Get the latest news at
your fingertips!
Download our app now
LIVE TV
Search
ഏറ്റവും കൂടുതൽ സിനിമകൾ ഇറങ്ങുന്നതും കളക്ഷൻ ലഭിക്കുന്നതുമായ സമയമാണ് ഏപ്രിൽ - മെയ് മാസത്തെ വെക്കേഷൻ സീസൺ. പല ഭാഷകളിൽ നിന്നായി സൂപ്പർതാര ചിത്രങ്ങൾ ഉൾപ്പടെ വലുതും ചെറുതുമായ നിരവധി സിനിമകളാണ് ഈ സമയത്ത് തിയേറ്ററുകളിലെത്തുന്നത്. ഈ വരുന്ന ഏപ്രിൽ മാസത്തിലും അത്തരത്തിൽ രണ്ട് സൂപ്പർതാര സിനിമകളാണ് ഏറ്റുമുട്ടാൻ തയ്യാറെടുക്കുന്നത്.
മണിരത്നം സംവിധാനം ചെയ്തു കമൽ ഹാസൻ നായകനാകുന്ന തഗ് ലൈഫും പ്രഭാസ് ചിത്രമായ ദി രാജാ സാബും ഏപ്രിൽ 10 ന് റിലീസിന് തയ്യാറെടുക്കുന്നു എന്നാണ് പുറത്തുവരുന്ന പുതിയ വിവരം. ഇരു ചിത്രങ്ങൾക്കും പ്രേക്ഷകർക്കിടയിൽ വലിയ പ്രതീക്ഷകൾ ഉള്ളതിനാൽ ആരായിരിക്കും ഏറ്റവും കൂടുതൽ കളക്ഷൻ നേടുന്നതെന്ന് കാണാൻ കാത്തിരിക്കുകയാണ് പ്രേക്ഷകർ. രാജാ സാബിന്റെ റിലീസ് തീയതി അണിയറപ്രവർത്തകർ നേരത്തെ പുറത്തുവിട്ടിരുന്നു. എന്നാൽ തഗ് ലൈഫിന്റെ റിലീസ് തീയതി ഔദ്യോഗികമായി പുറത്തുവന്നിട്ടില്ല.
നീണ്ട 37 വര്‍ഷങ്ങള്‍ക്ക് ശേഷം കമൽ ഹാസനും മണിരത്നവും ഒന്നിക്കുന്ന സിനിമയാണ് 'തഗ് ലൈഫ്'. ചിമ്പു, ജോജു ജോർജ് ,തൃഷ, അഭിരാമി, ഐശ്വര്യാ ലക്ഷ്മി, നാസർ, അശോക് സെല്‍വന്‍, അലി ഫസല്‍, പങ്കജ് ത്രിപാഠി, ജിഷു സെന്‍ഗുപ്ത, സാന്യ മല്‍ഹോത്ര, രോഹിത് ഷറഫ്, വൈയാപുരി തുടങ്ങിയവരാണ് സിനിമയിലെ മറ്റു കഥാപാത്രങ്ങളെ അവതരിപ്പിക്കുന്നത്. കമല്‍ ഹാസന്റെ രാജ്കമല്‍ ഫിലിംസിനൊപ്പം മണിരത്നത്തിന്‍റെ മദ്രാസ് ടാക്കീസും ഉദയനിധി സ്റ്റാലിന്‍റെ റെഡ് ജയന്‍റ് മൂവീസും ചേര്‍ന്നാണ് ചിത്രം നിര്‍മ്മിക്കുന്നത്.
#Thuglife v/s #TheRaajaSaab ?
— MalayalamReview (@MalayalamReview) October 25, 2024
10th April 2025 pic.twitter.com/2uZm4YgQCg
രംഗരായ ശക്തിവേല്‍ നായ്ക്കര്‍ എന്നാണ് ചിത്രത്തില്‍ കമല്‍ ഹാസന്‍ അവതരിപ്പിക്കുന്ന കഥാപാത്രത്തിന്‍റെ പേര്. മണിരത്‌നത്തിനൊപ്പം പതിവ് സഹപ്രവർത്തകരായ സംഗീതസംവിധായകൻ എ ആർ റഹ്‌മാനും എഡിറ്റർ ശ്രീകർ പ്രസാദും ഈ ചിത്രത്തിലും ഒരുമിക്കുന്നുണ്ട്. രവി കെ ചന്ദ്രന്‍ ആണ് തഗ് ലൈഫിന്റെ ഛായാഗ്രാഹകന്‍.
ഹൊറർ-കോമഡി ജോണറിൽ കഥ പറയുന്ന ചിത്രമാണ് 'ദി രാജാസാബ്'. ശൈലജ റെഡ്ഡി അല്ലുഡു, പക്കാ കൊമേഴ്സ്യൽ എന്നീ സിനിമകൾക്ക് ശേഷം മാരുതി സംവിധാനം ചെയ്യുന്ന ചിത്രമാണ് ദി രാജാസാബ്. മാരുതി തന്നെയാണ് സിനിമയുടെ രചനയും നിർവഹിച്ചിരിക്കുന്നത്. താൻ ഇതുവരെ ചെയ്തതിൽ ഏറ്റവും വലിയ പ്രോജക്ടുകളിൽ ഒന്നാണ് രാജാ സാബ് എന്ന് സംവിധായകൻ മാരുതി ഒരു അഭിമുഖത്തിൽ വ്യക്തമാക്കിയിരുന്നു. പീപ്പിള്‍ മീഡിയ ഫാക്റ്ററിയുടെ ബാനറില്‍ ടി കെ വിശ്വ പ്രസാദ് ആണ് ചിത്രത്തിന്‍റെ നിര്‍മ്മാണം. തമന്‍ എസ് ആണ് സംഗീതം. കാർത്തിക് പളനിയാണ് സിനിമയ്ക്കായി ക്യാമറ ചലിപ്പിക്കുന്നത്. തെലുങ്കിന് പുറമെ ഹിന്ദി, തമിഴ്, കന്നഡ, മലയാളം ഭാഷകളിലും ചിത്രം റിലീസ് ചെയ്യും.
Content Highlights: Prabhas movie The Raajasaab and Kamal Haasan's Thug Life to release on same date
