LIVE TV
ബേസിൽ ജോസഫ് - നസ്രിയ നസീം എന്നിവരെ കേന്ദ്ര കഥാപാത്രങ്ങളാക്കി എംസി ജിതിൻ സംവിധാനം ചെയ്ത ചിത്രമാണ് 'സൂക്ഷ്മദർശിനി'. മികച്ച പ്രേക്ഷക പ്രതികരണമായി മുന്നേറുന്ന സിനിമക്ക് രണ്ടാം ദിനവും ബോക്സ് ഓഫീസിൽ വലിയ ചലനമാണ് സൃഷ്ട്ടിക്കുന്നത്. ആഗോള ബോക്സ് ഓഫീസിൽ നിന്ന് രണ്ടാം ദിനം ആറ് കോടിയാണ് 'സൂക്ഷ്മദർശിനി' നേടിയത്. ഇത് ഒന്നാം ദിന കളക്ഷനെക്കാൾ കൂടുതലാണ്.
ആദ്യ ദിനം നാല് കോടി ആയിരുന്നു ചിത്രം ആഗോള ബോക്സ് ഓഫീസിൽ നിന്ന് നേടിയത്. ഇതോടെ സിനിമയുടെ കളക്ഷൻ 10 കോടിയായി. സിനിമയ്ക്ക് എല്ലാ കോണുകളിൽ നിന്നും മികച്ച പ്രതികരണമാണ് ലഭിക്കുന്നത്. അടിമുടി പ്രേക്ഷകരെ പിടിച്ചിരുത്തുന്ന ഒരു ഫാമിലി ത്രില്ലറാണ് സൂക്ഷ്മദർശിനി എന്നാണ് പലരും സമൂഹ മാധ്യമങ്ങളിൽ കുറിച്ചിരിക്കുന്നത്. കേരളത്തിൽ നിന്ന് 1.8 കോടി രൂപയാണ് സിനിമ ആദ്യ ദിവസം നേടിയത്. ഓവർസീസിലും സിനിമയ്ക്ക് ഗംഭീര കളക്ഷനാണ് ലഭിച്ചിരിക്കുന്നത്. 2.25 കോടിയാണ് സിനിമ ഓവർസീസിൽ നിന്ന് നേടിയത്.
ബേസിലിന്റെ കരിയറിലെ തന്നെ ഏറ്റവും വലിയ ആദ്യദിന കളക്ഷനുമാണിത്. അയൽവാസികളായ പ്രിയദര്‍ശിനി, മാനുവൽ എന്നീ കഥാപാത്രങ്ങളായാണ് ചിത്രത്തിൽ നസ്രിയയും ബേസിലും എത്തുന്നത്. അവരുടെ ജീവിതവുമായി ബന്ധപ്പെട്ട് നടക്കുന്ന ചില സംഭവ വികാസങ്ങളിലൂടെയാണ് ചിത്രം മുന്നോട്ടുപോകുന്നത്. എം സിയാണ് ചിത്രം സംവിധാനം ചെയ്യുന്നത്. ഹാപ്പി ഹവേർസ് എന്‍റർടെയ്ൻമെന്‍റ്സിന്‍റേയും, എ വി എ പ്രൊഡക്ഷൻസിന്‍റെയും ബാനറുകളില്‍ സമീർ താഹിർ, ഷൈജു ഖാലിദ്, എ വി അനൂപ് എന്നിവർ ചേര്‍ന്നാണ് സൂക്ഷ്മദര്‍ശിനി നിര്‍മിക്കുന്നത്. തിരക്കഥ രചിച്ചിരിക്കുന്നത് ലിബിനും അതുലും ചേർന്നാണ്. ദീപക് പറമ്പോല്‍, സിദ്ധാർത്ഥ് ഭരതൻ, കോട്ടയം രമേശ്, അഖില ഭാർഗവൻ, പൂജ മോഹൻരാജ്, മെറിൻ ഫിലിപ്പ്, മനോഹരി ജോയ്, ഹെസ്സ മെഹക്ക്, ഗോപൻ മങ്ങാട്, ജയ കുറുപ്പ്, റിനി ഉദയകുമാർ, ജെയിംസ്, നൗഷാദ് അലി, അപർണ റാം, സരസ്വതി മേനോൻ, അഭിറാം രാധാകൃഷ്ണൻ തുടങ്ങിയവരാണ് ചിത്രത്തിൽ മറ്റു വേഷങ്ങൾ കൈകാര്യം ചെയ്യുന്നത്. ചിത്രത്തിനായി സംഗീതം ഒരുക്കുന്നത് ക്രിസ്റ്റോ സേവ്യറാണ്.
Content Highlights: Sookshmadarshini earns good collection from worldwide boxoffice
