Get the latest news at
your fingertips!
Download our app now
LIVE TV
Search
ഡോണ്‍ ക്വിക് സോട്ട് ഇനി അരങ്ങില്‍ മലയാളം സംസാരിക്കും. സ്പാനിഷ് എഴുത്തുകാരന്‍ മിഗ്വേല്‍ ദേ സെര്‍വാന്റിസിന്റെ ക്ലാസ്സിക്ക് നോവല്‍ ഡോണ്‍ ക്വിക് സോട്ട് പുതിയ രംഗഭാഷ്യത്തില്‍ അവതരിപ്പിക്കുന്നത് സംവിധായകന്‍ അലിയാര്‍ അലിയും സംഘവുമാണ്. വിവിധ സംസ്‌കാരങ്ങളിലേക്ക് സഞ്ചരിക്കാന്‍ കഴിയുന്ന നോവലിന്റെ സാധ്യതകള്‍ പ്രയോജനപ്പെടുത്തി നാടകരൂപത്തില്‍ വരുമ്പോള്‍ ഒരുപാട് കലാകാരന്മാരുടെ കഠിനമായ അധ്വാനവും കൂടിയാണ് ഫലപ്രാപ്തിയില്‍ എത്തുന്നത്. അലിയാര്‍ അലിയുടെ സ്പോര്‍ട്ടീവ് തിയേറ്ററും, സായൂജ്, സജിനി എന്നിവരുടെ മിന്നാടവും, ഷൈജു ഗുരുക്കളുടെ പൊന്നാനി കളരി സംഘവും ചേര്‍ന്ന് നടത്തുന്ന നന്മയില്‍ ജോണ്‍കിഹോത്തെ എന്ന നാടകം പ്രേക്ഷകനെ വിസ്മയിപ്പിക്കും എന്ന കാര്യത്തില്‍ തര്‍ക്കമില്ല.
ഷിവല്‍റി റൊമാന്‍സുകള്‍ വായിച്ച് യാഥാര്‍ഥ്യബോധം നഷ്ടപ്പെട്ട സ്വപ്നജീവിയായ നായകന്‍ താന്‍ വായിച്ച കഥകളിലെ വീരനായകരെ അനുകരിച്ചുകൊണ്ട് തിന്മകള്‍ക്കെതിരായി പടപൊരുതാന്‍ ഇറങ്ങിത്തിരിക്കുകയാണ്. കര്‍ഷകനായ സാഞ്ചോ പാന്‍സോയെ അയാള്‍ ഒപ്പം കൂട്ടുന്നു. യജമാനന്‍ ഒരു സാങ്കല്പിക ലോകത്താണ് ജീവിക്കുന്നത് എന്ന് സാഞ്ചോ പാന്‍സോയ്ക്ക് ബോധ്യമുണ്ടെങ്കിലും അയാള്‍ ഡോണ്‍ ക്വിക് സോട്ടിനെ പിന്തുടരുന്നു. യാഥാര്‍ഥ്യങ്ങളില്‍ നിന്ന് അകന്ന് ഭൂതകാലത്തിന്റെ ഗൃഹാതുരത്വത്തില്‍ ജീവിക്കുന്ന ഡോണ്‍ ക്വിക്‌സോട്ടും യാഥാര്‍ഥ്യത്തെ ഉള്‍കൊള്ളുന്ന സാഞ്ചോ പന്‍സായും നടത്തുന്ന ദീര്‍ഘയാത്രകളാണ് നോവലിന്റെ പ്രമേയം. യാത്രയില്‍ അവര്‍ വിവിധ തുറസ്സില്‍ പെട്ട മനുഷ്യരെ കണ്ടുമുട്ടുന്നു. പട്ടാളക്കാര്‍, തൊഴിലാളികള്‍, പാതിരിമാര്‍, വേശ്യകള്‍, സത്രം നടത്തിപ്പുകാര്‍, ജയില്പുള്ളികള്‍ എന്നിങ്ങനെ നിരവധി പേര്‍ തങ്ങളുടെ അനുഭവം പങ്കുവെക്കുന്നുണ്ട്. ഡോണ്‍ ക്വിക്‌സോട്ടും സാഞ്ചോ പാന്‍സോയും നിരവധി കുഴപ്പങ്ങളില്‍ ചെന്ന് ചാടുന്നു. ഒടുവില്‍ നല്ല ബുദ്ധി ഉദിച്ചപ്പോള്‍ എല്ലാം അവസാനിപ്പിച്ച് വീട്ടിലേക്ക് മടങ്ങാന്‍ ഡോണ്‍ ക്വിക്സോട്ട് തീരുമാനിക്കുന്നു.
