വെടിക്കെട്ട് ബാറ്റർ, മികച്ച വിക്കറ്റ് കീപ്പർ; ആദം ഗിൽക്രിസ്റ്റിന് ജന്മദിനാശംസകൾ

ഓസ്ട്രേലിയന് ക്രിക്കറ്റ് ഇതിഹാസം ആദം ഗിൽക്രിസ്റ്റിന് ഇന്ന് 52-ാം ജന്മദിനം. ലോകക്രിക്കറ്റിലെ എക്കാലത്തെയും വലിയ വെടിക്കെട്ട് ബാറ്റര്മാരിലൊരാളാണ് ഗില്ക്രിസ്റ്റ്. ഇടം കൈയ്യന് ബാറ്ററുടെയും വിക്കറ്റ് കീപ്പറുടെയും റോളില് ഒരു കാലഘട്ടമത്രയും തിളങ്ങിനിന്നു. ഗില്ലി എന്ന ചുരുക്കപേരിലും അറിയപ്പെടുന്ന ഗില്ക്രിസ്റ്റ് ലോകത്തെ എക്കാലത്തെയും മികച്ച വിക്കറ്റ് കീപ്പര്മാരുടെ ലിസ്റ്റില് ഉണ്ടാകും. 96 ടെസ്റ്റുകളിലും 287 ഏകദിനങ്ങളിലും 13 ട്വന്റി 20യിലും ഗില്ക്രിസ്റ്റ് കളിച്ചിട്ടുണ്ട്. 2000 മുതല് 2008ല് വിരമിക്കുന്നത് വരെ ഓസ്ട്രേലിയന് ടീമിന്റെ ഉപനായക സ്ഥാനം ഗില്ക്രിസ്റ്റില് ഭദ്രമായിരുന്നു.

ദക്ഷിണാഫ്രിക്കയ്ക്കെതിരെ 1996ല് ഗില്ക്രിസ്റ്റ് ഏകദിന ക്രിക്കറ്റില് അരങ്ങേറി. 1999ല് പാകിസ്താനെതിരെ ടെസ്റ്റിലും ഗില്ക്രിസ്റ്റ് അരങ്ങേറ്റം കുറിച്ചു. ഇയാന് ഹീലിക്ക് പകരക്കാരനായാണ് ഗില്ക്രിസ്റ്റ് ഓസ്ട്രേലിയന് ടീമിലേക്ക് കടന്നുവരുന്നത്. 1999ലെ ഏകദിന ലോകകപ്പിന് മുമ്പ് തന്നെ ഗില്ക്രിസ്റ്റിലെ താരത്തെ ക്രിക്കറ്റ് ഓസ്ട്രേലിയ തിരിച്ചറിഞ്ഞിരുന്നു. ശ്രീലങ്കയും ഇംഗ്ലണ്ടും ഉള്പ്പെട്ട കാള്ട്ടണ് & യുണൈറ്റഡ് സീരീസില് ഗില്ക്രിസ്റ്റിന്റെ ബാറ്റില് നിന്ന് പിറന്നത് 525 റണ്സാണ്. 43.75 ശരാശരിയില് രണ്ട് സെഞ്ചുറികള് ഉള്പ്പടെ ആയിരുന്നു ഗില്ക്രിസ്റ്റിന്റെ നേട്ടം. ബാറ്റിങ്ങില് ഒതുങ്ങിയില്ല ഗില്ക്രിസ്റ്റിന്റെ പ്രകടനം. 12 മത്സരങ്ങളില് നിന്നായി വീണത് 27 വിക്കറ്റുകളായിരുന്നു. 1999ലെ ലോകകപ്പ് ഫൈനലില് അര്ദ്ധ സെഞ്ചുറി നേടി. പിന്നാലെ നടന്ന ഇന്ത്യ, ശ്രീലങ്ക, ഓസ്ട്രേലിയ ടീമുകള് ഉള്പ്പെട്ട ഐവ കപ്പ് ത്രിരാഷ്ട്ര ടൂര്ണമെന്റിലും ഗില്ക്രിസ്റ്റ് ആയിരുന്നു താരം.

ടെസ്റ്റ് ക്രിക്കറ്റില് സ്വപ്നതുല്യമായ അരങ്ങേറ്റമായിരുന്നു ഗില്ക്രിസ്റ്റിന് ലഭിച്ചത്. ആദ്യ ഇന്നിംഗ്സില് 81 റണ്സെടുത്തു. ഏകദിന ക്രിക്കറ്റിന് സമാനമായി ടെസ്റ്റിലും ആക്രമണ ബാറ്റിംഗായിരുന്നു ഗില്ക്രിസ്റ്റ് പുറത്തെടുത്തത്. ശക്തമായ ഓസ്ട്രേലിയന് നിരയ്ക്ക് കൂടുതല് കരുത്ത് പകരുന്നതായിരുന്നു ഗില്ക്രിസ്റ്റിന്റെ ബാറ്റിംഗ്. രണ്ടാം ടെസ്റ്റില് പാകിസ്താനെതിരെ ഗില്ക്രിസ്റ്റ് 149 റണ്സ് നേടി. ആറാം വിക്കറ്റില് ജസ്റ്റിന് ലാംഗറിനൊപ്പം 238 റണ്സ് ഗില്ക്രിസ്റ്റ് കൂട്ടിച്ചേര്ത്തു.

