Get the latest news at
your fingertips!
Download our app now
LIVE TV
Search
'വെനം', 'വെനം 2 : ലെറ്റ് ദേർ ബി കാർണേജ്' എന്നീ ചിത്രങ്ങൾക്ക് ശേഷം പുറത്തിറങ്ങിയ വെനം സീരിസിലെ മൂന്നാമത്തെ ചിത്രമാണ് 'വെനം 3 ദി ലാസ്റ്റ് ഡാൻസ്'. സോണിയുടെ സ്‌പൈഡർമാൻ സീരിസില്‍ വെനം എന്ന കഥാപാത്രം വരുന്ന അഞ്ചാമത്തെ ചിത്രം കൂടിയാണിത്. ഈ മാസം 24 ന് പുറത്തിറങ്ങിയ സിനിമയുടെ ആദ്യവാര ഇന്ത്യൻ ബോക്സ്ഓഫീസ് കളക്ഷനാണ് ഇപ്പോൾ പുറത്തുവന്നിരിക്കുന്നത്.
വെനം 3 ഇതുവരെ ഇന്ത്യൻ ബോക്സ്ഓഫീസിൽ നിന്ന് 30.50 കോടിയാണ് നേടിയിരിക്കുന്നത്. ഇതിൽ 60 ശതമാനത്തോളവും ഹിന്ദി, തമിഴ്, തെലുങ്ക് പതിപ്പുകളിൽ നിന്നാണ് നേടിയിരിക്കുന്നത്. ഇംഗ്ലീഷ് പതിപ്പിനേക്കാൾ ഹിന്ദി പതിപ്പിനാണ് കളക്ഷൻ കൂടുതൽ എന്നതും ശ്രദ്ധേയമാണ്. ഇതോടെ ഇന്ത്യൻ ബോക്സ്ഓഫീസിൽ നിന്ന് ഏറ്റവുമധികം പണം വാരുന്ന വെനം ഫ്രാഞ്ചൈസിയിലെ ചിത്രമായി വെനം 3 മാറിയിരിക്കുകയാണ്.
വെനം ട്രിലജിയുടെ അവസാന ചിത്രമാണ് വെനം ദി ലാസ്റ്റ് ഡാൻസ്. 2018 ലായിരുന്നു വെനത്തിന്റെ ആദ്യ ചിത്രം റിലീസ് ചെയ്തത്. 2021 ലാണ് രണ്ടാം ഭാഗം തിയേറ്ററുകളിലെത്തിയത്. ഇരുഭാഗങ്ങളും ചേർന്ന് ആഗോളതലത്തിൽ 1.3 ബില്യൺ ഡോളറാണ് നേടിയത്.
ടോം ഹാർഡി നായകനാകുന്ന ചിത്രത്തിൽ ചിവെറ്റെൽ എജിയോഫോർ, ജൂനോ ടെമ്പിൾ, റൈസ് ഇഫാൻസ്, പെഗ്ഗി ലു, അലന്ന ഉബാച്ച്, സ്റ്റീഫൻ ഗ്രഹാം തുടങ്ങിയവർ മറ്റു പ്രധാന കഥാപാത്രങ്ങളെ അവതരിപ്പിക്കുന്നു. ഹാർഡിയുടെയും മാർസെലിൻ്റെയും കഥയെ അടിസ്ഥാനമാക്കി കെല്ലി മാർസെലിന്‍റെ തിരക്കഥയിലാണ് ചിത്രം ഒരുങ്ങിയത്. അവി അരാദ്, മാറ്റ് ടോൾമാച്ച്, ആമി പാസ്കൽ, കെല്ലി മാർസൽ, ടോം ഹാർഡി, ഹച്ച് പാർക്കർ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്.
Content Highlights: Venom 3 Opening Weekend Box Office in India
