Get the latest news at
your fingertips!
Download our app now
LIVE TV
Search
ദുൽഖർ സൽമാൻ നായകനായെത്തിയ ലക്കി ഭാസ്കർ മികച്ച പ്രതികരണങ്ങളോടെ തിയേറ്ററുകളിൽ പ്രദർശനം തുടരുകയാണ്. വെങ്കി അറ്റ്‌ലൂരിയുടെ സംവിധാനത്തിൽ പുറത്തിറങ്ങിയ സിനിമയെ പ്രശംസിച്ച് നടൻ ചിരഞ്ജീവിയും എത്തിയിട്ടുണ്ട്. ചിത്രം കണ്ടതിനു ശേഷം അദ്ദേഹം അഭിനന്ദിച്ച വിവരം സംവിധായകന്‍ തന്നെയാണ് തന്റെ സോഷ്യല്‍ മീഡിയ ഹാന്‍ഡിലുകളിലൂടെ പങ്കുവെച്ചത്.
'സിനിമ കണ്ട് വിളിച്ച് അഭിനന്ദിച്ചതിന് മെഗാസ്റ്റാർ ചിരഞ്ജീവി സാറിനോട് വളരെയധികം നന്ദിയുണ്ട്. താങ്കളുടെ സിനിമകളുടെ ഫാൻ ഷോയ്ക്ക് കയറിയിരുന്ന ഫാൻ ബോയ് ആയിരുന്നു ഞാൻ. ആ എന്റെ സിനിമ കണ്ട് നിങ്ങൾ വിളിച്ചതിന് നന്ദിയുണ്ട്. സിനിമയോടുള്ള നിങ്ങളുടെ സ്നേഹവും താല്പര്യവും ഞങ്ങൾക്ക് പ്രചോദനമാണ്' വെങ്കി അറ്റ്‌ലൂരി പറഞ്ഞു.
കേരളത്തിലും തമിഴ്നാട്ടിലുമല്ലാം ലക്കി ഭാസ്കറിന് വലിയ വരവേൽപ്പാണ് ലഭിക്കുന്നത്. അമരൻ, ബ്ലഡി ബെഗ്ഗർ തുടങ്ങിയ സിനിമകൾക്കൊപ്പം റിലീസ് ചെയ്തിട്ടും മികച്ച കളക്ഷന്‍ സിനിമക്ക് ലഭിക്കുന്നുണ്ട്.10 ദിവസം കൊണ്ട് 88 കോടി ആഗോള ഗ്രോസ് നേടിയ ചിത്രം ദീപാവലി മെഗാ ബ്ലോക്ക്ബസ്റ്ററായി കുതിപ്പ് തുടരുകയാണ്. ദുൽഖർ സൽമാന്റെ തിരിച്ചു വരവ് കൂടിയാണ് ചിത്രമെന്നാണ് ആരാധകരുടെയും അഭിപ്രായം.
മീനാക്ഷി ചൗധരി ആണ് ചിത്രത്തിൽ നായിക. ദേശീയ അവാർഡ് ജേതാവായ സംഗീത സംവിധായകൻ ജി വി പ്രകാശ് കുമാറാണ് ലക്കി ഭാസ്കറിന് സംഗീതം പകര്‍ന്നിരിക്കുന്നത്. 1980-1990 കാലഘട്ടത്തിലെ കഥയാണ് 'ലക്കി ഭാസ്കർ' പറയുന്നത്. ബാങ്ക് ഉദ്യോഗസ്ഥനായ ഭാസ്കർ കുമാർ ആയിട്ടാണ് ദുൽഖർ എത്തുന്നത്. സിതാര എന്റർടെയിൻമെന്റ്‌സിന്റെ ബാനറിൽ സൂര്യദേവര നാഗ വംശിയും ഫോർച്യൂണ്‍ ഫോർ സിനിമാസിന്റെ ബാനറിൽ സായ് സൗജന്യയും ചേർന്ന് നിർമ്മിക്കുന്ന ചിത്രം ശ്രീകര സ്റ്റുഡിയോസാണ് അവതരിപ്പിക്കുന്നത്.
Content Highlights: Chiranjeevi congratulates Lucky Bhaskar