2001ല് ദക്ഷിണാഫ്രിക്കയ്ക്കെതിരെ നേടിയ 213 പന്തില് 201 റണ്സ് ടെസ്റ്റ് ക്രിക്കറ്റിലെ വേഗത്തിലുള്ള ഇരട്ട സെഞ്ചുറിയായിരുന്നു. അതേ വര്ഷം ഇന്ത്യയ്ക്കെതിരെ അഞ്ചിന് 99 എന്ന് തകര്ന്ന ഓസ്ട്രേലിയയെ ഗില്ക്രിസ്റ്റ് ചുമലിലേറ്റി. 122 റണ്സ് നേടിയ ഗില്ക്രിസ്റ്റ് ഓസ്ട്രലിയയ്ക്ക് നിര്ണായകമായ 173 റണ്സിന്റെ ലീഡ് നേടിക്കൊടുത്തു. 2006ലെ ആഷസില് ഓസ്ട്രേലിയയ്ക്കെതിരെ 59 പന്തില് ഗില്ക്രിസ്റ്റ് 102 റണ്സെടുത്തു. ടെസ്റ്റ് ക്രിക്കറ്റിലെ വേഗമേറിയ സെഞ്ചുറിയായിരുന്നു ഇത്.

അപൂര്വ്വം അവസരങ്ങളില് മാത്രമാണ് ഗില്ക്രിസ്റ്റിന് ഓസ്ട്രേലിയന് നായകനാകാന് അവസരം ലഭിച്ചത്. ഇന്ത്യയില് 35 വര്ഷത്തിന് ശേഷം ടെസ്റ്റ് പരമ്പര നേടാനായത് ഗില്ക്രിസ്റ്റിലെ നായകന്റെ നേട്ടമാണ്. ടെസ്റ്റ് ക്രിക്കറ്റില് ഏഴാം നമ്പറിലെത്തിയാണ് ഗില്ക്രിസ്റ്റ് വെടിക്കെട്ട് നടത്തുന്നതെങ്കില് ഏകദിന ക്രിക്കറ്റില് ആദ്യ പന്ത് മുതല് ഗില്ലിയുടെ ബാറ്റ് എതിരാളികളെ ബൗണ്ടറിയിലേക്ക് പായിക്കും. 2007ലെ ലോകകപ്പില് ഗില്ക്രിസ്റ്റ് നേടിയ 149 റണ്സ് ലോകകപ്പ് ചരിത്രത്തിലെ തന്നെ എക്കാലത്തെയും മികച്ച ക്ലാസിക്കുകളുടെ പട്ടികയില് ഉള്പ്പെട്ടു. ബാറ്റില് നല്ല പിടുത്തം കിട്ടാന് സ്ക്വാഷ് ബോള് ഗ്ലൗസിനുള്ളില് വെച്ചായിരുന്നു ഓസീസ് ഓപ്പണര് വെടിക്കെട്ട് നടത്തിയത്.

ഒരു ബാറ്റര്ക്കുമപ്പുറം ഏക്കാലത്തെയും മികച്ച വിക്കറ്റ് കീപ്പറുമാണ് ഗില്ക്രിസ്റ്റ്. കരിയറിലാകെ 888 വിക്കറ്റുകള് ഗില്ക്രിസ്റ്റിന്റെ ഗ്ലൗവിലേക്ക് എത്തി. 2008ല് അന്തരാഷ്ട്ര ക്രിക്കറ്റിനോട് ഗില്ക്രിസ്റ്റ് വിടപറഞ്ഞു. 1999, 2003, 2007 ലോകകപ്പിലെ ചാമ്പ്യന്മാരായ ഓസ്ട്രേലിയന് ടീമില് ഗില്ക്രിസ്റ്റ് അംഗമായിരുന്നു. പിന്നീട് ഐപിഎല്ലില് ഓസ്ട്രേലിയന് താരം സജീവമായി. പ്രഥമ സീസണില് ഐപിഎല്ലില് അവസാന സ്ഥാനക്കാരായിരുന്ന ഡെക്കാന് ചാര്ജേഴ്സ് ഹൈദരാബാദിനെ രണ്ടാം സീസണില് ചാമ്പ്യന്മാരാക്കി. ഗില്ക്രിസ്റ്റിലെ നായകനെ ലോകം അറിഞ്ഞത് യഥാര്ത്ഥത്തില് ഐപിഎല്ലിലൂടെ ആയിരുന്നു. 2013ല് കിംഗ്സ് ഇലവന് പഞ്ചാബ് (പഞ്ചാബ് കിംഗ്സ്) താരമായി ഗില്ക്രിസ്റ്റ് ഐപിഎല്ലില് നിന്ന് വിരമിച്ചു.

Special

Special

ജോർജുകുട്ടിയും കുടുംബവും ഇന്ത്യൻ സിനിമയെ ഞെട്ടിച്ചിട്ട് ഇന്നേക്ക് 11 വർഷം

Special

മാർക്കോയ്ക്ക് എന്തുകൊണ്ട് ഇത്ര ഹൈപ്പ്? അതിന് ചില കാരണങ്ങളുണ്ട്... ഇത് ഒന്നൊന്നര പടമാകും

Special

മദ്യപിക്കാൻ 10 പൈസയ്ക്ക് അരി ചുമടെടുപ്പ്, പിന്നീട് കണ്ടക്ടർ, ഒടുവിൽ സൂപ്പർസ്റ്റാർ; രജനികാന്തിന്‍റെ കഥ

Special

നല്ല ഒന്നൊന്നര 'ഫഹദ് പാര്‍ട്ടി' ഉണ്ട് മോനേ | Fahadh Faasil | Pushpa 2