LIVE BLOG: ഇന്നത്തെ രക്ഷാപ്രവർത്തനം അവസാനിപ്പിച്ചു; നാളെ രാവിലെ ആറരയോടെ ദൗത്യം വീണ്ടും ആരംഭിക്കും

അർജുൻ്റെ തിരച്ചിലിന് കർണാടക സ‍ർക്കാർ ഐഎസ്ആ‍ർഒയുടെ സഹായം തേടി

അർജുനെ കണ്ടെത്തുന്നതിനായി ഐഎസ്ആർഒയുടെ സഹായം തേടി കർണാടക സർക്കാർ. ഉപഗ്രഹ ചിത്രങ്ങൾ ലഭ്യമാക്കാനാണ് സഹായം തേടിയത് കെ സി വേണുഗോപാൽ എം പി അറിയിച്ചു. ഐഎസ്ആർഒ ചെയർമാനുമായി സംസാരിച്ചു. തിരച്ചിലിന് ഐഎസ്ആർഒ സഹായിക്കുമെന്ന് ചെയർമാൻ ഉറപ്പ് നൽകിയതായും കെ സി വേണുഗോപാൽ അറിയിച്ചു.

അ‍ർജുൻ്റെ തിരച്ചിലിനായി ബൽഗാമിൽ നിന്ന് 40 അംഗ കരസേനാ യൂണിറ്റ് എത്തും

അർജനെ കണ്ടെത്താനുള്ള തിരച്ചിലിനായി ബൽഗാമിൽ നിന്ന് 40 അംഗ കരസേനാ യൂണിറ്റ് എത്തും. രാവിലെ 11 മണിയോടെ തിരച്ചിൽ ആരംഭിക്കും.

കർണാടക സര്ക്കാര് ഗൗരവമായി ഇടപെടണം; വി വസീഫ്

ഷിരൂരിൽ സൈന്യം എത്തുമെന്ന് പ്രതീക്ഷിക്കുന്നതായി ഡിവൈഎഫ്ഐ സംസ്ഥാന പ്രസിഡൻ്റ് വി വസീഫ്. സൈന്യം വേണമെന്ന് ഡിവൈഎഫ്ഐ ആവശ്യപ്പെട്ടു. അഞ്ച് ദിവസമായിട്ടും പ്രതീക്ഷ നൽകുന്ന വിവരങ്ങൾ വരുന്നില്ല. കർണാടക സര്ക്കാര് ഗൗരവമായി ഇടപെടണമെന്നും വി വസീഫ് ആവശ്യപ്പെട്ടു.

ബൽഗാമിൽ നിന്നും കരസേന സംഘം ഉടൻ പുറപ്പെടും

അർജുനെ കണ്ടെത്താനുള്ള തിരച്ചിലിനായി ബൽഗാമിൽ നിന്നും കരസേന സംഘം ഉടൻ പുറപ്പെടും. രാവിലെയോടെ കരസേന തിരച്ചിൽ ഏറ്റെടുക്കും.

സൈന്യം നാളെ എത്തുമെന്ന് ഡി കെ ശിവകുമാർ അറിയിച്ചു; എം കെ രാഘവൻ എം പി

സൈന്യം നാളെ എത്തുമെന്ന് കർണാടക ഉപമുഖ്യമന്ത്രി ഡി കെ ശിവകുമാർ ഫോണിൽ വിളിച്ച് അറിയിച്ചതായി എം കെ രാഘവൻ എംപി.സൈന്യം രാവിലെ എത്തും.

അർജുനായി കര-നാവിക സേനകൾ നാളെ സംയുക്തമായി തിരച്ചിൽ നടത്തും

ബൽഗാം ഡിവിഷനിൽ നിന്നുള്ള കരസേന യൂണിറ്റും കർവാറിൽ നിന്നുള്ള നാവിക സേനാ വിഭാഗവും സംയുക്തമായി നാളെ തിരച്ചിൽ നടത്തും.

