായ കഥാപാത്രത്തെയാണ് അവതരിപ്പിച്ചതെന്നറിഞ്ഞപ്പോൾ അത്ഭുതം തോന്നിയെന്ന് സുരേഷ് കൃഷ്ണ കൊച്ചി ടൈംസിന് നൽകിയ അഭിമുഖത്തിൽ മനസുതുറന്നു.
മറ്റ് കഥാപാത്രങ്ങൾക്ക് ഞാൻ ഒരു നല്ലവനെന്ന് തോന്നുകയും എന്നാൽ അവസാനം വഞ്ചിക്കുകയും അവർക്ക് ദ്രോഹമാകുന്ന തരത്തിലുള്ള തീരുമാനമെടുക്കാൻ 'കൺവിൻസ്' ചെയ്യുന്ന കഥാപാത്രങ്ങളാണ് എന്റെ യുഎസ്പി. ഞാൻ സോഷ്യൽ മീഡിയയിൽ സജീവമല്ല, എൻ്റെ പേജ് പോലും വെരിഫൈഡ് അല്ല. മരണമാസ് എന്ന കോമഡി സിനിമയിൽ അഭിനയിച്ചു കൊണ്ടിരിക്കുമ്പോൾ ബേസിൽ ജോസഫ്, സിജു സണ്ണി, രാജേഷ് മാധവൻ തുടങ്ങിയവരും ലൊക്കേഷനിലുള്ള മറ്റുള്ളവരുമാണ് 'കൺവിൻസിങ് സ്റ്റാർ' എന്ന മീം ട്രെൻഡിങ് ആണെന്ന് എന്നോട് പറയുന്നത്. ഇത് അറിഞ്ഞപ്പോൾ വളരെ ലാഘവത്തോടെയാണ് ഞാൻ അതെടുത്തത്. വില്ലന്മാരിൽ തന്നെ പല തരമുണ്ടെന്ന് ഈ ട്രെൻഡ് കാണുമ്പോഴാണ് മനസിലാകുന്നത്', സുരേഷ് കൃഷ്ണ പറഞ്ഞത് ഇങ്ങനെ.
33 വർഷമായി താൻ ഇൻഡസ്ട്രിയിലുണ്ട്, ഹരിഹരൻ, ജോഷി, ഷാജി എൻ കരുൺ തുടങ്ങിയ നിരവധി മുതിർന്ന സംവിധായകർക്കൊപ്പം പ്രവർത്തിച്ചിട്ടുണ്ട്. ചെറുപ്പക്കാരായ ടെക്‌നിഷ്യൻസിനൊപ്പവും അഭിനേതാക്കൾക്കൊപ്പവും പ്രവർത്തിക്കാൻ കഴിയുന്നതൊരു ഭാഗ്യമായി താൻ കാണുന്നു. വളരെ റഫ് ആയ പേഴ്സണാലിറ്റി ഉള്ളയാളാണ് താനെന്നാണ് പലരും കരുതുന്നത്. എന്നാൽ ചെറുപ്പക്കാരായ ധാരാളം സുഹൃത്തുക്കൾ തനിക്കുണ്ട്. സുരേഷ് കൃഷ്ണ അഭിപ്രായപ്പെടുകയുണ്ടായി.
ക്രിസ്ത്യൻ ബ്രദേഴ്സ്, കാര്യസ്ഥൻ, തുറുപ്പുഗുലാൻ, മഞ്ഞുപോലൊരു പെൺകുട്ടി, രാമലീല തുടങ്ങി നിരവധി സിനിമകളിലെ സുരേഷ് കൃഷ്ണയുടെ കൺവിൻസിങ് സീനുകളാണ് ഇപ്പോൾ സോഷ്യൽ മീഡിയയിൽ തരംഗമായിരിക്കുന്നത്. ഇത്തരം ചർച്ചകൾക്ക് പിന്നാലെ പോസ്റ്റുമായി സുരേഷ് കൃഷ്ണ എത്തിയിരുന്നു. സിനിമയിലെ 'കൺവിൻസിങ്' ഡയലോഗിനെ ഓർമിപ്പിക്കുന്ന തരത്തിൽ 'നിങ്ങൾ ലൈക്ക് അടിച്ചിരി, ഞാൻ ഇപ്പൊ വരാം' എന്ന അടിക്കുറിപ്പോടെ തന്റെ തന്നെ ചിത്രമാണ് സുരേഷ് കൃഷ്ണ പോസ്റ്റ് ചെയ്തത്.
ഇതിന് മറുപടിയായി 'ഒകെ ഞാൻ കൺവിൻസിങ് ആയി!' എന്ന് നടനും സംവിധായകനുമായ ബേസിൽ ജോസഫ് മറുപടി നൽകുകയും ചെയ്തു. ഇതിനിടെ സുരേഷ് കൃഷ്ണയ്‌ക്കൊപ്പമുള്ള മരണമാസിലെ താരങ്ങളുടെ പുതിയ റീലും പുറത്തുവന്നു. നടൻ സിജു സണ്ണിയാണ് പുതിയ റീലുമായി എത്തിയത്. സുരേഷ് കൃഷ്ണയെ 'കൺവിൻസ്' ചെയ്യുന്ന സിജുവും കൂട്ടരുമാണ് റീൽ വീഡിയോയിൽ ഉള്ളത്.
ഫഹദ് ഫാസിൽ നായകനാകുന്ന ഓടും കുതിര ചാടും കുതിര, ആഷിഖ് അബു ചിത്രം റൈഫിൾ ക്ലബ്, ടൊവിനോ തോമസ് നിർമിച്ച് ബേസിൽ ജോസഫ് കേന്ദ്ര കഥാപാത്രത്തെ അവതരിപ്പിക്കുന്ന മരണമാസ് തുടങ്ങിയ ചിത്രങ്ങളാണ് ഇനി പുറത്തിറങ്ങാനുള്ള സുരേഷ് കൃഷ്ണ ചിത്രങ്ങൾ.