വിശ്വസാഹിത്യത്തിലെ ആദ്യത്തെ ഇതിഹാസ മാനങ്ങളുള്ള ബൃഹദാഖ്യായിക, ആക്ഷേപഹാസ്യ മഹാകാവ്യം എന്നീ വിശേഷണങ്ങള്‍ ചാര്‍ത്തപ്പെട്ട സ്പാനിഷ് ഭാഷയിലെ ഈ നോവല്‍ മധ്യകാല റൊമാന്‍സുകളെയും അവ തുറന്നു വിടുന്ന അസംബന്ധ ലോകത്തെയും കണക്കറ്റ് പരിഹസിക്കുന്നുണ്ട്. അതുകൊണ്ട് നോവലിന് പാരഡിയുടെ സ്വഭാവം കൈവരിക്കുന്നു. പരീക്ഷണ സ്വഭാവമുള്ള ഈ കൃതിയെ ഇതിഹാസമെന്നോ, നോവലെന്നോ, മഹാകാവ്യമെന്നോ വിളിക്കാം. സെര്‍വന്റീസ് തന്റെ നോവലിനെയും ഇതിലൂടെ വിമര്‍ശന വിധേയമാക്കുന്നു. പതിനേഴാം നൂറ്റാണ്ടിന്റെ തുടക്കത്തില്‍, ഷേക്‌സ്പിയറിന്റെ ഹാംലറ്റ് ഇറങ്ങിയ കാലത്ത് എഴുതപ്പെട്ട ഡോണ്‍ ക്വിക്സോട്ട് പുറത്ത് വന്ന് പത്തു വര്‍ഷത്തിനകം ഇംഗ്ലീഷില്‍ പരിഭാഷയിറങ്ങി. ലോകത്തിലെ എല്ലാ സുപ്രധാന ഭാഷകളിലും പതിപ്പുകള്‍ വന്നു.
അകാലത്തില്‍ വിടവാങ്ങിയ നാടക പ്രവര്‍ത്തകന്‍ മിഥുന്‍ മോഹന്റെ ഓര്‍മ്മയ്ക്കായാണ് നാടകം അവതരിപ്പിക്കുക എന്ന ചിന്തയിലേക്ക് എത്തിപ്പെടുന്നത്. ഡോണ്‍ ക്വിക് സോട്ടിന്റെ നാടകസാധ്യതകളെ കുറിച്ച് നിരന്തരം സംസാരിച്ചിരുന്നു മിഥുന്‍. അദ്ദേഹത്തിന്റെ ആശയത്തിന്റെയും സ്വപ്നത്തിന്റെയും സാക്ഷാത്ക്കാരമാണ് നോവലിന്റെ രംഗഭാഷ്യം. ഡോണ്‍ ക്വിക്സോട്ട്, നന്മയില്‍ ജോണ്‍കിഹോത്തെ എന്ന പേരില്‍ നാടകമാകുമ്പോള്‍ അതിനെ കേരളീയ പശ്ചാത്തലത്തിലേക്ക് കൊണ്ടുവരിക എന്ന വെല്ലുവിളിയാണ് സംവിധായകന്‍ നേരിട്ടത്. നോവലിനെ അതേപടി പകര്‍ത്തിവെയ്ക്കാതെ ഐതീഹ്യമാലയും വടക്കന്‍ പാട്ടുകളും, നാടോടി കഥകളും അതില്‍ കടന്നുവരുമ്പോള്‍ സ്പാനിഷ് നോവല്‍ വൈദേശികമെന്ന തോന്നല്‍ ഇല്ലാതാകുന്നു.പല കേരളീയ മിത്തുകളും നാടകത്തിലെ കഥാസന്ദര്‍ഭങ്ങളുമായി ബന്ധിപ്പിച്ചിരിക്കുന്നു.