'സേവ് അർജുൻ', നാട്ടുകാര്‍ പ്രതിഷേധിക്കുന്നു

അർജുൻ്റെ നാട്ടിൽ നാട്ടുകാരുടെ പ്രതിഷേധം. രക്ഷാ പ്രവർത്തനം വേഗത്തിൽ അവസാനിപ്പിച്ചതിനെ തുടർന്നാണ് പ്രതിഷേധം. കോഴിക്കോട് കണ്ണാടിക്കലിൽ നാട്ടുകാർ റോഡിൽ ഇരുന്നു പ്രതിഷേധിക്കുന്നു. രക്ഷാ പ്രവർത്തനത്തിൽ കർണാടക തുടരുന്ന അലംഭാവം അവസാനിപ്പിക്കണമെന്ന് ആവശ്യം

കരസേനയും നാളെ എത്തും

അര്‍ജുനായുള്ള രക്ഷാപ്രവര്‍ത്തനത്തിന് കരസേനയുമെത്തും. നാളെ രാവിലെ ആറരക്ക് ആരംഭിക്കുന്ന രക്ഷാപ്രവര്‍ത്തനത്തില്‍ എന്‍ഡിആര്‍എഫ്, എസ്ആര്‍ഡിഎഫ് സംഘങ്ങള്‍ക്കൊപ്പം കരസേനയും തിരച്ചിലിനിറങ്ങും.

ഉദ്യോഗസ്ഥർ വിളിക്കാതെ സൈന്യത്തിന് വരാൻ കഴിയില്ല: അർജുൻ്റെ സഹോദരി

ഉദ്യോഗസ്ഥർ വിളിക്കാതെ സൈന്യത്തിന് വരാനാവില്ലെന്ന് അർജുൻ്റെ സഹോദരി. ആറു മണിക്കൂർ കൊണ്ട് എത്താവുന്ന ദൂരത്തിൽ സൈന്യം ഉണ്ട്. ആർമി എത്തിയാൽ എല്ലാം ശരിയാകുമെന്നും സഹോദരി. അഞ്ച് ദിവസം കഴിഞ്ഞൂ. ഇനി പ്രതീക്ഷയൊന്നുമില്ല. ഞങ്ങളുടെ മാനസികാവസ്ഥ ആരും പരിഗണിക്കുന്നില്ല. ഫോഴ്സ് റെഡി ആയിട്ടും ആരാണ് വിളിക്കാത്തത്. ഷോ ആയിട്ട് വന്നതല്ല. ഞങ്ങളുടെ ആവശ്യം ആണിതെന്നും അർജുൻ്റെ സഹോദരി വ്യക്തമാക്കി.

ഇന്നത്തെ രക്ഷാപ്രവർത്തനം അവസാനിപ്പിച്ചു
മഴ ശക്തമായതോടെ അർജുനായുള്ള ഇന്നത്തെ രക്ഷാപ്രവർത്തനം അവസാനിപ്പിക്കാൻ തീരുമാനം. ചീഫ് സെക്രട്ടറിയുമായി അടക്കമുള്ള ഉന്നത ഉദ്യോഗസ്ഥർ സംഭവസ്ഥലത്ത് എത്തി. നാളെ രാവിലെ 6 30 ഓടുകൂടി രക്ഷാദൗത്യം വീണ്ടും ആരംഭിക്കും. പ്രദേശത്ത് വീണ്ടും മഴ പെയ്തതാണ് തിരച്ചിലിന് തിരിച്ചടിയായത്.

തിരച്ചിൽ നിർത്തി

പ്രതികൂല കാലാവസ്ഥയെ തുടർന്ന് അർജുനായുള്ള തിരച്ചിൽ നിർത്തി.

വേഗം കൂട്ടി രക്ഷാദൗത്യം, രാത്രിയും ദൗത്യം തുടരും

വേഗം കൂട്ടി രക്ഷാദൗത്യം. രാത്രിയും ദൗത്യം തുടരും. ഇന്നു രാത്രി തന്നെ കണ്ടെത്താൻ തീവ്രശ്രമം. കണ്ടെത്തിയാൽ ഉടൻ മണിപ്പാൽ മെഡിക്കൽ കോളേജിലെത്തിക്കാൻ ആംബുലൻസുകളും തയ്യാർ. മുഖ്യമന്ത്രി നേരിട്ട് വിവരങ്ങൾ ശേഖരിക്കുന്നു.

