Get the latest news at
your fingertips!
Download our app now
LIVE TV
Search
രാംചരണിനെ നായകനാക്കി ഷങ്കർ സംവിധാനം ചെയ്യുന്ന പൊളിറ്റിക്കൽ ആക്ഷൻ ത്രില്ലർ ചിത്രമാണ് 'ഗെയിം ചെയ്ഞ്ചർ'. തന്റെ മുൻകാല സിനിമകൾ പോലെ ഈ ചിത്രവും ഷങ്കർ വമ്പൻ ബജറ്റിൽ തന്നെയാണ് ഒരുക്കുന്നത്. സിനിമകളിലെ വൻ സ്കെയിലുള്ള ഗാനരംഗങ്ങളുടെ പേരിൽ എന്നും ചർച്ചയാകാറുള്ള ശങ്കർ ഇക്കുറിയും ആ പതിവ് തെറ്റിക്കില്ല എന്ന റിപ്പോർട്ടുകളാണ് വരുന്നത്. ഗെയിം ചെയ്ഞ്ചറിലെ മൂന്നാം ഗാനത്തിന്റെ ചിത്രീകരണം ഉടൻ ആരംഭിക്കുമെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്, അതും വമ്പൻ ബജറ്റിൽ.
ഈ മാസം 27 ന് ചിത്രത്തിലെ മൂന്നാം ഗാനത്തിന്റെ ചിത്രീകരണം ആരംഭിക്കുമെന്നാണ് റിപ്പോർട്ട്. രാം ചരണും കിയാര അദ്വാനിയും ഉൾപ്പെടുന്ന ഗാനമായിരിക്കുമിത്. 15 കോടി ബജറ്റിൽ ന്യൂസിലാൻഡിലായിരിക്കും ഗാനരംഗം ചിത്രീകരിക്കുക എന്നാണ് റിപ്പോർട്ട്. ചിത്രത്തിലെ രണ്ടു ഗാനങ്ങൾ പുറത്തിറങ്ങിയിരുന്നു. വലിയ സ്വീകാര്യതയാണ് രണ്ടു ഗാനങ്ങൾക്കും ലഭിച്ചത്. ഒരു ടിപ്പിക്കൽ ഷങ്കർ സ്റ്റൈലിലുള്ള ഗ്രാൻഡ് ഡാൻസ് നമ്പറുകളാണ് രണ്ടു ഗാനങ്ങളും.
ഏറെ നാളത്തെ കാത്തിരിപ്പിന് ശേഷം സംക്രാന്തി റിലീസ് ആയി ചിത്രം 2026 ജനുവരിയിൽ തിയേറ്ററിലെത്തും. അഞ്ജലി, എസ് ജെ സൂര്യ, ജയറാം, സുനിൽ, ശ്രീകാന്ത്, സമുദ്രക്കനി, നാസർ തുടങ്ങിയ വലിയ താര നിര ഗെയിം ചേഞ്ചറിൽ അഭിനയിക്കുന്നുണ്ട്. മദൻ എന്ന ഐഎഎസ് ഓഫീസറുടെ വേഷത്തിലാണ് രാം ചരൺ ചിത്രത്തില്‍ എത്തുന്നത് എന്നാണ് വിവരം.
ഷങ്കർ സംവിധാനം ചെയ്യുന്ന ആദ്യ തെലുങ്ക് ചിത്രമാണ് 'ഗെയിം ചെയ്ഞ്ചർ'. സംവിധായകന്‍ കാർത്തിക് സുബ്ബരാജാണ് ചിത്രത്തിന്‍റെ രചന നിര്‍വഹിച്ചിരിക്കുന്നത്. ഇന്ത്യൻ 2 എന്ന ചിത്രത്തിന് ശേഷം ഷങ്കർ ഒരുക്കുന്ന ചിത്രമാണിത്. ഇന്ത്യന്‍ 2 ബോക്സ് ഓഫീസിൽ വലിയ പരാജയമായിരുന്നു. ഗെയിം ചെയ്ഞ്ചറിലൂടെ ഷങ്കർ പഴയ പ്രതാപത്തിലേക്ക് തിരിച്ചുവരുമെന്നാണ് ആരാധകർ പ്രതീക്ഷിക്കുന്നത്.
Content Highlights: Shankar to feature 15 crore song shoot for Game Changer