നോവലില്‍ മാടമ്പിയായ ഡോണ്‍ ക്വിക്സോട്ട് നാടകത്തില്‍ ജോണ്‍ കിഹോതെ എന്ന ചേകവനാകുന്നു. ചേകവപട്ടത്തെ അയാള്‍ അതിനായക പട്ടം എന്നാണ് വിശേഷിപ്പിക്കുന്നത്. നോവലിലെ സാഞ്ചോ പാന്‍സോ കൃഷിക്കാരനാണെങ്കില്‍ നാടകത്തില്‍ തെങ്ങുകയറ്റക്കാരനാണ്. നമ്മുടെ നാട്ടില്‍ നല്ല ഗവര്‍ണറില്ല അതുകൊണ്ട് നിന്നെ ഞാന്‍ ഗവര്‍ണര്‍ ആക്കാം എന്ന് പറഞ്ഞാണ് സാഞ്ചോ പാന്‍സോയെ (നാടകത്തില്‍ സാഞ്ചോ പാച്ചന്‍) കൊണ്ട് പോകുന്നത്. ജോണ്‍ കിഹോത്തെ വായിക്കുന്നത് മുഴുവന്‍ പാര്‍ട്ടി സാഹിത്യമാണ്. സമത്വ സുന്ദരമായ ലോകം ഉണ്ടാകണമെന്നും അതിന് താന്‍ ഇറങ്ങണമെന്നും തീരുമാനിക്കുന്നു. ഈ കാലഘട്ടത്തില്‍ നിന്ന് ചേകവരുടെ കാലം തിരിച്ചുവരാന്‍ സ്വപ്നം കാണുന്ന ജോണ്‍ കിഹോതെ പറയുന്നു. ''മരക്കാര്‍ പടയും മികച്ചേരി പടയും യുദ്ധം ചെയ്യുന്നു ഇവരുടെ ഇടയില്‍ എങ്ങനെയാണ് സോവിയറ്റ് പട വന്നത്''. ക്വിക് സോട്ടിന്റെ കാമുകിയായ ഡല്‍സീനിയ അരങ്ങില്‍ പ്രത്യക്ഷപ്പെടുന്നില്ല. ചേവകപ്പട്ടം സ്വീകരിച്ചാല്‍ ഞാന്‍ നിനയ്ക്ക് വേണ്ടി സമത്വസുന്ദര ലോകം പണിയും എന്ന് കാമുകിയോട് പറയുന്നുണ്ട്.
