Get the latest news at
your fingertips!
Download our app now
LIVE TV
Search
വീഡിയോ സ്ട്രീമിങ് പ്ലാറ്റ്‌ഫോമായ നെറ്റ്ഫ്‌ളിക്‌സിനെതിരെ പ്രതിഷേധം. പലസ്തീൻ വിഷയമായി എത്തുന്ന സിനിമകൾ കൂട്ടത്തോടെ ഒഴിവാക്കിയെന്ന് ആരോപിച്ചാണ് പ്രതിഷേധം ശക്തമാകുന്നത്. പലസ്തീനും ഇസ്രായേലും വിഷയമാവുന്ന 32 ഫീച്ചർ സിനിമകളും 'പലസ്തീനിയൻ സ്റ്റോറീസ്' എന്ന വിഭാഗത്തിൽപ്പെട്ട 19 സിനിമകളുമാണ് നെറ്റ്ഫ്ളിക്സിൽ നിന്ന് പിൻവലിച്ചിരിക്കുന്നത്.
ഇതിന് പിന്നാലെ നിരവധി പേരാണ് നെറ്റ്ഫ്‌ളിക്‌സിനെതിരെ രംഗത്ത് എത്തിയിരിക്കുന്നത്. പലസ്തീൻ സിനിമകൾ എന്തുകൊണ്ടാണ് നീക്കം ചെയ്തതെന്ന് വ്യക്തമാക്കണമെന്നാവശ്യപ്പെട്ട് നെറ്റ്ഫ്‌ളിക്‌സിന് ഫ്രീഡം ഫോർവേർഡ് എന്ന സംഘടന കത്തയച്ചു. പലസ്തീൻ സാമൂഹ്യനീതി സംഘടനയായ കോഡ് പിങ്കും പ്ലാറ്റ്‌ഫോമിനെതിരെ നിലപാടെടുത്തിട്ടുണ്ട്.
പ്രതിഷേധം ശക്തമായതോടെ വിവാദങ്ങളില്‍ വിശദീകരണവുമായി നെറ്റ്ഫ്‌ളിക്‌സും എത്തി. മൂന്ന് വർഷത്തെ ലൈസൻസിംഗ് കരാറിന്‍റെ ഭാഗമായിട്ടായിരുന്നു 2021 ഒക്ടോബറിൽ പലസ്തീനിയൻ സ്റ്റോറീസ് എന്ന പ്ലേ ലിസ്റ്റിൽ സിനിമകൾ ആരംഭിച്ചത്. ലൈസൻസിന്റെ കാലാവധി കഴിഞ്ഞതോടെയാണ് സംപ്രേക്ഷണം അവസാനിപ്പിച്ചതെന്ന് നെറ്റ്ഫ്ളിക്സ് പറഞ്ഞു. ഹോളിവുഡ് റിപ്പോർട്ടർ അടക്കമുള്ള മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്.
അതേസമയം എന്തുകൊണ്ടാണ് സിനിമകളുടെ ലൈസൻസ് പുതുക്കാനുള്ള തീരുമാനം എടുക്കാതിരുന്നതെന്നാണ് പ്രതിഷേധക്കാരുടെ ചോദ്യം. നെറ്റ്ഫ്‌ളിക്‌സിന്റെ തീരുമാനം പുനപരിശോധിക്കാൻ ഫ്രീഡം ഫോർവേഡിന്റെ നേതൃത്വത്തിലുള്ള മനുഷ്യാവകാശ ഗ്രൂപ്പുകളുടെ ഒരു കൂട്ടായ്മ നെറ്റ്ഫ്‌ളിക്‌സിനോട് ആവശ്യപ്പെട്ടു.
'പലസ്തീനികളുടെയോ അല്ലെങ്കിൽ അവരെ കുറിച്ചുള്ളതോ ആയ എല്ലാ സിനിമകളും പുനഃസ്ഥാപിക്കാൻ ഞങ്ങൾ നിങ്ങളോട് അഭ്യർത്ഥിക്കുന്നു. ഗാസയിലെ രണ്ട് ദശലക്ഷത്തിലധികം പലസ്തീനികൾ ഇസ്രായേൽ സൈന്യത്തിന്റെ വംശഹത്യയ്ക്ക് വിധേയരാകുമ്പോൾ, നെറ്റ്ഫ്ളിക്സ് പോലൊരു സ്ഥാപനം പലസ്തീൻ സിനിമകളുടെ മുഴുവൻ ലൈബ്രറിയും ഇല്ലാതാക്കുന്നത് പലസ്തീനികളുടെ ശബ്ദങ്ങളെ കൂടുതൽ പാർശ്വവത്കരിക്കുമെന്നതിൽ തങ്ങൾ ആശങ്കാകുലരാണെന്ന്' ഫ്രീഡം ഫോർവേർഡ് ചെയർമാനും കോ-സിഇഒമാരായ ഗ്രെഗ് പീറ്റേഴ്സും ടെഡ് സരൻഡോസും അയച്ച കത്തിൽ പറഞ്ഞു.
300 ബില്ല്യൺ ഡോളറിന്റെ ആസ്തിയുള്ള നെറ്റ്ഫ്ളിക്സ് എന്തുകൊണ്ടാണ് ലൈസൻസിംഗ് കരാർ പുതുക്കാത്തതെന്ന് ഫ്രീഡം ഫോർവേഡിന്റെ എക്‌സിക്യൂട്ടീവ് ഡയറക്ടർ സുഞ്ജീവ് ബെറി ചോദിച്ചു.
അതേസമയം, നെറ്റ്ഫ്ളിക്സിൽ പലസ്തീനിയൻ സ്റ്റോറീസ് എന്ന പ്ലേ ലിസ്റ്റിൽ നിലവിൽ ഒരു ഡോക്യുമെന്ററിയും ഒരു ഫീച്ചർ ചിത്രവുമാണ് കാണിക്കുന്നത്. ലിന അൽ ആബേദിന്റെ 2019-ലെ ഡോക്യുമെന്ററി ഇബ്രാഹിം എ ഫേറ്റ് ടു ഡിഫൈൻ, പലസ്തീനിയൻ സംവിധായകൻ അമീൻ നെയ്‌ഫെയുടെ ആദ്യ ഫീച്ചർ ചിത്രം 200 മീറ്റര്‍ എന്നിവയാണവ.
Content Highlights: Netflix Stop Streaming Palestinian Stories Movies
