സൂര്യയും രജനിയും മാത്രമല്ല അമൽ നീരദ്-ചാക്കോച്ചൻ ടീമുമുണ്ട് അങ്കത്തിന്; ബോഗയ്ൻവില്ല ഒക്ടോബറിൽ?

അമൽ നീരദും കുഞ്ചാക്കോ ബോബനും ആദ്യമായി ഒന്നിക്കുന്ന ചിത്രമാണ് ബോഗയ്ൻവില്ല

റിപ്പോർട്ടർ നെറ്റ്‌വര്‍ക്ക്‌

1 min read|24 Aug 2024, 06:48 pm

ഭീഷ്മപർവ്വത്തിന് ശേഷം അമൽ നീരദിന്റെ സംവിധാനത്തിൽ ഒരുങ്ങുന്ന ചിത്രമാണ് ബോഗയ്ൻവില്ല. ജ്യോതിർമയി, കുഞ്ചാക്കോ ബോബൻ, ഷറഫുദീൻ എന്നിവർക്കൊപ്പം ഫഹദ് ഫാസിലും സുപ്രധാന കഥാപാത്രമായെത്തുന്ന സിനിമയ്ക്കായി മലയാള സിനിമാപ്രേമികൾ ഒന്നടങ്കം കാത്തിരിക്കുകയാണ്. ഇപ്പോഴിതാ സിനിമയുടെ റിലീസ് തീയതി സംബന്ധിച്ച് വമ്പൻ അപ്ഡേറ്റാണ് എത്തിയിരിക്കുന്നത്.

ചിത്രം ഒക്ടോബർ 10 ന് റിലീസ് ചെയ്യുമെന്നാണ് ഒടിടി പ്ലേ റിപ്പോർട്ട് ചെയ്യുന്നത്. സിനിമയുടെ ചാർട്ടിങ് ആരംഭിച്ചതായും റിലീസ് തീയതിയുടെ ഔദ്യോഗിക പ്രഖ്യാപനവും ടീസറും ഉടൻ റിലീസ് ചെയ്യുമെന്നാണ് സൂചന.

തമിഴകത്തെ പ്രധാനപ്പെട്ട രണ്ടു റിലീസുകളുള്ള ദിവസമാണ് ഒക്ടോബർ 10. സൂര്യയുടെ കങ്കുവയ്ക്കും രജനികാന്തിന്റെ വേട്ടയ്യനുമൊപ്പം ബോഗയ്ൻവില്ലയും ഒക്ടോബർ 10 ന് എത്തുമ്പോൾ കേരള ബോക്സ് ഓഫീസിൽ ഒരു വമ്പൻ ക്ലാഷ് തന്നെയുണ്ടാകുമെന്നാണ് അനലിസ്റ്റുകളുടെ നിഗമനം.

'പാട്ടിന് പാട്ട്, ഇടിക്ക് ഇടി; ഗോട്ട് ഒരു അടിപൊളി മാസ് മസാല സിനിമ' എന്ന് അജ്മൽ അമീർ

അമൽ നീരദും കുഞ്ചാക്കോ ബോബനും ആദ്യമായി ഒന്നിക്കുന്ന ചിത്രമാണ് ബോഗയ്ൻവില്ല. സിനിമയിൽ കുഞ്ചാക്കോ ബോബൻ നെഗറ്റീവ് ഷെയ്ഡുള്ള കഥാപാത്രത്തെയാകും അവതരിപ്പിക്കുക എന്ന റിപ്പോർട്ടുകളുണ്ട്. ഏറെ നാളുകൾക്ക് ശേഷം നടി ജ്യോതിർമയി അഭിനയിക്കുന്നുവെന്നതും ചിത്രത്തിന്റെ പ്രത്യേകതയാണ്. വീണാ നന്ദകുമാറാണ് മറ്റൊരു താരം. ക്രൈം ത്രില്ലര് നോവലുകളിലൂടെ ശ്രദ്ധേയനായ ലാജോ ജോസും അമൽ നീരദുമാണ് ചിത്രത്തിൻ്റെ തിരക്കഥ. ഭീഷ്മപർവ്വം, വരത്തൻ എന്നീ ചിത്രങ്ങൾക്ക് ഛായാഗ്രഹണം നിർവഹിച്ച ആനന്ദ് സി ചന്ദ്രനാണ് പുതിയ ചിത്രത്തിനും ക്യാമറ ചലിപ്പിക്കുന്നത്.