ട്രക്ക് ഉണ്ടെന്നു കരുതുന്ന പ്രദേശം കണ്ടെത്തി

രണ്ടാംഘട്ട റഡാർ പരിശോധനയിൽ ട്രക്ക് ഉണ്ടെന്നു കരുതുന്ന പ്രദേശം കണ്ടെത്തി. മണ്ണിനടിയിൽ ഉണ്ടാവാൻ 60 ശതമാനം സാധ്യതയെന്ന് അധികൃതർ. ഇവിടെ മണ്ണു നീക്കാനുള്ള ശ്രമങ്ങൾ തുടരുന്നു. രക്ഷാപ്രവർത്തനത്തിന് വെല്ലുവിളി ഉയർത്തി വീണ്ടും ഇടവിട്ട് ശക്താമായ മഴ പെയ്യുന്നു.

അർജുനനായുള്ള തിരച്ചിൽ തുടരുന്നു;  പ്രദേശത്ത് ഇടവിട്ട മഴ, മണ്ണ് നീക്കം മന്ദഗതിയിൽ

അർജുനായുള്ള തിരച്ചിൽ പുരോഗമിക്കുന്നു. അപകടം നടന്ന പ്രദേശത്ത് ഇടവിട്ട് മഴ പെയ്യുന്നതിനാൽ മണ്ണ് നീക്കം മന്ദഗതിയിലാണ്. കേന്ദ്രമന്ത്രി എച്ച് ഡി കുമാരസ്വാമി അപകടസ്ഥലം സന്ദർശിച്ചു. സംസ്ഥാന സർക്കാർ ആവശ്യപ്പെട്ടാൽ എല്ലാ സഹായവും കേന്ദ്രം നൽകുമെന്ന് വ്യക്തമാക്കിയ കുമാരസ്വാമി രാഷ്ട്രീയ ആരോപണം ഉന്നയിക്കാൻ ഇല്ലെന്നും പറഞ്ഞു. രക്ഷാദൗത്യം വിലയിരുത്തുന്നുണ്ടെന്നും മന്ത്രി അറിയിച്ചു.

ആന്ധ്രയിൽ നിന്ന് കൂടുതൽ എൻഡിആർഎഫ്  സംഘം എത്തും; ശേഖർ കുര്യാക്കോസ്
ആന്ധ്രയിൽ നിന്ന് കൂടുതൽ എൻഡിആർഎഫ്  സംഘം എത്തുമെന്ന് സംസ്ഥാന ദുരന്തനിവാരണ സമിതി അംഗം ശേഖർ കുര്യാക്കോസ്. മനുഷ്യവിഭവശേഷി എത്തിക്കണമെന്നും ജെസിബി കൂടുതൽ എത്തിക്കാൻ പരിമിതിയുണ്ടെന്നും അദ്ദേഹം വ്യക്തമാക്കി.

കർണാടകയിലേക്ക് മന്ത്രിമാർ പോകാത്തത് സർക്കാരിന്റെ കുറ്റകരമായ അനാസ്ഥ: കെ സുരേന്ദ്രൻ

