LIVE TV
അലപ്പുഴയിൽ നിന്ന് സിനിമയിൽ എത്തിയ രണ്ടുപേരാണ് ഫഹദ് ഫാസിലും കുഞ്ചാക്കോ ബോബനും. ഇരുവരും ഒരുമിച്ച് എത്തിയ പുതിയ ചിത്രം ബോഗയ്ൻവില്ല ബോക്‌സോഫീസിൽ മികച്ച പ്രകടനമാണ് കാഴ്ച വെക്കുന്നത്. ചിത്രം റിലീസായതിന് പിന്നാലെ സ്വന്തം നാടായ ആലപ്പുഴയിലെ തിയേറ്ററിൽ വിജയം ആഘോഷിച്ചിരിക്കുകയാണ് ചാക്കോച്ചനും ഫഹദ് ഫാസിലും.
ആലപ്പുഴയിലെ കൈരളി തിയേറ്ററിലാണ് ഇരുവരും വിജയം കേക്ക് മുറിച്ച് ആഘോഷമാക്കിയത്. ചിത്രം കാണാനെത്തിയ പ്രേക്ഷകരോട് നന്ദി പറഞ്ഞ കുഞ്ചാക്കോ ബോബനും ഫഹദ് ഫാസിലും പ്രേക്ഷകരിൽ നിന്ന് നേരിട്ട് ചിത്രത്തിന്റെ അഭിപ്രായം ആരാഞ്ഞു.
'എല്ലാവരോടും വന്ന് ചിത്രം കാണാൻ പറയണമെന്ന് ചാക്കോച്ചനും നിങ്ങൾ ഇനിയും രണ്ടു മൂന്ന് പ്രാവശ്യം വന്ന് കാണൂവെന്ന് ഫഹദ് ഫാസിലും പറഞ്ഞു. ഇതിനിടെ ചിത്രത്തിലെ ഡയലോഗുകളിൽ ഒന്നായ 'വീട്ടിൽ ചെന്ന് കുരിശു വരച്ച് ഉറങ്ങണം' എന്ന ഡയലോഗ് പ്രേക്ഷകരിൽ നിന്ന് ഒരാൾ പറയുകയും ചെയ്തു.
വിജയാഘോഷത്തിന്റെ ചിത്രങ്ങൾ സോഷ്യൽ മീഡിയയിൽ ഇപ്പോൾ വൈറലാണ്. ഒക്‌ടോബർ 17 നാണ് ബോഗയ്ൻവില്ല റിലീസ് ചെയ്തത്. 'ഭീഷ്മപർവ്വ'ത്തിന് ശേഷം അമൽ നീരദ് ഒരുക്കുന്ന ചിത്രം അമൽനീരദ് പ്രൊഡക്ഷൻസിന്റെയും ഉദയ പിക്‌ചേഴ്‌സിന്റെയും ബാനറിൽ ജ്യോതിർമയിയും കുഞ്ചാക്കോ ബോബനും ചേർന്നാണ് നിർമിച്ചത്.
ജ്യോതിർമയി, കുഞ്ചാക്കോ ബോബൻ, ഫഹദ് ഫാസിൽ, ശ്രിന്ദ, ഷറഫുദ്ധീൻ, വീണ നന്ദകുമാർ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.
Content Highlights: Fahadh Faasil and Kunchacko Boban celebrate the success of Bougainvillea at Alappuzha Theatre
