LIVE TV
ഭാഷാ ഭേദമന്യേ പ്രേക്ഷക-നിരൂപക പ്രശംസ കരസ്ഥമാക്കിയ ചിത്രമാണ് വെട്രിമാരൻ സംവിധാനം ചെയ്ത വിടുതലൈ. സിനിമയുടെ രണ്ടാം ഭാഗവും അണിയറയിൽ ഒരുങ്ങിക്കൊണ്ടിരിക്കുകയാണ്. അധികാരത്തിന്റെ രാഷ്ട്രീയം പറഞ്ഞ സിനിമയുടെ മൂന്നാം ഭാഗവും ഉണ്ടായേക്കുമെന്ന റിപ്പോർട്ടുകളാണ് ഇപ്പോൾ പുറത്തു വരുന്നത്.
വിടുതലൈ രണ്ടാം ഭാഗത്തിന്റെ ചിത്രീകരണം പുരോഗമിക്കുകയാണ്. ഈ ചിത്രം രണ്ടായി വിഭജിക്കാൻ അണിയറപ്രവർത്തകർ പദ്ധതിയിടുന്നതായും ഗ്ലിറ്റ്സ് റിപ്പോർട്ട് ചെയ്തു. ആരാധകരുടെ പ്രതികരണത്തെ ആശ്രയിച്ചായിരിക്കും ചിത്രം ഒരുക്കുക എന്നും റിപ്പോർട്ടുകളുണ്ട്. വിജയ് സേതുപതി, മഞ്ജു വാര്യർ എന്നിവരുടെ കഥാപാത്രങ്ങളെ കേന്ദ്രീകരിച്ചായിരിക്കും വിടുതലൈ 2 കഥ പറയുക എന്നാണ് സൂചന.
സൂരി, അനുരാഗ് കശ്യപ്, കിഷോർ, ഗൗതം വാസുദേവ് മേനോൻ, രാജീവ് മേനോൻ, ചേതൻ എന്നിവരും വിടുതലൈ രണ്ടാം ഭാഗത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ആർ എസ് ഇൻഫോടെയ്ൻമെന്റിന്റെ ബാനറിൽ എൽറെഡ് കുമാറാണ് വിടുതലൈ രണ്ടാം ഭാഗത്തിന്റെ നിർമ്മാണം നിർവഹിക്കുന്നത്.
വിടുതലൈ പാർട്ട് 2ന്റെ സംഗീത സംവിധാനം നിർവഹിച്ചിരിക്കുന്നത് ഇളയരാജയാണ്. സിനിമയുടെ ചിത്രീകരണത്തിന്റെ അവസാനഘട്ട ജോലികൾ നടന്നുകൊണ്ടിരിക്കുകയാണ്. വിടുതലൈ പാർട്ട് 2ന്റെ ഡി ഓ പി : ആർ വേൽരാജ്, കലാസംവിധാനം : ജാക്കി, എഡിറ്റർ : രാമർ , കോസ്റ്റ്യൂം ഡിസൈനർ : ഉത്തര മേനോൻ, സ്റ്റണ്ട്സ് : പീറ്റർ ഹെയ്ൻ & സ്റ്റണ്ട് ശിവ, സൗണ്ട് ഡിസൈൻ : ടി. ഉദയകുമാർ, വി എഫ് എക്സ് : ആർ ഹരിഹരസുദൻ.
