Get the latest news at
your fingertips!
Download our app now
LIVE TV
Search
2023 ൽ തമിഴ് സിനിമ കൊണ്ടാടിയ വിജയമായിരുന്നു രജനികാന്ത് ചിത്രം 'ജയിലറി'ന്റേത്. പ്രേക്ഷകരിൽ നിന്നും നിരൂപകരിൽ നിന്നും മികച്ച പ്രതികരണങ്ങൾ നേടിയ സിനിമ പല റെക്കോർഡുകൾ തകർത്താണ് മുന്നേറിയത്. സംവിധായകൻ നെൽസൺ ദിലീപ് കുമാർ ഒരു അഭിമുഖത്തിൽ പറഞ്ഞ വാക്കുകൾ ജയിലറിന് സീക്വൽ ഒരുങ്ങാനുള്ള സാധ്യതയെക്കുറിച്ച് വ്യക്തമാക്കുന്നതായിരുന്നു. ഇപ്പോഴിതാ ആരാധകർക്ക് ഏറെ ആവേശമുളവാക്കുന്ന റിപ്പോർട്ടുകളാണ് ജയിലർ 2 വിനെക്കുറിച്ച് വരുന്നത്.
രജനികാന്ത് ഇപ്പോൾ അഭിനയിക്കുന്ന കൂലി എന്ന സിനിമയുടെ ഷൂട്ടിങ് കഴിഞ്ഞാൽ ഉടൻ തന്നെ ജയിലർ 2 ആരംഭിക്കുമെന്നാണ് നെൽസൺ ദിലീപ് കുമാർ പറയുന്നത്. താൻ മറ്റൊരു സിനിമയും മനസ്സിൽ കാണുന്നില്ലെന്നും അദ്ദേഹം പറഞ്ഞു. കെ എസ് രവികുമാറുമായുള്ള അഭിമുഖത്തിലാണ് നെൽസൺ ദിലീപ് കുമാർ ജയിലർ 2 അപ്ഡേറ്റ് പങ്കുവച്ചത്.
അതേസമയം ജയിലർ 2 വിൽ ധനുഷ് ഒരു സുപ്രധാന വേഷത്തിലെത്തുമെന്നാണ് ഇന്ത്യ ഗ്ലിറ്റ്‌സ്‌ റിപ്പോർട്ട് ചെയ്യുന്നത്. രജനികാന്തുമായി ഈ വേഷം സംബന്ധിച്ച് നെൽസൺ ചർച്ചകൾ നടത്തിയെന്നും അദ്ദേഹം ധനുഷിന്റെ കഥാപാത്രത്തിന് അനുമതി നല്കിയതുമായാണ് സൂചന. ഈ കഥാപാത്രത്തിന് പുറമെ മോഹൻലാൽ, ശിവരാജ് കുമാർ തുടങ്ങിയവരും ജയിലർ 2 വിൽ ഭാഗമാകും എന്നും വാർത്തകളുണ്ട്.
2023 ലെ ഏറ്റവും വലിയ ഹിറ്റുകളിൽ ഒന്നായിരുന്നു രജനികാന്തിന്റെ ജയിലർ. വിനായകൻ, രമ്യ കൃഷ്ണൻ, വസന്ത്, സുനിൽ, തമന്ന, വി ടി വി ഗണേഷ് എന്നിവർക്കൊപ്പം മോഹൻലാലും കന്നഡ നടൻ ശിവരാജ് കുമാറും അതിഥി വേഷങ്ങളിൽ എത്തിയിരുന്നു. വിനായകൻ അവതരിപ്പിച്ച വർമൻ എന്ന വില്ലൻ വേഷത്തിന് മികച്ച നിരൂപക പ്രശംസയും പ്രേക്ഷക പ്രതികരണവും ലഭിച്ചിരുന്നു. സൺ പിക്ചേഴ്സിന്റെ ബാനറിൽ കലാനിധി മാരൻ ആയിരുന്നു ചിത്രം നിർമിച്ചത്. വിജയ് കാർത്തിക് കണ്ണൻ ഛായാഗ്രഹണം നിർവഹിച്ച ചിത്രത്തിന്റെ എഡിറ്റിങ് ആർ നിർമൽ ആയിരുന്നു.
Content Highlights: Jailer 2 to start soon after Coolie shoot completed says Nelson Dilipkumar
