തിരുവനന്തപുരം: കുവൈറ്റ് ദുരന്തം അങ്ങേയറ്റം ദൗർഭാഗ്യകരമായ സംഭവമായെന്നും ദുരന്തത്തെ ചർച്ചകളിൽ ഒതുക്കരുത് എന്നും യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിൽ. പ്രയാസമേറിയ ജീവിത സാഹചര്യത്തിൽ ജീവിക്കുന്ന വളരെയധികം പ്രവാസികൾ ഉണ്ട്. ഇവരുടെ ജീവിതം മെച്ചപ്പെടുത്തുന്നതിനുള്ള ജാഗ്രത വേണമെന്നാണ് ഈ സംഭവം വെളിപ്പെടുത്തുന്നത്. വീടിനും നാടിനും വേണ്ടി കഷ്ടപ്പെടുന്നവരുടെ ആയുസ്സും ആരോഗ്യവും സംരക്ഷിക്കേണ്ട ബാധ്യത മാറിമാറി വരുന്ന സർക്കാരുകൾക്കുണ്ട് . രാഹുൽ മാങ്കൂട്ടത്തിൽ കൂട്ടിച്ചേർത്തു. ഇതൊരു കുറ്റപ്പെടുത്തൽ അല്ലെന്നും വിദേശത്തുള്ള ഔദ്യോഗിക സർക്കാർ സംഘടനകൾ ഈ ദൗത്യം ഏറ്റെടുക്കണമെന്നും രാഹുൽ പറഞ്ഞു. കുവൈറ്റിൽ മരിച്ച പന്തളം സ്വദേശി ആകാശ് ശശിധരന്റെ വീട് സന്ദർശിച്ച രാഹുൽ മാധ്യമങ്ങൾക്ക് നൽകിയ പ്രതികരണത്തിൽ രാഹുൽ ദുരന്തത്തിൽ മരിച്ചവർക്ക് അനുശോചനം അറിയിച്ചു.
അതേസമയം കുവൈറ്റിലെ തീപിടിത്തത്തിൽ മരിച്ച മലയാളികളുടെ മൃതദേഹങ്ങളുമായി വ്യോമസേനയുടെ പ്രത്യേക വിമാനം കൊച്ചിയിലെത്തി. സംസ്ഥാന സർക്കാരിനെ പ്രതിനിധീകരിച്ച് മുഖ്യമന്ത്രി പിണറായി വിജയനും മന്ത്രിമാരും മൃതദേഹം ഏറ്റുവാങ്ങാൻ വിമാനത്താവളത്തിലെത്തി. 23 മലയാളികളടക്കം 31 പേരുടെ മൃതുതദേഹങ്ങളാണ് കൊച്ചിയിലെത്തിച്ചത്. കേന്ദ്ര സഹമന്ത്രി സുരേഷ് ഗോപിയും വിമാനത്താവളത്തിലെത്തി. മൃതദേഹങ്ങൾ പ്രത്യേകം ക്രമീകരിച്ച ആംബുലൻസുകളിൽ വീടുകളിലെത്തിക്കും.
കുവൈറ്റിലെ മംഗെഫ് ബ്ലോക്ക് നാലില്‍ പ്രവാസി മലയാളിയുടെ ഉടമസ്ഥതയിലുള്ള എന്‍ബിടിസി കമ്പനിയിലെ ജീവനക്കാരുടെ താമസക്കെട്ടിടത്തില്‍ ബുധനാഴ്ചയാണ് അഗ്‌നിബാധയുണ്ടാകുന്നത്. തീപിടിത്തതിന് കാരണം ഷോര്‍ട്ട് സര്‍ക്യൂട്ടാണെന്നാണ് കുവൈറ്റ് ഫയര്‍ഫോഴ്‌സിന്റെ അന്വേഷണ റിപ്പോര്‍ട്ട്. ഗാര്‍ഡിന്റെ റൂമില്‍ നിന്നാണ് തീപിടിത്തമുണ്ടായതെന്നും ഫയര്‍ഫോഴ്‌സ് പ്രസ്താവനയില്‍ വ്യക്തമാക്കി. അപകടത്തില്‍ മരിച്ചത് 50 ഇന്ത്യക്കാരെന്നാണ് ഔദ്യോഗിക സ്ഥിരീകരണം. ഇതില്‍ 46 പേരെ തിരിച്ചറിഞ്ഞു. സുരക്ഷാ വീഴ്ചയുടെ പേരിൽ രണ്ട് പേർ റിമാൻഡിലായതായി കുവൈറ്റ് വാർത്താ ഏജൻസി അറിയിച്ചു. ഒരു കുവൈറ്റ് പൗരനും ഒരു വിദേശ പൗരനും ആണ് റിമാൻഡിലായതെന്നും റിപ്പോർട്ടിൽ പറയുന്നു. എന്നാൽ ഇവരുടെ പേര് വിവരങ്ങൾ അധികൃതർ പുറത്തുവിട്ടിട്ടില്ല. ചട്ട ലംഘനങ്ങളുടെ പേരിലാണ് നടപടി.
