Get the latest news at
your fingertips!
Download our app now
LIVE TV
Search
രോഹിത്ത് ഷെട്ടിയുടെ കോപ്പ് യൂണിവേഴ്സിലെ പുതിയ ചിത്രം സിങ്കം എഗെയ്ൻ റിലീസിന് ഒരുങ്ങുകയാണ്. വലിയ താരനിര തന്നെ ഭാഗമാകുന്ന സിനിമയുടെ റൺടൈം ഇപ്പോൾ പുറത്തുവന്നിരിക്കുകയാണ്. 144 മിനിറ്റ്, അതായത് രണ്ട് മണിക്കൂർ 24 മിനിറ്റായിരിക്കും സിനിമയുടെ ദൈർഘ്യം. ആക്ഷൻ പശ്ചാത്തലത്തിൽ ഒരുങ്ങുന്ന സിനിമയ്ക്ക് യു/എ സർട്ടിഫിക്കറ്റാണ് ലഭിച്ചിരിക്കുന്നത്.
നേരത്തെ റിലീസ് ചെയ്ത സിനിമയുടെ ട്രെയിലറിന് സോഷ്യൽമീഡിയയിൽ വ്യാപകമായി ട്രോളുകൾ നേരിടേണ്ടി വന്നിരുന്നു. ട്രെയിലറിന്റെ ദൈർഘ്യം തന്നെയാണ് വിമർശനത്തിന് പ്രധാന കാരണം. അഞ്ച് മിനിറ്റോളമുളള ട്രെയിലറിൽ സിനിമയുടെ കഥ മുഴുവൻ പറയുന്നുണ്ട് എന്നാണ് പലരും അഭിപ്രായപ്പെട്ടത്. എന്നാൽ ആദ്യ 4 മണിക്കൂറിൽ 51. 95 മില്യൺ കാഴ്ചക്കാരെ സ്വന്തമാക്കി, ഏറ്റവും കൂടുതൽ കാഴ്ചക്കാരെ സ്വന്തമാക്കിയ 10 ഇന്ത്യൻ ട്രെയിലറുകളുടെ പട്ടികയിൽ ട്രെയിലർ ഇടം നേടിയിരുന്നു.
അജയ് ദേവ്ഗണിനൊപ്പം കരീന കപൂർ, അക്ഷയ് കുമാർ, രൺവീർ സിംഗ്, ദീപിക പദുക്കോൺ, ടൈഗർ ഷ്റോഫ്, അർജുൻ കപൂർ, ജാക്കി ഷ്റോഫ് തുടങ്ങിയവർ ഒന്നിക്കുന്ന ചിത്രമാണ് സിങ്കം എഗെയ്ൻ. സിങ്കം, സിങ്കം റിട്ടേൺസ്, സൂര്യവംശി, സിംബാ എന്നീ ചിത്രങ്ങളാണ് ഇതുവരെ ഈ യൂണിവേഴ്സിന്റെ ഭാഗമായി പുറത്തുവന്ന സിനിമകൾ. ഇതിൽ സൂര്യവംശിയുടെ തുടർച്ചയായിട്ടാണ് സിങ്കം എഗെയ്ൻ എത്തുന്നത്. ചിത്രത്തിൽ പ്രധാന വേഷത്തിൽ ബാജിറാവോ സിങ്കം എന്ന കഥാപാത്രമായി അജയ് ദേവ്ഗൺ ആണ് എത്തുന്നത്. സിനിമയില്‍ ദബാംഗ് എന്ന ചിത്രത്തിലെ ചുൽബുൽ പാണ്ഡെ എന്ന ഹിറ്റ് കഥാപാത്രമായി സൽമാൻ ഖാൻ കാമിയോ റോളിലെത്തുമെന്നും സൂചനകളുണ്ട്.
അതേസമയം, ദീപാവലി റിലീസായി സിങ്കം എഗെയ്ൻ നവംബർ ഒന്നിന് തിയേറ്ററുകളിലെത്തും. കോപ്പ് യൂണിവേഴ്സിലെ ഏറ്റവും വലിയ ചിത്രമായാണ് സിങ്കം എഗെയ്ൻ ഒരുങ്ങുന്നത്. ചിത്രത്തിൻ്റെ ഡിജിറ്റൽ സ്ട്രീമിംങ് അവകാശം 130 കോടി രൂപയ്ക്ക് ആമസോൺ പ്രൈം വീഡിയോ സ്വന്തമാക്കിയിട്ടുണ്ട്.
Content Highlights: Singham Again Runtime out
