Get the latest news at
your fingertips!
Download our app now
LIVE TV
Search
എഐ സാങ്കേതിക വിദ്യയുടെ സഹായത്തോടെ സിനിമാതാരങ്ങളുടെ വീഡിയോകൾ ഒരുക്കുന്നത് സമൂഹ മാധ്യമങ്ങളിൽ വൈറലാകാറുണ്ട്. അത്തരത്തിൽ മോഹൻലാലിനെയും മമ്മൂട്ടിയെയുമെല്ലാം അങ്ങ് ഹോളിവുഡിൽ എത്തിച്ച വീഡിയോകൾ വരെ പുറത്തിറങ്ങിയിരുന്നു. ഇക്കുറി മലയാളത്തിന്റെ ഇതിഹാസ നടൻ ജയന്റെ ഊഴമാണ് എത്തിയിരിക്കുന്നത്. എന്നാൽ ഹോളിവുഡിലല്ല, മറിച്ച് എഐ സാങ്കേതിക വിദ്യയുടെ സഹായത്തോടെ 'ലൂസിഫർ’ സിനിമയിലെ അബ്രാം ഖുറേഷിയായാണ് അദ്ദേഹത്തെ മാറ്റിയത്. മള്‍ടിവേഴ്സ് മാട്രിക്സ് എന്ന പേജിലൂടെയാണ് ഈ വീഡിയോ പുറത്തിറങ്ങിയിരിക്കുന്നത്.
ലൂസിഫറിന്റെ അവസാന ഭാഗത്ത് ഹെലികോപ്റ്ററിൽ കിടിലൻ ബിജിഎമ്മിന്റെ പിന്തുണയോടെ വന്നിറങ്ങുന്ന അബ്രാം ഖുറേഷിക്ക് ജയന്റെ മുഖമാണ്. അതുകൊണ്ടും തീരുന്നില്ല, ജയനൊപ്പം ഹോളിവുഡ് സൂപ്പർതാരം ടോം ക്രൂസിനെയും വീഡിയോയിൽ കാണാം. ‘കോളിളക്കം 2’ എന്നാണ് വീഡിയോയ്ക്ക് നൽകിയിരിക്കുന്ന പേര്.
നിരവധിപ്പേർ ഈ വീഡിയോ സോഷ്യൽ മീഡിയയിലൂടെ പങ്കുവെക്കുന്നുണ്ട്. ജയനെ അബ്രാം ഖുറേഷിയായി കണ്ടതിന്റെ സന്തോഷം ചിലർ പങ്കുവച്ചപ്പോൾ സാഹസികതകൾക്ക് പേരുകേട്ട ജയനെയും ടോം ക്രൂസിനെയും ഒന്നിച്ച് കണ്ടതിന്റെ ആവേശത്തിലാണ് മറ്റുചിലർ. ഈ എഐ ക്രിയേറ്ററെ എത്ര അഭിനന്ദിച്ചാലും മതിയാകില്ല എന്നാണ് മറ്റൊരു പ്രേക്ഷകന്റെ കമന്റ്. നടൻ ബൈജു സന്തോഷും ഈ വീഡിയോ പങ്കുവെച്ചിട്ടുണ്ട്. 'എന്റെ എക്കാലത്തെയും പ്രിയപ്പെട്ട നടൻ’ ഇപ്പോഴും ജീവിച്ചിരിക്കുന്നു,'എന്ന ക്യാപ്ഷ്യനോടെയാണ് ബൈജു വീഡിയോ പങ്കുവെച്ചിരിക്കുന്നത്.
കോളിളക്കം എന്ന ചിത്രത്തിന്‍റെ ക്ലെെമാക്സ് രംഗം ചിത്രീകരിക്കുന്നതിനിടെയായിരുന്നു ജയന്‍ അപകടത്തില്‍ മരിച്ചത്. ഹെലികോപ്ടറിലുള്ള സംഘട്ടനരംഗത്തിന്‍റെ ഷൂട്ടിങ്ങിനിടെയായിരുന്നു ഇത്. കോളിളക്കം 2 എന്ന വീഡിയോക്ക് ഇത്തരത്തില്‍ ജയന്‍ ഓര്‍മകളും ആരാധകര്‍ പങ്കുവെക്കുന്നുണ്ട്.
Content Highlights: Jayan AI video as Abraam Khureshi gone viral
