റിപ്പോർട്ടർ മെഗാ പ്രീപോൾ സർവ്വെ: ആറ്റിങ്ങൽ യുഡിഎഫ് നിലനിർത്തും

ആറ്റിങ്ങൽ യുഡിഎഫ് നിലനിർത്തുമെന്ന് പ്രവചിച്ച് റിപ്പോർട്ടർ മെഗാ പ്രീപോൾ സർവ്വെ. 2019ലെ വിജയം യുഡിഎഫ് ആവർത്തിക്കുമെന്നാണ് സർവ്വെയിൽ പങ്കെടുത്ത ഭൂരിപക്ഷവും അഭിപ്രായപ്പെടുന്നത്. ആറ്റിങ്ങലിൽ യുഡിഎഫ് വിജയം ആവർത്തിക്കുമെന്ന് സർവ്വെയിൽ പങ്കെടുത്ത 37.7 ശതമാനം ആളുകളും അഭിപ്രായപ്പെടുമ്പോൾ 31.4 ശതമാനം എൽഡിഎഫ് വിജയിക്കുമെന്നാണ് അഭിപ്രായപ്പെടുന്നത്. ബിജെപി വിജയിക്കുമെന്ന് 28.2 ശതമാനം പേർ അഭിപ്രായപ്പെട്ടു. അറിയില്ലെന്ന് 2.7 പേരും അഭിപ്രായപ്പെട്ടു. 2024 ജനുവരി 28 മുതൽ ഫെബ്രുവരി എട്ട് വരെയുള്ള ജനാഭിപ്രായങ്ങളാണ് സർവെയിൽ ഉൾക്കൊള്ളിച്ചിരിക്കുന്നത്. ആറ്റിങ്ങൽ ലോക്സഭാ മണ്ഡലത്തിലെ 19223 വോട്ടർമാർ പങ്കാളികളായ സാമ്പിൾ സർവെയിലൂടെയാണ് മണ്ഡലത്തിലെ ജനങ്ങളുടെ അഭിപ്രായം ക്രോഡീകരിച്ചിരിക്കുന്നത്.

സിറ്റിങ്ങ് എം പിയുടെ പ്രവർത്തനം ശരാശരിയെന്ന് 45.5 ശതമാനം പേർ അഭിപ്രായപ്പെട്ടു. മോശമെന്ന് 21.1 ശതമാനവും വളരെ മോശമെന്ന് 8.2 ശതമാനവും അഭിപ്രായപ്പെട്ടു. മികച്ചതെന്ന് 17 ശതമാനവും വളരെ മികച്ചതെന്ന് 5 ശതമാനവും അഭിപ്രായപ്പെട്ടു. അറിയില്ല, അഭിപ്രായമില്ലെന്ന് അഭിപ്രായപ്പെട്ടത് 3.2 ശതമാനമാണ്.

പിണറായി വിജയൻ സർക്കാരിൻ്റെ പ്രവർത്തനം ശരാശരിയെന്ന അഭിപ്രായക്കാരാണ് സർവ്വെയിൽ പങ്കെടുത്ത 32.5 ശതമാനം ആളുകളും. വളരെ മോശമെന്ന് സർവ്വെയിൽ പങ്കെടുത്ത 22.9 ശതമാനം പേർ അഭിപ്രായപ്പെട്ടപ്പോൾ 22.1 ശതമാനം സർക്കാരിൻ്റെ പ്രവർത്തനം മോശമെന്ന അഭിപ്രായക്കാരാണ്. സർക്കാർ മികച്ചതാണെന്ന് അഭിപ്രായമുള്ളത് 17.4 ശതമാനത്തിനാണ്. 4.5 ശതമാനം പിണറായി വിജയൻ സർക്കാരിൻ്റെ പ്രവർത്തനം വളരെ മികച്ചതെന്നും അഭിപ്രായപ്പെടുന്നു. 0.6 ശതമാനം അറിയില്ലെന്ന് അഭിപ്രായമാണ് പങ്കുവെച്ചത്.

പിണറായി സർക്കാരിൻ്റെ രണ്ടാമൂഴം മോശമെന്നാണ് 72.3 ശതമാനത്തിൻ്റെയും അഭിപ്രായം. രണ്ട് സർക്കാരും ഒരുപോലെയെന്ന് 20.2 ശതമാനം അഭിപ്രായപ്പെട്ടു. നിലവിലെ സർക്കാർ നേരത്തെക്കാൾ മെച്ചപ്പെട്ടു എന്ന അഭിപ്രായമുള്ളത് 5.2 ശതമാനത്തിനാണ്. അറിയില്ലെന്ന് 2.3 ശതമാനവും അഭിപ്രായപ്പെട്ടു.

പ്രതിപക്ഷത്തിൻ്റെ പ്രകടനം ശരാശരിയെന്ന് അഭിപ്രായ സർവ്വെയിൽ പങ്കെടുത്ത 44.5 ശതമാനം പറയുന്നു. പ്രകടനം മോശമെന്ന് 26.1 ശതമാനവും വളരെ മോശമെന്ന് 16.9 ശതമാനവും അഭിപ്രായപ്പെടുന്നു. പ്രതിപക്ഷത്തിൻ്റെ പ്രകടനത്തിന് മികച്ചതെന്ന മാർക്ക് നൽകുന്ന 10.2 ശതമാനവും വളരെ മികച്ചതെന്ന് അംഗീകരിക്കുന്ന 1.2 ശതമാനവുമുണ്ട്. അറിയില്ലെന്ന് 1.1 ശതമാനമാണ് അഭിപ്രായപ്പെടുന്നത്.

ലോക്സഭാ തിരഞ്ഞെടുപ്പിൽ കേരളത്തിൻ്റെ ജനഹിതം അറിയുന്നതിന് വേണ്ടി തയ്യാറാക്കിയതാണ് റിപ്പോർട്ടർ മെഗാ പ്രീപോൾ സർവെ. കേരളത്തിലെ 20 ലോക്സഭാ മണ്ഡലങ്ങളിലെയും ജനവികാരം പ്രതിഫലിക്കുന്ന അഭിപ്രായങ്ങൾ ക്രോഡീകരിച്ചാണ് റിപ്പോർട്ടർ ടിവിയുടെ സർവെ തയ്യാറാക്കിയിരിക്കുന്നത്. ആറ്റിങ്ങൽ മണ്ഡലത്തിലെ ജനങ്ങൾ പ്രതികരിച്ച ചോദ്യാവലിയും സർവെയിൽ പങ്കെടുത്തവരുടെ അഭിപ്രായങ്ങളും വിശദമായി താഴെവായിക്കാം.