Get the latest news at
your fingertips!
Download our app now
LIVE TV
Search
'ടാക്സിവാല' എന്ന സൂപ്പർഹിറ്റ് സിനിമക്ക് ശേഷം രാഹുൽ സംകൃത്യനും വിജയ് ദേവരകൊണ്ടയും വീണ്ടുമൊരു ചിത്രത്തിനായി ഒന്നിക്കുകയാണ്. വിഡി 14 എന്ന് താല്‍ക്കാലികമായി പേരിട്ടിരിക്കുന്ന ചിത്രം വലിയ ബഡ്ജറ്റിൽ പിരീഡ് ആക്ഷൻ ഡ്രാമയായാണ് ഒരുങ്ങുന്നത്. സിനിമയിലെ പുതിയ കാസ്റ്റിംഗ് ആണ് ഇപ്പോള്‍ സോഷ്യൽ മീഡിയയിൽ ചർച്ചാവിഷയമാകുന്നത്. 'ദി മമ്മി', 'ദി മമ്മി റിട്ടേൺസ്' തുടങ്ങിയ സിനിമകളിൽ പ്രതിനായകനായി എത്തി ലോക സിനിമ പ്രേമികളുടെ ഇഷ്ടം പിടിച്ചുപറ്റിയ നടനാണ് അർനോൾഡ് വോസ്ലൂ. 'വിഡി 14' ൽ അർനോൾഡ് വോസ്ലൂവും ഒരു പ്രധാന വേഷത്തിൽ എത്തുമെന്നാണ് പുതിയ റിപ്പോർട്ട്.
ചിത്രത്തിലെ അർനോൾഡ് വോസ്ലൂവിന്റെ സാന്നിധ്യം നിർമാതാക്കൾ ഔദ്യോഗികമായി സ്ഥിരീകരിച്ചിട്ടില്ല. നേരത്തെ 'ലൈഗർ' എന്ന വിജയ് ദേവരകൊണ്ട ചിത്രത്തിൽ മൈക്ക് ടൈസൺ അതിഥി വേഷത്തിൽ എത്തിയിരുന്നു. ഇതു കൂടി കണക്കിലെടുത്താണ് വോസ്ലൂവിന്റെ സാന്നിധ്യമുണ്ടായേക്കാം എന്ന് ആരാധകര്‍ പ്രതീക്ഷ വെക്കുന്നത്.
'പുഷ്പ', 'ജനത ഗാരേജ്', 'രംഗസ്ഥലം' തുടങ്ങിയ സിനിമകൾ നിർമിച്ച മൈത്രി മൂവി മേക്കേഴ്‌സ് ആണ് ഈ ചിത്രം നിർമിക്കുന്നത്. 2025 ൽ ചിത്രത്തിന്റെ ഷൂട്ടിംഗ് ആരംഭിക്കും.
നാനി, സായ് പല്ലവി, കൃതി ഷെട്ടി എന്നിവരെ കേന്ദ്ര കഥാപാത്രങ്ങളാക്കി ഒരുങ്ങിയ പീരീഡ് റൊമാന്റിക് ത്രില്ലർ ചിത്രം ആയ 'ശ്യാം സിംഘാ റോയ്' ആയിരുന്നു രാഹുൽ സംകൃത്യന്റെ അവസാനമായി പുറത്തിറങ്ങിയ സിനിമ. മികച്ച പ്രേക്ഷക പ്രതികരണം നേടിയ ചിത്രം ബോക്സ് ഓഫീസിലും വലിയ വിജയം നേടിയിരുന്നു. 'ജേഴ്സി' എന്ന സിനിമക്ക് ശേഷം ഗൗതം തിന്നനൂരി സംവിധാനം ചെയ്യുന്ന ആക്ഷൻ ചിത്രമായ 'വിഡി 12' ലാണ് ഇപ്പോൾ വിജയ് ദേവരകൊണ്ട അഭിനയിക്കുന്നത്. ചിത്രത്തിന്റെ ഷൂട്ടിംഗ് പുരോഗമിക്കുകയാണ്. അനിരുദ്ധ് രവിചന്ദർ ആണ് ചിത്രത്തിനായി സംഗീതം ഒരുക്കുന്നത്. ചിത്രം 2025 ൽ തിയേറ്ററിലെത്തും.
Content Highlights: The mummy actor to play an important role in an upcoming Vijay Deverakonda film
