Get the latest news at
your fingertips!
Download our app now
LIVE TV
Search
വിജയ് സേതുപതി, നയൻതാര എന്നിവരെ കേന്ദ്ര കഥാപാത്രങ്ങളാക്കി വിഘ്‌നേശ് ശിവൻ സംവിധാനം ചെയ്ത കോമഡി ആക്ഷൻ ചിത്രമാണ് 'നാനും റൗഡി താൻ'. മികച്ച പ്രേക്ഷക പ്രതികരണം നേടിയ ചിത്രം ബോക്സ് ഓഫീസിലും നല്ല പ്രകടനമാണ് കാഴ്ചവച്ചത്. നാനും റൗഡി താനിന്റെ ഒൻപതാം വാർഷികത്തോട് അനുബന്ധിച്ച് ചിത്രത്തെക്കുറിച്ചുള്ള ഓർമ്മകൾ പങ്കുവെയ്ക്കുകയാണ് നയൻതാര. തന്റെ ജീവിതത്തെ എന്നെന്നേക്കുമായി മാറ്റിമറിച്ച, ഒരു അഭിനേതാവെന്ന നിലയിൽ നിരവധി പാഠങ്ങൾ നൽകിയ സിനിമയാണ് 'നാനും റൗഡി താൻ' എന്നും നയൻതാര ഇൻസ്റ്റഗ്രാമിൽ കുറിച്ചു. സിനിമയിലെ ഷൂട്ടിങ് സമയത്തെ ചിത്രങ്ങളും നയൻതാര ആരാധകർക്കായി പങ്കുവച്ചിട്ടുണ്ട്.
'9 വർഷം മുൻപ് ഈ ദിവസമാണ് നാനും റൗഡി താൻ റിലീസ് ചെയ്തത്. എൻ്റെ ജീവിതത്തെ അനുഗ്രഹിക്കാനും എന്നെന്നേക്കുമായി മാറ്റിമറിക്കാനും വന്ന ഒരു സിനിമയാണ് 'നാനും റൗഡി താൻ'. പ്രേക്ഷകരിൽ നിന്ന് പുതിയൊരു സ്നേഹമാണ് എനിക്ക് ലഭിച്ചത്. ഒരു അഭിനേതാവെന്ന നിലയിൽ നിരവധി പാഠങ്ങൾ എനിക്ക് സിനിമയിൽ നിന്ന് ലഭിച്ചു. പുതിയ അനുഭവങ്ങളും, ഓർമകളും, ബന്ധങ്ങളും ആ സിനിമ എനിക്ക് നൽകി. വിഘ്നേഷ് ശിവനെ എനിക്ക് ലഭിക്കാൻ കാരണമായത് നാനും റൗഡി താൻ ആണ്', നയൻതാര കുറിച്ചു.
വിഘ്‌നേശ് ശിവൻ തന്നെ തിരക്കഥയൊരുക്കി സംവിധാനം ചെയ്ത ചിത്രത്തിന്റെ സംഗീതം അനിരുദ്ധ് രവിചന്ദർ ആയിരുന്നു. ചിത്രത്തിലെ ഗാനങ്ങളെല്ലാം വലിയ രീതിയിൽ ശ്രദ്ധിക്കപ്പെട്ടിരുന്നു. പാർത്ഥിപൻ, രാധിക ശരത്കുമാർ, ആർജെ ബാലാജി, ആനന്ദ്‌രാജ് എന്നിവരായിരുന്നു ചിത്രത്തിലെ മറ്റു പ്രധാന അഭിനേതാക്കൾ. വണ്ടർബാർ ഫിലിംസിന്റെ ബാനറിൽ ധനുഷ് ആയിരുന്നു ചിത്രം നിർമിച്ചത്. ജോർജ് സി വില്യംസ് ഛായാഗ്രഹണം നിർവഹിച്ച സിനിമയുടെ എഡിറ്റിങ് കൈകാര്യം ചെയ്തത് ശ്രീകർ പ്രസാദ് ആയിരുന്നു.
Content Highlights: nayanthara shares memories from naanum rowdy thaan on film's ninth anniversary
