Get the latest news at
your fingertips!
Download our app now
LIVE TV
Search
വാഴ എന്ന ചിത്രത്തിന്റെ വിജയത്തിന് പിന്നാലെ പുതിയ സിനിമയുടെ നിര്‍മാണത്തിലേക്ക് കടന്ന് സംവിധായകന്‍ വിപിന്‍ ദാസ്. WBTS എന്ന ബാനറിലെ രണ്ടാം ചിത്രത്തിന്റെ ടൈറ്റില്‍ പോസ്റ്റര്‍ വിപിന്‍ ദാസ് പങ്കുവെച്ചു. 'വ്യസനസമേതം ബന്ധുമിത്രാദികള്‍' എന്നാണ് ചിത്രത്തിന്റെ പേര്. സിനിമയുടെ ചിത്രീകരണം ഇന്ന് ആരംഭിച്ചതായും വിപിന്‍ ദാസ് സമൂഹമാധ്യമങ്ങളില്‍ പങ്കുവെച്ച കുറിപ്പില്‍ അറിയിച്ചു.
തെലുങ്കിലെ പ്രധാന നിര്‍മാതാക്കളായ ഷെെന്‍ സ്‌ക്രീന്‍ സിനിമയും ചിത്രത്തിന്റെ നിര്‍മാണത്തില്‍ പങ്കാളിയാകുന്നുണ്ട്. ഭഗവന്ത് കേസരി, ടക്ക് ജഗദീഷ്, മജിലി, കൃഷ്ണാര്‍ജുന യുദ്ധം, ഉഗ്രം തുടങ്ങിയ സിനിമകളുടെ നിര്‍മാതാക്കളാണ് ഷെെന്‍ സ്‌ക്രീന്‍ സിനിമ.
നവാഗതനായ വിപിന്‍ എസ് ആണ് 'വ്യസനസമേതം ബന്ധുമിത്രാദികള്‍' തിരക്കഥയൊരുക്കി സംവിധാനം ചെയ്യുന്നത്. റഹീം അബൂബക്കറെന്ന പുതിയ ഛായാഗ്രാഹകനെയും ചിത്രം അവതരിപ്പിക്കുന്നുണ്ട്.
സിജു സണ്ണി, അനശ്വര രാജന്‍, അസീസ് നെടുമങ്ങാട്, ജോമോന്‍ ജ്യോതിര്‍, മല്ലിക സുകുമാരന്‍, ബൈജു സന്തോഷ്, നോബി മാര്‍ക്കോസ് തുടങ്ങിയവരാണ് ചിത്രത്തില്‍ പ്രധാന വേഷങ്ങളിലെത്തുന്നത്. സിജു സണ്ണിയും അനശ്വര രാജനുമാണ് കേന്ദ്ര കഥാപാത്രങ്ങളെ അവതരിപ്പിക്കുക എന്നാണ് കരുതപ്പെടുന്നത്.
'ഞങ്ങള്‍ ഒന്നിക്കുന്നു. വിധിയെ തടുക്കാന്‍ ആര്‍ക്കും കഴിയില്ല. മുഹൂര്‍ത്തം 11:00am… മുന്നോട്ട് ഉള്ള യാത്രയില്‍ കൂടെ ഉണ്ടാകണം' എന്ന് അനശ്വര രാജനൊപ്പമുള്ള ഫോട്ടോ പങ്കുവെച്ചുകൊണ്ട് സിജു സണ്ണി ഇന്‍സ്റ്റഗ്രാമില്‍ കുറിച്ചിരുന്നു.
അതേസമയം, വാഴ 2, പൃഥ്വിരാജിനൊപ്പമുള്ള സന്തോഷ് ട്രോഫി, എന്നിവയാണ് വിപിന്‍ ദാസ് പ്രഖ്യാപിച്ചിട്ടുള്ള മറ്റ് ചിത്രങ്ങള്‍. സന്തോഷ് ട്രോഫി വിപിന്‍ ദാസും വാഴയുടെ രണ്ടാം ഭാഗം സവിന്‍ എസ്.എയുമാണ് സംവിധാനം ചെയ്യുന്നത്. ചിത്രത്തിന് തിരക്കഥയൊരുക്കുന്ന വിപിന്‍ ദാസ് വാഴ 2വിന്റെ നിര്‍മാണത്തിലും പങ്കാളിയാണ്.
Content Highlights : Vipin Das announces new movie starring Anaswara Rajan and Siju Sunny