കർണാടകയിൽ മണ്ണിടിച്ചിലിൽ കുടുങ്ങിയ മലയാളി ഡ്രൈവർ അർജുന്റെ രക്ഷാപ്രവർത്തനത്തിലേക്ക് സംസ്ഥാന മന്ത്രിമാർ എത്താതിരുന്നത് സർക്കാരിന്റെ കുറ്റകരമായ അനാസ്ഥയാണെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ. എല്ലാം ശരിയായ കുവൈറ്റിലേക്ക് പോകാൻ ബാഗുമായി വിമാനത്താവളത്തിലെത്തിയ മന്ത്രിമാർ എന്താണ് തൊട്ടപ്പുറത്ത് അർജുനെ രക്ഷിക്കാൻ പോകാത്തതെന്നും അദ്ദേഹം പ്രസ്താവനയിൽ ചോദിച്ചു. അർജുന്റെ കാര്യത്തിൽ കേരള സർക്കാരിന്റെ ഭാഗത്ത് നിന്നും ഒരു ഇടപെടലുമുണ്ടായില്ലെന്നത് ഞെട്ടിക്കുന്നതാണ്. ഒരു മലയാളിക്ക് ഇത്രയും വലിയ ദുരവസ്ഥ വന്നിട്ടും ആരും തിരിഞ്ഞുനോക്കിയില്ല. കർണാടക സർക്കാർ വൈര്യനിര്യാതന ബുദ്ധിയോടെയാണ് ഇടപെട്ടത്. കർണാടക സർക്കാരിന്റെ അനാസ്ഥയ്ക്കെതിരെ ബിജെപി ശക്തമായ പ്രതിഷേധം നടത്തുമെന്നും കെ സുരേന്ദ്രൻ പറഞ്ഞു.

രക്ഷാ പ്രവർത്തനം നിർത്തി വെക്കാൻ പാടില്ല; അർജുൻ്റെ സഹോദരി

രക്ഷാ പ്രവർത്തനം നിർത്തിവെയ്ക്കാൻ പാടില്ലെന്ന് ആവശ്യപ്പെട്ട് അർജുൻ്റെ സഹോദരി. വിദഗ്ധരെ കൊണ്ട് പോയപ്പോൾ ഉന്നത പോലീസ് ഉദ്യോഗസ്ഥൻ മർദ്ദിക്കുന്നു. കർണാടക രക്ഷാ പ്രവർത്തനത്തിൽ എപ്പോഴേ വിശ്വാസം നഷ്ടപ്പെട്ടു. പ്രധാനമന്ത്രി, മുഖ്യമന്ത്രി തുടങ്ങി എല്ലാവർക്കും മെയിൽ അയച്ചിട്ടുണ്ട്. പ്രതീക്ഷകൾ നഷ്ടപ്പെട്ടത് കൊണ്ടാണ് ഇത്തരം ആവശ്യവുമായി വരുന്നതെന്നും സഹോദരി വ്യക്തമാക്കി. സഹായ സഹകരണങ്ങൾ ഉണ്ടാകുന്നില്ല. അവർക്ക് പറ്റുന്നില്ലെങ്കിൽ മറ്റ് വഴികൾ നോക്കണം. കേന്ദ്രമന്ത്രി പറയുന്നത് രണ്ട് ദിവസം കാത്തിരിക്കൂ എന്നാണ്. ഇനി ഇങ്ങനെ ഒരു അവസ്ഥ ആർക്കും ഉണ്ടാകാൻ പാടില്ല. സംവിധാനങ്ങളിൽ വിശ്വാസം നഷ്ടപ്പെടുന്നു. മിലിട്ടറിയുടെ ആവശ്യം ഇല്ലെങ്കിൽ അഞ്ച് ദിവസം കൊണ്ട് എന്ത് കൊണ്ട് കണ്ടെത്താൻ ആയില്ലെന്നും സഹോദരി ചോദിച്ചു.

പൊലീസ് സ്റ്റേഷനിൽ അപകടം നടന്ന ദിവസം തന്നെ പരാതി നൽകിയതാണ്.ഇപ്പോൾ അറിഞ്ഞില്ലെന്നു പറയുകയാണ്. പരാതി നൽകിയതിൻ്റെ തെളിവുകൾ പക്കലുണ്ട്. പൊലീസ് സ്റ്റേഷനിൽ കുറെ കയറി ഇറങ്ങി. ആദ്യ ദിനങ്ങളിൽ തന്നെ ബന്ധുക്കൾ സ്ഥലത്ത് ഉണ്ട്. പക്ഷെ അവർ അല്ലാതെ രക്ഷാ പ്രവർത്തനം നടക്കുന്നിടത്ത് ആരും ഉണ്ടായിരുന്നില്ല. ഷിരൂരിൽ അധികൃതർ ബന്ധുക്കളെ കബളിപ്പിക്കുക ആയിരുന്നു. ഒരാളെ കണ്ടെത്താൻ നടത്തിയ തിരച്ചിലിൽ കുറെ ട്രക്കുകൾ കണ്ടെത്തിയെന്നും കുടുംബം ചൂണ്ടിക്കാണിച്ചു.

