Get the latest news at
your fingertips!
Download our app now
LIVE TV
Search
സിനിമാപ്രേമികൾ ഏറെ ആകാംക്ഷയോടെ കാത്തിരിക്കുന്ന ചിത്രമാണ് അമൽ നീരദ് സംവിധാനം ചെയ്യുന്ന 'ബോഗയ്ൻവില്ല'. 'ഭീഷ്മ പർവ്വം' എന്ന സൂപ്പർ ഹിറ്റ് ചിത്രത്തിന് ശേഷം അമൽ നീരദ് ഒരുക്കുന്ന ചിത്രത്തിൽ ഫഹദ് ഫാസില്‍, കുഞ്ചാക്കോ ബോബന്‍, ജ്യോതിര്‍മയി എന്നിവരാണ് പ്രധാന വേഷങ്ങളിൽ എത്തുന്നത്. ചിത്രത്തിലെ കഥാപാത്രങ്ങളുടെ പേരുകള്‍ പുറത്തുവിടുന്ന പുതിയ പോസ്റ്ററുകള്‍ പുറത്തുവിട്ടിരിക്കുകയാണ് അണിയറപ്രവര്‍ത്തകര്‍ ഇപ്പോള്‍. ഒരു കണ്ണാടിയുടെ പിന്നിൽ നിൽക്കുന്നതായിട്ടാണ് ഓരോ കഥാപാത്രങ്ങളെയും അവതരിപ്പിച്ചിട്ടുള്ളത്. കണ്ണാടിയിൽ ബോഗയ്ൻവില്ല പൂക്കളുടെ പ്രതിഫലനവും കാണാനാകും.
ഫഹദ് ഫാസില്‍, കുഞ്ചാക്കോ ബോബന്‍, ജ്യോതിര്‍മയി, ഷറഫുദ്ധീൻ, വീണ, ശ്രിന്ദ എന്നിവരുടെ പോസ്റ്ററുകളാണ് ഇപ്പോൾ പുറത്തുവിട്ടിരിക്കുന്നത്. റോയ്‌സ് തോമസ് എന്ന കഥാപാത്രമായിട്ടാണ് കുഞ്ചാക്കോ ബോബൻ ചിത്രത്തിലെത്തുന്നത്. ഡേവിഡ് കോശിയായി ഫഹദ് ഫാസിലെത്തുമ്പോൾ റീത്തു എന്നാണ് ജ്യോതിര്‍മയിയുടെ കഥാപാത്രത്തിന്‍റെ പേര്. ഏറെ നാളുകള്‍ക്ക് ശേഷം ജ്യോതിര്‍മയി അഭിനയിക്കുന്ന ചിത്രം കൂടിയാണിത്. തികച്ചും വേറിട്ട ലുക്കിലാണ് നടി ചിത്രത്തിലെത്തുന്നത്.
ശ്രിദ്ധ രമയും വീണ മീരയും ഷറഫുദ്ദീന്‍ ബിജുവുമായാണ് എത്തുന്നത്. ആരിലേക്കോ ചൂഴ്ന്നിറങ്ങുന്ന നോട്ടങ്ങളുമായാണ് എല്ലാ കഥാപാത്രങ്ങളും ഈ പോസ്റ്ററുകളിലുള്ളത്. പോസ്റ്റർ ഇതിനോടകം ചര്‍ച്ചകളില്‍ ഇടം നേടിയിട്ടുണ്ട്. ഫഹദിന്‍റെ മാത്രമല്ല, കുഞ്ചാക്കോ ബോബന്‍റെയും ജ്യോതിര്‍മയിയുടെയുമെല്ലാം കണ്ണുകള്‍ കൊണ്ടുള്ള പ്രകടനങ്ങള്‍ കാണാനാകുമെന്നാണ് ചില കമന്‍റുകള്‍.
കുഞ്ചാക്കോ ബോബനും അമല്‍ നീരദും ഇതാദ്യമായാണ് ഒന്നിച്ചെത്തുന്നത് എന്ന പ്രത്യേകതയും ചിത്രത്തിനുണ്ട്. ക്രൈം ത്രില്ലര്‍ നോവലുകളിലൂടെ ശ്രദ്ധേയനായ ലാജോ ജോസിനൊപ്പം ചേര്‍ന്നാണ് അമല്‍ നീരദ് സിനിമയുടെ തിരക്കഥ ഒരുക്കിയിരിക്കുന്നത്. ഭീഷ്മപർവ്വം, വരത്തൻ എന്നീ ചിത്രങ്ങൾക്ക് ഛായാഗ്രഹണം നിർവഹിച്ച ആനന്ദ് സി ചന്ദ്രനാണ് പുതിയ ചിത്രത്തിനും ക്യാമറ ചലിപ്പിക്കുന്നത്. സുഷിന് ശ്യാം ആണ് ചിത്രത്തിനായി സംഗീതം ഒരുക്കുന്നത്. ചിത്രത്തിലെ രണ്ടു ഗാനങ്ങൾ അണിയറപ്രവർത്തകർ പുറത്തുവിട്ടിരുന്നു. ബോഗയ്ന്‍വില്ലയുടെ ട്രെയ്‌ലര്‍ നാളെ എത്തും. ഒക്ടോബർ 17 നാണ് ചിത്രം തിയേറ്ററുകളിലെത്തുന്നത്.
Content Highlights: Amal Neerad movie Bougainvillea charcter posters out now on social media
