LIVE TV
സൂര്യ കേന്ദ്ര കഥാപാത്രമായെത്തുന്ന 'കങ്കുവ'യ്ക്കായി കാത്തിരിക്കുകയാണ് ആരാധകർ. സിനിമയുടേതായി ഇറങ്ങിയ ടീസറും പാട്ടുകളുമെല്ലാം സോഷ്യൽ മീഡിയയിലും ആരധകർക്കിടയിലും വലിയ ആവേശമാണ് ഉണ്ടാക്കിയത്. ഇപ്പോഴിതാ ടിക്കറ്റ് ബുക്കിങ് ആപ്പുകളിലേക്കും ആ ആവേശം പടര്‍ന്നിരിക്കുകയാണ്. ഒരു ലക്ഷത്തിലധികം
'ഇൻട്രസ്റ്റാണ്' ബുക്ക് മെെ ഷോയില്‍ ചിത്രത്തിന് ലഭിച്ചിരിക്കുന്നത്. ടിക്കറ്റ് വിൽപ്പനയിലും കങ്കുവ
മുന്നിട്ടു നിൽക്കും എന്നതിന്റെ സൂചനയാണിത്.
ശിവയുടെ സംവിധാനത്തിലെത്തുന്ന ഫാന്റസി-ആക്ഷൻ ചിത്രമാണ് കങ്കുവ. കഴിഞ്ഞ ദിവസം പുറത്തുവിട്ട കങ്കുവയിലെ യോലോ പാട്ടിലെ സൂര്യയുടെ സ്റ്റൈലിഷ് ലുക്കും ഏറെ ശ്രദ്ധ നേടിയിരുന്നു. രണ്ട് കാലഘട്ടത്തിലൂടെ കഥ പറയുന്ന ചിത്രത്തിൽ ബോബി ഡിയോളാണ് വില്ലനായെത്തുന്നത്. ദിഷ പഠാനിയാണ് നായിക. ദിഷയുടെ ആദ്യ തമിഴ്‌ ചിത്രം കൂടിയാണിത്.
നവംബർ 14 നാണ് കങ്കുവ ആഗോളതലത്തിൽ റിലീസ് ചെയ്യുന്നത്. സ്റ്റുഡിയോ ഗ്രീനിന്‍റെ ബാനറിൽ കെ ഇ ജ്ഞാനവേൽ രാജ, യു വി ക്രിയേഷൻസിന്റെ ബാനറിൽ വംശി പ്രമോദ് എന്നിവർ ചേർന്നാണ് ചിത്രം നിർമ്മിക്കുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം കേരളത്തിലെത്തിക്കുന്നത്. കേരളത്തിൽ 500 ൽ അധികം സ്‌ക്രീനുകളിലാണ് സിനിമ റിലീസ് ചെയ്യുക. അതിനൊപ്പം 100 ൽ അധികം ഫാൻസ്‌ ഷോകളും സിനിമയ്ക്ക് ഉണ്ടാകുമെന്നാണ് സൂചന.
കങ്കുവയ്ക്കുശേഷം പുറത്തിറങ്ങാനിരിക്കുന്ന സൂര്യ ചിത്രം കാർത്തിക് സുബ്ബരാജാണ് സംവിധാനം ചെയ്യുന്നത്. 'സൂര്യ 44' എന്ന് താത്കാലികമായി പേരിട്ടിരിക്കുന്ന ചിത്രത്തിന്റെ ഷൂട്ടിങ്ങ് പൂർത്തിയായിട്ടുണ്ട്. റൊമാന്റിക്ക് ആക്ഷൻ ചിത്രമായിരിക്കും 'സൂര്യ 44' എന്നാണ് കാർത്തിക് വെളിപ്പെടുത്തിയിരിക്കുന്നത്. സൂര്യയുടെ നായികയായി പൂജ ഹെഗ്‌ഡെയാണ് എത്തുന്നത്. ജയറാം, ജോജു ജോർജ്, നാസർ, പ്രകാശ് രാജ്, സുജിത് ശങ്കർ, കരുണാകരൻ തുടങ്ങി വലിയൊരു താരനിര തന്നെ ചിത്രത്തിലുണ്ട്.
Content Highlights: kanguva has received 1 lakh interest on Book My Show
