Get the latest news at
your fingertips!
Download our app now
LIVE TV
Search
വരത്തന്‍ സിനിമാ ചിത്രീകരണത്തിനിടയില്‍ നടന്ന രസകരമായ ഓര്‍മ പങ്കുവെച്ച് നടന്‍ ഷറഫുദ്ദീന്. ചിത്രത്തിലെ ക്ലൈമാക്‌സ് രംഗം ഷൂട്ട് ചെയ്യുന്നതിനിടയില്‍ നടന്‍ ഷോബി തിലകന്‍ പറഞ്ഞ ഒരു ഡയലോഗ് കേട്ട് സംവിധായകന്‍ അമല്‍ നീരദ് പൊട്ടിച്ചിരിക്കുകയായിരുന്നു എന്നാണ് ഷറഫുദ്ദീന് പറയുന്നത്.
'അഭിനേതാക്കളെ കൊണ്ട് കോമഡി രംഗം ചിത്രീകരിച്ചതിനു ശേഷം അത് കണ്ട് ആസ്വദിക്കുന്ന ഒരാള്‍ കൂടിയാണ് അമല്‍ നീരദ്. വരത്തനില്‍ ഷോബി തിലകന്‍ 'അവന്‍ വല്ല ടെററിസ്റ്റ് മറ്റോ ആണ് ഓടിക്കോ' എന്ന് പറയുന്ന ഒരു രംഗം ഉണ്ട്. ക്ലൈമാക്‌സിലാണ് അത് വരുന്നത്. അത് അവിടെ നിന്ന് അപ്പോള്‍ ഉണ്ടായതാണ്. ഇത് ചിത്രീകരിച്ച ശേഷം അമല്‍ നീരദ് തുടര്‍ച്ചയായി കണ്ട് ചിരിക്കുമായിരുന്നു.' ഷറഫുദ്ദീന് പറഞ്ഞു.
അമല്‍ നീരദ് സിനിമകളിലെ കോമഡി സീനുകളെ കുറിച്ചുള്ള ചോദ്യത്തോടാണ് ഷറഫുദ്ദീന് അനുഭവം പങ്കുവെച്ചുകൊണ്ട് മറുപടി നല്‍കിയത്. ബോഗയ്ന്‍വില്ലാ സിനിമയുടെ ഭാഗമായി റിപ്പോര്‍ട്ടര്‍ ടിവിയ്ക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
ബോഗയ്ന്‍വില്ലയിലും ഇത്തരം ചെറിയ കോമഡി സീനുകള്‍ ഉണ്ടാകുമെന്ന് സഹതാരം ശ്രിന്ദയും ഇതിന് പിന്നാലെ പറഞ്ഞു. അമല്‍ നീരദിന് അടിപൊളി കോമഡി ടൈമിങ്ങാണെന്നും ശ്രിന്ദ കൂട്ടിച്ചേര്‍ത്തു.
2018ല്‍ പുറത്തിറങ്ങിയ വരത്തനില്‍ ഫഹദ് ഫാസിലും ഐശ്വര്യ ലക്ഷ്മിയുമായിരുന്നു പ്രധാന കഥാപാത്രങ്ങളെ അവതരിപ്പിച്ചത്. നെഗറ്റീവ് വേഷത്തിലൂടെ ഷറഫുദ്ദീന് കരിയറില്‍ പുതിയ വഴിവെട്ടി കൊടുത്ത ചിത്രം കൂടിയായിരുന്നു വരത്തന്‍. ഫഹദ് ഫാസിലിന്റെ ആക്ഷന്‍ രംഗങ്ങള്‍കൊണ്ട് സമ്പന്നമായ വരത്തന്റെ ക്ലൈമാക്‌സിന് ആരാധകരേറെയാണ്.
അതേസമയം, അമല്‍ നീരദിന്റെ സംവിധാനത്തില്‍ ഒരുങ്ങുന്ന പുതിയ ചിത്രമായ ബോഗയ്ന്‍വില്ല ഒക്ടോബര്‍ 17ന് തിയേറ്ററുകളിലെത്തുകയാണ്. ജ്യോതിര്‍മയി, കുഞ്ചാക്കോ ബോബന്‍, ഫഹദ് ഫാസില്‍ എന്നിവര്‍ കേന്ദ്ര കഥാപാത്രങ്ങളാകുന്ന ചിത്രമാണിത്. 'ഭീഷ്മപര്‍വ്വ'ത്തിന് ശേഷം അമല്‍ നീരദ് ഒരുക്കുന്ന ചിത്രം അമല്‍നീരദ് പ്രൊഡക്ഷന്‍സിന്റെയും ഉദയ പിക്ചേഴ്സിന്റെയും ബാനറില്‍ ജ്യോതിര്‍മയിയും കുഞ്ചാക്കോ ബോബനും ചേര്‍ന്നാണ് നിര്‍മിക്കുന്നത്.
Content Highlights: Sharafudheen shares a funny experience with Amal Neerad during a varathan movie shoot
