Get the latest news at
your fingertips!
Download our app now
LIVE TV
Search
കരിയറിലെ ആദ്യത്തെ ആക്ഷൻ റോളുമായി സുരഭി ലക്ഷ്മി. ആഷിഖ് അബു സംവിധാനം ചെയ്യുന്ന പുതിയ ചിത്രം റൈഫിൾ ക്ലബിലാണ് ആക്ഷൻ റോളുമായി സുരഭി എത്തുന്നത്. സുസൻ എന്ന കഥാപാത്രമായിട്ടാണ് ചിത്രത്തിൽ താൻ അഭിനയിക്കുന്നതെന്ന് നേരത്തെ സുരഭി ലക്ഷ്മി റിപ്പോർട്ടർ ലൈവിന് നൽകിയ അഭിമുഖത്തിൽ പറഞ്ഞിരുന്നു.
കൈകളിൽ തോക്കേന്തിയ വ്യത്യസ്തമായ ലുക്കിലുള്ള സുരഭിയുടെ ക്യാരക്ടർ പോസ്റ്റർ ഇന്ന് പുറത്തുവിട്ടു. സുരഭിയുടെ ജന്മദിനം കൂടിയായ ഇന്ന് സംവിധായകൻ ആഷിഖ് അബുവാണ് പുതിയ ക്യാരക്ടർ പോസ്റ്റർ പുറത്തുവിട്ടത്. 'ഹാപ്പി ബർത്ത് ഡെ സൂസൻ' എന്ന ആശംസയ്‌ക്കൊപ്പമാണ് പോസ്റ്റർ പുറത്തുവിട്ടത്.
റൈഫിൾ ക്ലബിന്റെ ചിത്രീകരണം താൻ ഏറെ ആസ്വദിച്ചിരുന്നെന്ന് സുരഭി റിപ്പോർട്ടർ ടിവിയോട് പറഞ്ഞിരുന്നു. കാലടി യൂണിവേഴ്‌സിറ്റിയിൽ പഠിച്ചതിന് ശേഷം താൻ ഇത്രത്തോളം ആസ്വദിച്ച മറ്റൊരു സെറ്റ് ഉണ്ടായിരുന്നില്ലെന്നും നിരവധി താരങ്ങളുള്ള സെറ്റായിരുന്നു ഇതെന്നും സുരഭി പറഞ്ഞിരുന്നു.
നേരത്തെ സുരേഷ് കൃഷ്ണ, അനുരാഗ് കശ്യപ്, ഹനുമാൻ കൈൻഡ് എന്നിവരുടെ ക്യാരക്ടർ പോസ്റ്ററുകളും പുറത്തുവന്നിരുന്നു. ആഷിഖ് അബു സംവിധാനവും നിർമാണവും ക്യാമറയും ചെയ്യുന്നുവെന്ന പ്രത്യേകത റൈഫിൾ ക്ലബ് എന്ന ചിത്രത്തിനുണ്ട്.
ഒപിഎം സിനിമാസിന്റെ ബാനറിൽ ആഷിഖ് അബു, വിൻസന്റ് വടക്കൻ, വിശാൽ വിൻസന്റ് ടോണി എന്നിവർ ചേർന്ന് നിർമിക്കുന്ന ചിത്രത്തിന് ദിലീഷ് നായർ, ശ്യാം പുഷ്‌കരൻ, ഷറഫു, സുഹാസ് എന്നിവർ ചേർന്നാണ് തിരക്കഥയും സംഭാഷണങ്ങളും ഒരുക്കിയിരിക്കുന്നത്.
ദിലീഷ് പോത്തൻ, അനുരാഗ് കശ്യപ്, വാണി വിശ്വനാഥ്, വിൻസി അലോഷ്യസ് ഹനുമാൻ കൈന്റ്, ബേബി ജീൻ, സെന്ന ഹെഡ്ഗെ, നതേഷ് ഹെഡ്ഗെ, നവനി, റംസാൻ മുഹമ്മദ്, ഉണ്ണിമായ, വിജയരാഘവൻ, വിഷ്ണു അഗസ്ത്യ, സുരഭി ലക്ഷ്മി, വിനീത് കുമാർ, നിയാസ് മുസലിയാർ, കിരൺ പീതാംബരൻ, റാഫി, പ്രശാന്ത് മുരളി, രാമു, പൊന്നമ്മ ബാബു, ബിപിൻ പെരുമ്പള്ളി, വൈശാഖ്, സജീവൻ, ഇന്ത്യൻ, മിലൻ, ചിലമ്പൻ, ആലീസ്, ഉണ്ണി മുട്ടം, ഭാനുമതി, എൻ പി നിസ തുടങ്ങിയവരാണ് ചിത്രത്തിലെ മറ്റു കഥാപാത്രങ്ങളെ അവതരിപ്പിക്കുന്നത്.
അജയൻ ചാലിശ്ശേരിയാണ് 'റൈഫിൾ ക്ലബി'ന്റെ പ്രൊഡക്ഷൻ ഡിസൈനർ. സംഗീതം-റെക്സ് വിജയൻ, പ്രൊഡക്ഷൻ കൺട്രോളർ-കിഷോർ പുറക്കാട്ടിരി, മേക്കപ്പ്-റോണക്സ് സേവ്യർ, വസ്ത്രാലങ്കാരം-മഷർ ഹംസ, എഡിറ്റർ -വി സാജൻ,സംഘട്ടനം-സുപ്രീം സുന്ദർ, സ്റ്റിൽസ്-റോഷൻ, അർജ്ജുൻ കല്ലിങ്കൽ.
Content Highlights: Actress Surabhi Lakshmi as Susan in Rifle Club Movie Aashiq abu Wish her on Birthday