നൂതനമായ ആഖ്യാന രീതികളാണ് നാടകത്തില്‍ സംവിധായകന്‍ അവതരിപ്പിച്ചിരിക്കുന്നത്. തദ്ദേശീയ വസ്ത്രധാരണത്തോടൊപ്പം വൈദേശികവും ഉപയോഗിക്കുന്നു. പാശ്ചാത്യവും കേരളീയവുമായ സംഗീതത്തിന്റെ ഫ്യൂഷനാണ് മറ്റൊരു പ്രത്യേകത. നോവലില്‍ അറുനൂറോളം കഥാപാത്രങ്ങള്‍ ഉള്ളപ്പോള്‍ നാടകത്തില്‍ മുപ്പതോളം കഥാപാത്രങ്ങളായി ചുരുങ്ങുന്നു. സജി തുളസിദാസ് ഡോണ്‍ ക്വിക് സോട്ടായും ഹരിദാസ് കോങ്ങാട് സാഞ്ചോ പാന്‍സോയായും വേഷമിടുന്നു. ഡോണിന്റെ കഥാപാത്രം അവതരിപ്പിക്കാന്‍ കഠിനമായ പരിശീലനത്തിലൂടെയാണ് സ്‌കൂള്‍ ഓഫ് ഡ്രാമയിലൂടെ രംഗത്ത് എത്തിയ സജി തുളസിദാസ് കടന്നുപോയത്. ഒന്നരമാസത്തില്‍ അധികം പൊന്നാനി കളരി സംഘത്തില്‍ ആയോധന മുറകള്‍ പഠിച്ചു. വലിയ ശാരീരിക അധ്വാനം ആവശ്യമായ ഈ നാടകത്തില്‍ കളരിപ്പയറ്റും അഭിനയവും എല്ലാം ഒന്നിച്ച് കൊണ്ടുപോകുക ഏറെ ശ്രമകരമാണ്. കളരിയില്‍ തിയേറ്ററിന്റെ സാധ്യത അന്വേഷിക്കുന്ന പൊന്നാനി കളരി സംഘത്തിന്റെ അമരക്കാരന്‍ ഷൈജു ഗുരുക്കളുടെ വരവ് നാടകത്തിന്റെ ഘടനയില്‍ തന്നെ ശ്രദ്ധേയമാറ്റങ്ങള്‍ക്ക് കാരണമായി. ഷൈജു വെളുത്ത ചന്ദ്രന്റെ മാടമ്പി എന്ന കഥാപാത്രം ചെയ്യുന്നുണ്ട്. പാതിരിയായി കണ്ണനുണ്ണിയും ഷഹരിയ രാജകുമാരിയായി ഫിദയും കപ്യാരായി സന്ദീപും അഭിനയിക്കുന്നു. സത്യന്‍ കോട്ടായി, ബിനി, ആദിത്യന്‍,അഷിന്‍ ബാബു, സിദ്ധാര്‍ഥ് , ഋതുന്‍ എന്നിവരും വേഷമിടുന്നു.
മിനിമലിസ്റ്റിക്ക് ആയിട്ടുള്ള സെറ്റാണ് ഷാന്റോ ഡിസൈന്‍ ചെയ്തിരിക്കുന്നത്. അഭിനേതാക്കള്‍ അവരുടെ ശരീരം കൊണ്ടാണ് സ്ഥലത്തെയും കാലത്തെയും അടയാളപ്പെടുത്താന്‍ ശ്രമിക്കുന്നത്. നാലുഭാഗവും തുറസ്സായ സ്റ്റേജില്‍ കളരിത്തറയാണ് പ്രധാനപ്പെട്ട സെറ്റ്. കൂടാതെ വീഡിയോ പ്രൊജക്ഷനും ഉപയോഗിക്കുന്നു. അനിമേഷന്‍ ആര്‍ട്ടിസ്റ്റായിരുന്ന മിഥുന്‍ മോഹന്‍ മരിക്കുന്നത്തിന് മുമ്പ് വരച്ച ചിത്രങ്ങള്‍ നാടകത്തില്‍ ആനിമേറ്റ് ചെയ്യുന്നു. മിഥുന്റെ സുഹൃത്തായ നിതീഷ് ലോഹിതാക്ഷനാണ് അതിന് പിന്നില്‍. സ്പോര്‍ട്ടീവ് തിയേറ്ററിലൂടെ സ്‌പോര്‍ട്‌സും തിയേറ്റര്‍ തമ്മിലുള്ള വിനിമയ സാധ്യതകള്‍ അലിയാര്‍ അലി നന്നായി ഉപയോഗിക്കുന്നു. കുട്ടികളുടെ നാടകകളരി എല്ലാവര്‍ഷവും നടത്തുന്ന മിന്നാടവും കളരിയുടെ സാധ്യതകള്‍ തിയേറ്ററില്‍ ഉപയോഗിക്കുന്ന വി പി എസ് കളരി സംഘവും നാടകം എന്ന ഹൈബ്രിഡ് ഫോമിന്റെ പുതിയ ആവിഷ്‌കാര സാധ്യതകളെ തുറന്നിടുന്നു.
Content Highlights: quixotic-quest-don-quixote-rides-into-malayalam-theaters
