റിപ്പോര്‍ട്ടര്‍ മെഗാ പ്രീപോള്‍ സര്‍വ്വെ: വടകരയില്‍ ഫോട്ടോ ഫിനിഷ്, ഭാഗ്യം എല്‍ഡിഎഫിനൊപ്പം

ശക്തമായ പോരാട്ടം പ്രവചിക്കപ്പെടുന്ന വടകരയില്‍ ജനഹൃദയം എല്‍ഡിഎഫിനൊപ്പം നില്‍ക്കുമെന്ന് പ്രവചിച്ച് റിപ്പോര്‍ട്ടര്‍ മെഗാ പ്രീപോള്‍ സര്‍വ്വെ. വടകരയില്‍ ഇത്തവണ ഇഞ്ചോടിഞ്ച് പോരാട്ടമാണ് റിപ്പോര്‍ട്ടര്‍ സര്‍വ്വേ പ്രവചിക്കുന്നത്. യുഡിഎഫിന്റെ സിറ്റിങ് മണ്ഡലം നേരിയ ഭൂരിപക്ഷത്തില്‍ എല്‍ഡിഎഫിനൊപ്പം നില്‍ക്കും. സര്‍വ്വേയില്‍ പങ്കെടുത്തവരില്‍ 44.3 ശതമാനം പേര്‍ യുഡിഎഫിനെ പിന്തുണച്ചപ്പോള്‍, 45.2 ശതമാനം ആളുകള്‍ പറഞ്ഞത് വിജയം എല്‍ഡിഎഫിനെന്നാണ്. 10.5 ശതമാനം ആളുകള്‍ ബിജെപി മണ്ഡലത്തില്‍ വരുമെന്നാണ് അഭിപ്രായപ്പെട്ടത്. അറിയില്ലെന്ന് ആരും അഭിപ്രായപ്പെട്ടില്ല. 2024 ജനുവരി 28 മുതല്‍ ഫെബ്രുവരി എട്ട് വരെയുള്ള ജനാഭിപ്രായങ്ങളാണ് സര്‍വ്വെയില്‍ ഉള്‍ക്കൊള്ളിച്ചിരിക്കുന്നത്. കണ്ണൂര്‍ ലോക്‌സഭാ മണ്ഡലത്തിലെ 19,223 വോട്ടര്‍മാര്‍ പങ്കാളികളായ സാമ്പിള്‍ സര്‍വെയിലൂടെയാണ് മണ്ഡലത്തിലെ ജനങ്ങളുടെ അഭിപ്രായം ക്രോഡീകരിച്ചിരിക്കുന്നത്.

വടകരയിലെ സിറ്റിങ് എംപിയായ കെ മുരളീധരന്റെ പ്രവര്‍ത്തനം ശരാശരിയെന്നാണ് സര്‍വ്വെയില്‍ പങ്കെടുത്ത 38.9 ശതമാനം പേര്‍ പറഞ്ഞത്. വളരെ മോശമെന്ന് 19.4 ശതമാനം ആളുകള്‍ അഭിപ്രായപ്പെട്ടപ്പോള്‍, മികച്ചതെന്ന് 18 ശതമാനം ആളുകളാണ് പറഞ്ഞത്. വളരെ മികച്ചതെന്ന് 9.4 ശതമാനവും മോശമെന്ന് 10.4 ശതമാനം ആളുകളും അഭിപ്രായപ്പെട്ടു. അറിയില്ല അല്ലെങ്കില്‍ അഭിപ്രായമില്ലെന്ന് പറഞ്ഞത് 3.9 ശതമാനം ആളുകളാണ്.

കേരളത്തിലെ പിണറായി സര്‍ക്കാരിനെ കുറിച്ചുള്ള അഭിപ്രായം എന്തെന്ന ചോദ്യത്തിന് ശശാശരിയെന്നാണ് കൂടുതല്‍ പേരും പ്രതികരിച്ചത്. 44.5 ശതമാനം ആളുകളാണ് ശരാശരിയെന്ന് അഭിപ്രായപ്പെട്ടത്. വളരെ മോശമെന്ന് 24.4 ശതമാനവും മികച്ചതെന്ന് 14.6 ശതമാനമാളുകളും അഭിപ്രായപ്പെട്ടു. മോശമെന്ന് പറഞ്ഞത് 12.9 ശതമാനം ആളുകളാണ്. എന്നാല്‍ വളരെ മികച്ചതെന്ന് അഭിപ്രായം പറഞ്ഞത് 2.7 ശതമാനം മാത്രമാണ്. അറിയില്ലെന്ന് 0.9 ശതമാനവും പ്രതികരിച്ചു.

ഒന്നാം പിണറായി സര്‍ക്കാരുമായി താരതമ്യം ചെയ്യുമ്പോള്‍ രണ്ടാം പിണറായി സര്‍ക്കാരിന്റെ പ്രവര്‍ത്തനം മോശമായെന്ന് 70.9 ശതമാനം ആളുകള്‍ പറഞ്ഞു. രണ്ട് ടേമുകളും ഒരു പോലെയാണെന്നാണ് 20.9 ശതമാനം പേര്‍ പറഞ്ഞത്. രണ്ടാം ടേമില്‍ സര്‍ക്കാരിന്റെ പ്രവര്‍ത്തനം മെച്ചപ്പെട്ടെന്ന് 6.3 ശതമാനമാളുകളാണ് അഭിപ്രായപ്പെട്ടത്. അറിയില്ലെന്ന് 1% ശതമാനവും പറഞ്ഞു.

സംസ്ഥാനത്തെ പ്രതിപക്ഷത്തിന്റെ പ്രവര്‍ത്തനം വളരെ മോശമെന്നാണ് സര്‍വ്വേയില്‍ പങ്കെടുത്ത 40.3 ശതമാനം ആളുകളും അഭിപ്രായപ്പെട്ടത്. ശരാശരിയെന്ന് 19 ശതമാനവും മോശമെന്ന് 17.5 ശതമാനവും മികച്ചതെന്ന് 12.2 ശതമാനം ആളുകളും അഭിപ്രായം വ്യക്തമാക്കി. എന്നാല്‍ 6 ശതമാനം ആളുകള്‍ മാത്രമാണ് പ്രതിപക്ഷത്തിന്റെ പ്രവര്‍ത്തനം വളരെ മികച്ചതെന്ന് പറഞ്ഞത്. അറിയില്ലെന്ന് 5 ശതമാനം ആളുകളും സര്‍വ്വെയില്‍ അഭിപ്രായപ്പെട്ടു.

ലോക്‌സഭാ തിരഞ്ഞെടുപ്പില്‍ കേരളത്തിന്റെ ജനഹിതം അറിയുന്നതിന് വേണ്ടി തയ്യാറാക്കിയതാണ് റിപ്പോര്‍ട്ടര്‍ മെഗാ പ്രീപോള്‍ സര്‍വ്വെ. കേരളത്തിലെ 20 ലോക്‌സഭാ മണ്ഡലങ്ങളിലെയും ജനവികാരം പ്രതിഫലിക്കുന്ന അഭിപ്രായങ്ങള്‍ ക്രോഡീകരിച്ചാണ് റിപ്പോര്‍ട്ടര്‍ ടിവിയുടെ സര്‍വ്വെ തയ്യാറാക്കിയിരിക്കുന്നത്. എറണാകുളം മണ്ഡലത്തിലെ ജനങ്ങള്‍ പ്രതികരിച്ച ചോദ്യാവലിയും സര്‍വ്വെയില്‍ പങ്കെടുത്തവരുടെ അഭിപ്രായങ്ങളും വിശദമായി താഴെവായിക്കാം.