Get the latest news at
your fingertips!
Download our app now
LIVE TV
Search
അല്ലു അർജുൻ നായകനായ 'പുഷ്പ' ഒന്നാം ഭാഗത്തിലെ സാമന്തയുടെ ഡാൻസ് നമ്പർ രാജ്യമെമ്പാടും സെൻസേഷനായിരുന്നു. പുഷ്പയുടെ രണ്ടാം ഭാഗം ഒരുങ്ങുമ്പോൾ അതിനേക്കാൾ മികച്ച ഒരു ഡാൻസ് തന്നെ ആരാധകർ പ്രതീക്ഷിക്കുന്നുമുണ്ട്. ഇപ്പോഴിതാ, പുഷ്പ 2 ലും ഒരു കിടിലൻ ഡാൻസ് നമ്പറുണ്ടാകുമെന്നും ബോളിവുഡ് താരം ശ്രദ്ധ കപൂറായിരിക്കും ഡാൻസ് നമ്പറിലെത്തുക എന്നുമുള്ള റിപ്പോർട്ടുകളാണ് പുറത്തുവരുന്നത്.
ശ്രദ്ധ കപൂർ പ്രധാന വേഷത്തിലെത്തിയ 'സ്ത്രീ 2' രാജ്യമെമ്പാടും വലിയ ഹിറ്റായിരുന്നു. ഈ വേളയിലാണ് പുഷ്പയുടെ അണിയറപ്രവർത്തകർ ഡാൻസ് നമ്പറിനായി നടിയെ സമീപിച്ചത് എന്ന് 123 തെലുഗു റിപ്പോർട്ട് ചെയ്യുന്നു. ആദ്യഭാഗത്തിലെ ഗാനത്തിനായി സാമന്തയ്ക്ക് അഞ്ച് കോടിയായിരുന്നു പ്രതിഫലം ലഭിച്ചത്. രണ്ടാം ഭാഗത്തിലെ ഡാൻസ് നമ്പറിന് ശ്രദ്ധയ്ക്ക് സാമന്തയേക്കാൾ ഉയർന്ന പ്രതിഫലം ലഭിക്കുമെന്നാണ് സൂചന.
പുഷ്പ 2 ഡിസംബർ ആറിന് ലോകമെമ്പാടുമുള്ള തിയേറ്ററുകളിൽ എത്തും. അല്ലു അർജുന് പുറമെ രശ്മിക മന്ദാന, ഫഹദ് ഫാസിൽ, സുനിൽ, ജഗപതി ബാബു, പ്രകാശ് രാജ് തുടങ്ങിയവരാണ് ചിത്രത്തിൽ പ്രധാന കഥാപാത്രങ്ങളായുള്ളത്. ഒന്നാം ഭാഗത്തിന്റെ അവസാനത്തിലെത്തി ഏറെ പ്രശംസ നേടിയ കഥാപാത്രമായിരുന്നു ഫഹദിന്റെ ഭൻവർ സിംഗ് ഷെഖാവത്ത്. രണ്ടാം ഭാഗത്തിൽ പ്രധാന വില്ലനായി എത്തുന്നതും ഫഹദ് ഫാസിലാണ്.
പുഷ്പയുടെ ആദ്യ ഭാഗം 'പുഷ്പ ദ റൈസ്' ന്റെ വൻ വിജയത്തിന് പിന്നാലെയാണ് രണ്ടാം ഭാഗത്തിന്റെ ചിത്രീകരണം സംവിധായകന്‍ സുകുമാർ ആരംഭിച്ചത്. നേരത്തെ ആഗസ്റ്റിൽ റിലീസ് ചെയ്യാനിരുന്ന ചിത്രം ചിത്രീകരണം പൂർത്തിയാവാത്തതിനെ തുടർന്ന് ഡിസംബറിലേക്ക് നീട്ടുകയായിരുന്നു. 'പുഷ്പ ദ റൈസ്' എന്ന ആദ്യ ഭാഗം രണ്ട് ദേശീയ ചലച്ചിത്ര പുരസ്‌കാരങ്ങളും 7 സംസ്ഥാന ചലച്ചിത്ര പുരസ്‌കാരങ്ങളും നേടിയിരുന്നു. ദേവി ശ്രീ പ്രസാദ് തന്നെയാണ് രണ്ടാം ഭാഗത്തിനും സംഗീതം നൽകുന്നത്.
'ആര്യ', 'ആര്യ 2' , 'പുഷ്പ' എന്നീ ചിത്രങ്ങൾക്ക് ശേഷം അല്ലു അർജുനും സുകുമാറും വീണ്ടുമൊന്നിക്കുന്ന ചിത്രമാണ് 'പുഷ്പ 2 ദി റൂൾ'. ചിത്രത്തിനെ ചുറ്റിപ്പറ്റി വലിയ പ്രതീക്ഷകളാണ് ഉള്ളത്. ചിത്രം ബോക്സ് ഓഫീസിൽ ആദ്യ ഭാഗത്തേക്കാൾ വലിയ വിജയം നേടുമെന്നാണ് ട്രേഡ് അനലിസ്റ്റുകളുടെ കണക്കുകൂട്ടല്‍. ചിത്രത്തിന്റെ ട്രെയിലർ നവംബർ രണ്ടാം വാരത്തോടെ റിലീസ് ചെയ്യാൻ അണിയറ പ്രവർത്തകർ പദ്ധതിയിടുന്നതായി റിപ്പോർട്ടുകൾ വന്നിരുന്നു.
Content Highlights: Shraddha Kapoor To Dance Alongside Allu Arjun In Pushpa 2
