Get the latest news at
your fingertips!
Download our app now
LIVE TV
Search
ദുബായ്: മാസ്റ്റർ വിഷൻ ഇന്റർനാഷണൽ എക്‌സലൻസ് പുരസ്‌കാര സമർപ്പണത്തിൽ ഉണ്ണി ബാലകൃഷ്ണന് പ്രത്യേക ആദരവ്. മാധ്യമ രംഗത്തെ സമഗ്ര സംഭാവനകൾ കണക്കിലെടുത്തുകൊണ്ടാണ് അംഗീകാരം. പുരസ്‌കാര സമർപ്പണം നവംബർ 22 ന് ദുബായ് ഇന്ത്യൻ ഹൈ സ്‌കൂൾ ഷെയ്ഖ് റാഷിദ് ഓഡിറ്റോറിയത്തിൽ നടത്തുമെന്ന് മാസ്റ്റർ വിഷൻ ഇന്റർനാഷണൽ സിഇഒയും മാനേജിങ്ങ് ഡയറക്ടറുമായ മുഹമ്മദ് റഫീഖ് അറിയിച്ചു. ചടങ്ങിൽ ഇന്ത്യയിൽ നിന്നുള്ള കേന്ദ്ര മന്ത്രിമാരും ദുബായ് പൊലീസിന്റെ പ്രതിനിധികളും പങ്കെടുക്കും.
മാസ്റ്റർ വിഷൻ ഇന്റർനാഷണലിന്റെ ഈ വർഷത്തെ മാധ്യമ അവാർഡുകൾക്ക് അഭിലാഷ് മോഹൻ, ഹാഷ്മി താജ് ഇബ്രാഹിം, നിഷാദ് റാവുത്തർ എന്നിവർ അർഹരായി. സാഹിത്യ രംഗത്ത് യു കെ യിലെ കവിയും എഴുത്തുകാരിയുമായ ലൂണ മോണ്ടിനെഗ്രോ, യുഎഇയിലെ കവിയും എഴുത്തുകാരിയും പ്രഭാഷകയുമായ ഷീല പോൾ എന്നിവർക്ക് അവാർഡുകൾ സമ്മാനിക്കും.
ഈ വർഷത്തെ യുവ വനിത വ്യക്തിത്വ പുരസ്‌കാരത്തിന് അക്ബർ ട്രാവൽസ് ഡയറക്ടർ ആഷിയ നാസറിനെയും രാഷ്ട്രീയ -സാമൂഹ്യ രംഗത്തെ പുരസ്‌കാരത്തിന് ഷീല ബചലയെയും തിരഞ്ഞെടുത്തു. പുരസ്‌കാര വിതരണ ചടങ്ങിലും ബിസിനസ് കോൺക്ലേവിലും കേന്ദ്ര സംസ്ഥാന മന്ത്രിമാരും സിനിമാ, സാഹിത്യ, സാംസ്‌കാരിക, വ്യവസായ മേഖലകളിൽ നിന്നുള്ള പ്രമുഖരും പങ്കെടുക്കും. രാജ്യാന്തര തലത്തിൽ മികവു പുലർത്തുന്ന സിനിമ, സംഗീതം, സാമൂഹ്യ സേവനം, മീഡിയ(ഇന്ത്യ, യുഎഇ) ബിസിനസ്, ദൃഢനിശ്ചയ വിഭാഗങ്ങളിൽ നിന്നുള്ളവർക്കാണ് എക്‌സലൻസ് അവാർഡ് നൽകുന്നത്. ഡിസംബർ 20 നും 21 നും ദേര ക്രൗൺ പ്ലാസ അൽ തുറയ ബാൾ റൂമിൽ നടക്കുന്ന ബിസിനസ് കോൺക്ലേവിൽ യു എ ഇ യിലും പുറത്തുമുള്ള വ്യവസായ പ്രമുഖർ പങ്കെടുക്കും. 2023-ൽ മികവുറ്റ പ്രകടനം നടത്തിയ സംരംഭകരെ ചടങ്ങിൽ ആദരിക്കും.
കേന്ദ്ര സാമൂഹിക നീതി - ശാക്തീകരണ വകുപ്പു മന്ത്രി രാംദാസ് അത്‌വാലെ, പോണ്ടിച്ചേരി മുഖ്യമന്ത്രി എൻ രങ്കസ്വാമി, കേരള സംസ്ഥാന സഹകരണ-തുറുമുഖ-ദേവസ്വം മന്ത്രി വിഎൻ വാസവൻ, കർണാടക നിയമസഭാ സ്പീക്കർ യു ടി ഖാദർ, തെലങ്കാന ഗ്രാമവികസന-പഞ്ചായത്തീ രാജ്-വനിതാ ശിശു ക്ഷേമ വകുപ്പ് മന്ത്രി ഡോ. ദൻസാരി അനസൂയ സീതക്ക, കേരള മുൻ ആഭ്യന്തര മന്ത്രി രമേശ് ചെന്നിത്തല എംഎൽഎ, ദുബായ്, ഷാർജ, അജ്മാൻ പോലീസ് ഡിപ്പാർട്ട്‌മെന്റിലെ ഉന്നത ഉദ്യോഗസ്ഥർ തുടങ്ങിയ പ്രമുഖർ അവാർഡ് ദാന ചടങ്ങിൽ പങ്കെടുക്കുമെന്ന് മുഹമ്മദ് റഫീഖ് അറിയിച്ചു. അക്കാഫ് അസോസിയേഷൻ പോൾ ടി ജോസഫ്, ഷീല പോൾ, പ്രമുഖ വ്യവസായി ആർ ഹരികുമാർ തുടങ്ങിയവർ വാർത്താസമ്മേളനത്തിൽ പങ്കെടുത്തു.
content highlights: Special tribute to Unni Balakrishnan at the presentation of Master Vision International Excellence Award
