Get the latest news at
your fingertips!
Download our app now
LIVE TV
Search
പണി സിനിമയിലെ സാഗർ സൂര്യ അവതരിപ്പിച്ച ഡോൺ എന്ന കഥാപാത്രത്തിന് മികച്ച അഭിപ്രായമാണ് ലഭിക്കുന്നത്. സമീപകാലത്തൊന്നും ഇത്രയും ക്രൂരന്മാരായ വില്ലന്മാരെ കണ്ടിട്ടില്ലെന്നാണ് പ്രേക്ഷകർ പറയുന്നത്. സാഗർ സൂര്യയിലെ നടനെ കുറിച്ച് വർഷങ്ങൾക്ക് മുമ്പ് നടൻ പൃഥ്വിരാജ് പറഞ്ഞ വാക്കുകളാണ് ഇപ്പോൾ വൈറലാവുന്നത്. പൃഥ്വിരാജ് അഭിനയിച്ച 'കുരുതി' സിനിമയിലൂടെയാണ് സാഗർ സൂര്യ സിനിമാ രംഗത്ത് ശ്രദ്ധേയനായത്. ഈ ചിത്രത്തിലെ അഭിനയം കണ്ട് ഇഷ്ടമായ പൃഥ്വരാജ് തന്റെ തൊട്ടടുത്ത ചിത്രമായ കാപ്പയിലേക്കും സാഗർ സൂര്യയെ നിർദ്ദേശിച്ചിരുന്നു.
വർഷങ്ങൾക്ക് മുമ്പ് ഒരു ദേശീയ മാധ്യമത്തിന് നൽകിയ അഭിമുഖത്തിൽ മലയാള സിനിമയിലെ ഭാവി വാഗ്ദാനങ്ങളെ കുറിച്ചുള്ള ചോദ്യത്തിന് സാഗർ സൂര്യയുടെയും നസ്‌ലെന്റെയും പേരുകളായിരുന്നു പൃഥ്വിരാജ് പറഞ്ഞത്. രണ്ടു പേരും അതിഗംഭീര നടന്മാരാണെന്നും ഇവരിൽ തനിക്ക് ഏറെ പ്രതീക്ഷയുണ്ടെന്നും പൃഥ്വിരാജ് പറഞ്ഞിരുന്നു.
പല സമയങ്ങളിലും തളർന്നു പോകുമ്പോൾ പൃഥ്വി പറഞ്ഞ ഈ വാക്കുകൾ താൻ വീണ്ടും വീണ്ടും എടുത്തുകാണുമെന്നും അത് തനിക്ക് പ്രചോദനമാവാറുണ്ടെന്നും സാഗർ റിപ്പോർട്ടർ ടിവിയോട് പറഞ്ഞിരുന്നു. പലപ്പോഴും തളർന്നുപോകുമ്പോൾ ഈ വീഡിയോ വീണ്ടും വീണ്ടും കാണുമെന്നും തനിക്ക് ഏന്തെങ്കിലും ഒക്കെ കഴിവുണ്ടായിരിക്കുമല്ലേ, അതുകൊണ്ടല്ലേ അദ്ദേഹം ഇങ്ങനെ പറഞ്ഞതെന്ന് ചിന്തിക്കുമെന്നുമായിരുന്നു സാഗർ സൂര്യ പറഞ്ഞത്.
കുരുതിക്ക് ശേഷം കാപ്പ എന്ന ചിത്രത്തിലേക്ക് തന്നെ വിളിച്ചതും പൃഥ്വിരാജ് പറഞ്ഞിട്ടാണെന്നും 'കുരുതിയിൽ തന്നെ കൊല്ലാൻ പറ്റിയില്ല, അതുകൊണ്ട് കാപ്പയിൽ തീർക്കാമെന്ന് കരുതിയെന്നുമായിരുന്നു' പൃഥ്വി ഇതിനെ കുറിച്ച് പറഞ്ഞതെന്നും സാഗർ റിപ്പോർട്ടറുമായുള്ള അഭിമുഖത്തിൽ മനസ് തുറക്കുന്നുണ്ട്.
ഒക്ടോബർ 24 നാണ് ജോജു ജോർജ് സംവിധാനം ചെയ്ത പണി തിയേറ്ററുകളിൽ എത്തിയത്. ജോജു തന്നെയാണ് ചിത്രത്തിന്റെ തിരക്കഥയൊരുക്കിയിരിക്കുന്നത്. ജോജുവിൻറെ തന്നെ അപ്പു പാത്തു പപ്പു പ്രൊഡക്ഷൻസിന്റെയും, എ ഡി സ്റ്റുഡിയോസിന്റെ ബാനറിൽ എം റിയാസ് ആദം, സിജോ വടക്കൻ എന്നിവരും, ശ്രീ ഗോകുലം മൂവീസിൻറെ ബാനറിൽ ഗോകുലം ഗോപാലനും ചേർന്നാണ് ചിത്രത്തിന്റെ നിർമാണം. വിഷ്ണു വിജയ്, സാം സി എസ് എന്നിവരാണ് ചിത്രത്തിന്റെ സംഗീതം.
Content Highlights: Actor PrithviRaj Old interview Clip about Pani Movie Actor Sagar Surya
