Get the latest news at
your fingertips!
Download our app now
LIVE TV
Search
സൂര്യ നായകനായി എത്തുന്ന ഏറ്റവും പുതിയ ചിത്രമാണ് കങ്കുവ. വൻ ബജറ്റിൽ, വലിയ ഹൈപ്പിൽ വരുന്ന സിനിമയുടെ മേൽ ആരാധകർ വലിയ പ്രതീക്ഷയാണ് വെച്ചിരിക്കുന്നത്. ഈ പ്രതീക്ഷകളുടെ ഹൈപ്പ് വർധിപ്പിച്ച് കൊണ്ട് സിനിമയുടെ ആദ്യ റിവ്യൂ സമൂഹ മാധ്യമങ്ങളിൽ ചർച്ചയാവുകയാണ്. സിനിമയുടെ തിരക്കഥയില്‍ പങ്കാളിയായ മദൻ കര്‍ക്കിയാണ് എക്സ് പ്ലാറ്റ്‌ഫോമിലൂടെ കങ്കുവയുടെ ആദ്യ റിവ്യു പങ്കുവെച്ചിരിക്കുന്നത്.
'കങ്കുവ പൂർണ്ണമായി കണ്ടു. ഡബ്ബിങ് സമയത്ത് പല തവണ കണ്ടിട്ടുണ്ടെങ്കിലും ഓരോ കാഴ്ചയിലും സിനിമയുടെ ഇംപാക്ട് വർധിക്കുകയാണ്. ബ്രഹ്മാണ്ഡ വിഷ്വൽസ്, ആഴമുള്ള കഥ, സംഗീതത്തിന്റെ ഗാംഭീര്യം, അതിനൊപ്പം സൂര്യയുടെ പ്രകടനവും ചേരുമ്പോൾ ഗംഭീരമായ സൃഷ്ടിയായിരിക്കുകയാണ് കങ്കുവ. ഈ ഉജ്ജ്വലമായ അനുഭവം ഒരുക്കിയതിന് ശിവ സാറിനും ഒപ്പം സ്വപ്നങ്ങളുടെ ഈ നൂൽ യാഥാർത്ഥ്യത്തിലേക്ക് നെയ്തതിന് നിർമ്മാതാക്കൾക്കും നന്ദി,' എന്ന് മദൻ കര്‍ക്കി കുറിച്ചു.
നവംബർ 14 നാണ് കങ്കുവ ആഗോളതലത്തിൽ റിലീസ് ചെയ്യുന്നത്. സ്റ്റുഡിയോ ഗ്രീനിന്‍റെ ബാനറിൽ കെ ഇ ജ്ഞാനവേൽ രാജ, യു വി ക്രിയേഷൻസിന്റെ ബാനറിൽ വംശി പ്രമോദ് എന്നിവർ ചേർന്നാണ് ചിത്രം നിർമ്മിക്കുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം കേരളത്തിലെത്തിക്കുന്നത്. കേരളത്തിൽ 500 ൽ അധികം സ്‌ക്രീനുകളിലാണ് സിനിമ റിലീസ് ചെയ്യുക. അതിനൊപ്പം 100 ൽ അധികം ഫാൻസ്‌ ഷോകളും സിനിമയ്ക്ക് ഉണ്ടാകുമെന്നാണ് സൂചന.
കങ്കുവ, ഫ്രാൻസിസ് എന്നിങ്ങനെ ഇരട്ടവേഷങ്ങളിൽ സൂര്യ എത്തുന്ന ചിത്രത്തിൽ ബോളിവുഡ് നടി ദിഷ പഠാണിയാണ് നായികാ വേഷം ചെയ്യുന്നത്. ബോളിവുഡ് നടൻ ബോബി ഡിയോളാണ് വില്ലൻ കഥാപാത്രത്തെ അവതരിപ്പിക്കുക. ഇവർക്ക് പുറമെ ജഗപതി ബാബു, കോവൈ സരള, യോഗി ബാബു, ആനന്ദരാജ്, ജി മാരിമുത്തു, ബാല ശരവണൻ തുടങ്ങിയവരും സിനിമയിൽ ഭാഗമാകുന്നുണ്ട്.
Content Highlights: Madhan Karky shares the first review on Suriya movie Kanguva
