Get the latest news at
your fingertips!
Download our app now
LIVE TV
Search
ബോളിവുഡിൽ ഏറെ ആരാധകരുള്ള ഫ്രാഞ്ചൈസികളിൽ ഒന്നാണ് രോഹിത് ഷെട്ടിയുടെ കോപ്പ് യൂണിവേഴ്‌സ്. ഈ യൂണിവേഴ്സിലെ ഏറ്റവും പുതിയ ചിത്രമായ 'സിങ്കം എഗെയ്നി'ൽ സൽമാൻ ഖാൻ കാമിയോ വേഷത്തിലെത്തുമെന്ന വാർത്തകൾ ആരാധകർക്കിടയിൽ ഏറെ ആവേശമാണുണ്ടാക്കുന്നത്. ഒരു വമ്പൻ താരനിര തന്നെ ഭാഗമാകുന്ന സിനിമയിൽ സൽമാന്റെ സ്ക്രീൻ സമയം എത്രയുണ്ടാകും എന്നത് സംബന്ധിച്ചുള്ള റിപ്പോർട്ടുകളാണ് ശ്രദ്ധ നേടുന്നത്.
ദബാംഗ് എന്ന ചിത്രത്തിലെ ചുൽബുൽ പാണ്ഡെ എന്ന ഹിറ്റ് കഥാപാത്രമായാണ് സൽമാൻ സിനിമയിലെത്തുന്നത്. ഈ കഥാപാത്രത്തിന് രണ്ട് മിനിറ്റ് സ്ക്രീൻ സമയമായിരിക്കും സിനിമയിൽ ലഭിക്കുക എന്നാണ് ബോളിവുഡ് ഹംഗാമ റിപ്പോർട്ട് ചെയ്യുന്നത്. സിനിമയിലെ നിർണ്ണായക സീനിലായിരിക്കും കഥാപാത്രം വരിക എന്നും സല്ലുവിന് വമ്പൻ ഇൻട്രോയാണ് സംവിധായകൻ ഒരുക്കിവെച്ചിരിക്കുന്നത് എന്നുമാണ് സൂചന.സിങ്കം എഗെയ്നിൽ ചെറിയ വേഷത്തിലെത്തുന്ന ചുൽബുൽ പാണ്ഡെ കോപ്പ് യൂണിവേഴ്സിലെ അടുത്ത സിനിമകളിൽ പ്രധാന വേഷത്തിലെത്തുമെന്നും സൂചനകളുണ്ട്.
അതേസമയം, ദീപാവലി റിലീസായി സിങ്കം എഗെയ്ൻ നവംബർ ഒന്നിന് തിയേറ്ററുകളിലെത്തും. കോപ്പ് യൂണിവേഴ്സിലെ ഏറ്റവും വലിയ ചിത്രമായി ആണ് സിങ്കം എഗെയ്ൻ ഒരുങ്ങുന്നത്. ചിത്രത്തിൽ പ്രധാന വേഷത്തിൽ ബാജിറാവോ സിങ്കം എന്ന കഥാപാത്രമായി അജയ് ദേവ്ഗൺ ആണ് എത്തുന്നത്.
അദ്ദേഹത്തിനൊപ്പം കരീന കപൂർ, അക്ഷയ് കുമാർ, രൺവീർ സിംഗ്, ദീപിക പദുക്കോൺ, ടൈഗർ ഷ്റോഫ്, അർജുൻ കപൂർ, ജാക്കി ഷ്റോഫ് തുടങ്ങിയ ബോളിവുഡ് താരങ്ങളും സിനിമയുടെ ഭാഗമാകുന്നുണ്ട്. ചിത്രത്തിൻ്റെ ഡിജിറ്റൽ സ്ട്രീമിംങ് അവകാശം 130 കോടി രൂപയ്ക്ക് ആമസോൺ പ്രൈം വീഡിയോ സ്വന്തമാക്കിയിട്ടുണ്ട്.
Content Highlights: Reports about duration and other deets of Salman Khan's cameo in Singham Again
