യുഎഇയിൽ സവാളയുടെ വില കുറയും

രാജ്യത്ത് ഉള്ളി, മറ്റ് പച്ചക്കറികൾ, സുഗന്ധവ്യഞ്ജനങ്ങൾ തുടങ്ങിയ ഉപഭോഗവസ്തുക്കൾക്കുള്ള ഡിമാൻഡ് കുതിച്ചുയരുകയാണ്

റിപ്പോർട്ടർ നെറ്റ്‌വര്‍ക്ക്‌

1 min read|06 Apr 2024, 12:41 pm

അബുദബി: 10,000 ടൺ സവാള യുഎഇയിലേക്ക് കയറ്റുമതി ചെയ്യുമെന്ന് പ്രഖ്യാപിച്ച് ഇന്ത്യ. വരും ദിവസങ്ങളിൽ രാജ്യത്ത് സവാളയുടെ വില കുറയുന്നതിന് ഇത് സഹായിക്കും. ചെറിയ പെരുന്നാളിന് മുന്നോടിയായാണ് പ്രഖ്യാപനം. രാജ്യത്ത് ഉള്ളി, മറ്റ് പച്ചക്കറികൾ, സുഗന്ധവ്യഞ്ജനങ്ങൾ തുടങ്ങിയ ഉപഭോഗവസ്തുക്കൾക്കുള്ള ഡിമാൻഡ് കുതിച്ചുയരുകയാണ്.

നാഷണൽ കോഓപ്പറേറ്റീവ് എക്സ്പോർട്ട്സ് ലിമിറ്റഡ് വഴി യുഎഇയിലേക്ക് 10,000 ടൺ സവാള കയറ്റുമതി ചെയ്യുമെന്ന് ഇന്ത്യയിലെ വാണിജ്യ, വ്യാപാര മന്ത്രാലയത്തിന് കീഴിൽ പ്രവർത്തിക്കുന്ന ഡയറക്ടർ ജനറൽ ഓഫ് ഫോറിൻ ട്രേഡ് പറഞ്ഞു. യുഎഇയിൽ സവാളയുടെ വില വൻതോതിൽ വർധിച്ച് കിലോഗ്രാമിന് ഏഴ് ദിർഹത്തിലെത്തി. സാധാരണയായി ഹൈപ്പർമാർക്കറ്റുകളിൽ ഉള്ളി കിലോഗ്രാമിന് രണ്ട് ദിർഹം മുതൽ മൂന്ന് ദിർഹം വരെയാണ് വിൽക്കുന്നത്. വാരാന്ത്യ കിഴിവുകളിലും പ്രമോഷനുകളിലും, ഉപഭോക്താക്കളെ ആകർഷിക്കുന്നതിനും കാൽനടയാത്ര വർദ്ധിപ്പിക്കുന്നതിനുമായി വിലകൾ ചിലപ്പോൾ കിലോഗ്രാമിന് ഒരു ദിർഹമായി കുറയ്ക്കാറുണ്ട്.

കഴിഞ്ഞ മാസം ഇന്ത്യയിൽ നിന്ന് 14,400 ടൺ സവാള യുഎഇയിലേക്ക് അയച്ചിരുന്നു. അതിന് പുറമെയാണ് 10000 ടൺ സവാള കയറ്റുമതി ചെയ്യുമെന്ന് പ്രഖ്യാപിച്ചത്. നേരത്തെ ചില രാജ്യങ്ങളിലേക്ക് 79,150 ടൺ കയറ്റുമതി അയയ്ക്കാൻ ഡൽഹിയിൽ നിന്ന് അനുമതി നൽകിയിരുന്നു.

സവാള കയറ്റുമതി ചെയ്യുന്നതിൽ ലോകത്തിലെ ഏറ്റവും വലിയ രാജ്യങ്ങളിലൊന്നാണ് ഇന്ത്യ. ആഭ്യന്തര വിപണിയിലെ വില വർദ്ധനവ് കാരണം ചരക്കുകളുടെ കയറ്റുമതി നിരോധിച്ചിരുന്നു. നിലവിലെ പ്രഖ്യാപനം ഉപഭോക്താക്കൾക്ക് വളരെ അനുകൂലമായ സംഭവവികാസമാണെന്ന് ഗ്രൂപ്പ് ഡയറക്ടറും അൽ മായ ഗ്രൂപ്പിൻ്റെ പങ്കാളിയുമായ കമൽ വചാനി പറഞ്ഞു.

യുഎഇയിലെ ഉപഭോക്താക്കൾ താങ്ങാനാവുന്ന വിലയ്ക്കും ഗുണനിലവാരത്തിനും രുചിക്കുമാണ് ഇന്ത്യൻ സവാള ഇഷ്ടപ്പെടുന്നതെന്ന് അദ്ദേഹം പറഞ്ഞു. ഇരു രാജ്യങ്ങളും തമ്മിൽ സമഗ്ര സാമ്പത്തിക പങ്കാളിത്ത കരാറിൽ (സെപ) ഒപ്പുവച്ചതിൻ്റെ പശ്ചാത്തലത്തിലാണ് സവാളയുടെ കയറ്റുമതി വർധിച്ചത്.