മണ്ണിനടിയിലെൻ്റെ ചോര; അർജുൻ്റെ അമ്മ

നാല് ദിവസം കഴിഞ്ഞിട്ടും അർജുനെ കണ്ടെത്താത്തതിനാൽ പ്രതികരണവുമായി കുടുംബം. മണ്ണിനടിയിൽ എൻ്റെ ചോരയാണെന്ന് പറഞ്ഞ അർജുൻ്റെ അമ്മ ഷീല എത്രയും വേഗം മോനെ തിരികെ വേണമെന്നും ആവശ്യപ്പെട്ടു. രണ്ട് ദിവസം ഉദ്യോഗസ്ഥർ അശ്രദ്ധ കാണിച്ചു. ആദ്യത്തെ രണ്ട് ദിവസം ഉദ്യോഗസ്ഥര്‍ സഹായിക്കുമെന്നാണ് കരുതിയത്. ഇത്ര ദിവസമായിട്ടും അനക്കം കാണാതെയാണ് പ്രതികരിക്കുന്നതെന്നും ഷീല വ്യക്തമാക്കി. ദൃക്സാക്ഷികൾ പറയുന്നത് പോലും കേൾക്കാൻ ഉദ്യോഗസ്ഥർ തയ്യാറാകുന്നില്ല. കർണാടക സംവിധാനത്തിൽ വിശ്വാസം കുറഞ്ഞു. കർണാടക എസ്പി ലോറി ഓണറെ മർദ്ദിക്കുന്നു. ഇപ്പോൾ ഭയം ഉണ്ട്. കാര്യങ്ങള്‍ പുറം ലോകം അറിയണം. മകന് ജീവനുണ്ടോ എന്ന് പോലും അറിയാൻ പറ്റുന്നില്ല. രക്ഷാ പ്രവർത്തനത്തിന് കേരളത്തിൽ നിന്നുള്ള വിദഗ്ധരെ അയക്കണം. എല്ലാവർക്കും നീതി കിട്ടണം. മൃതദേഹങ്ങളും വഹാനങളും കണ്ടെടുത്തത് എല്ലാം പുറം ലോകം അറിയണമെന്നും ഷീല ആവശ്യപ്പെട്ടു.

ഉത്തര കന്നഡയിൽ ഇന്ന് റെഡ് അലേര്‍ട്ട്

കര്‍ണാടക മുഖ്യമന്ത്രി സിദ്ധാരാമയ്യ ഷിരൂരിലേക്ക്

കര്‍ണാടക മുഖ്യമന്ത്രി സിദ്ധാരാമയ്യ നാളെ ഷിരൂര്‍ സന്ദര്‍ശിക്കും. കേന്ദ്രമന്ത്രി എച്ച് ഡി കുമാരസ്വാമി പ്രദേശം സന്ദര്‍ശിച്ചിരുന്നു.

സൈന്യത്തെ ഇറക്കണമെന്ന് അർജുൻ്റെ കുടുംബം ആവശ്യപ്പെട്ടു; കോഴിക്കോട് മേയർ

സൈന്യത്തെ ഇറക്കണമെന്ന് അർജുൻ്റെ കുടുംബം ആവശ്യപ്പെട്ടുവെന്ന് കോഴിക്കോട് മേയര്‍ ബീനാ ഫിലിപ്പ്. സൈന്യത്തെ ഇറക്കിയാൽ കുടുംബത്തിന് ആശ്വാസമാകുമെന്ന് മേയർ. തിരച്ചിൽ അവസാനിക്കാൻ പാടില്ലെന്നും മേയർ റിപ്പോർട്ടറിനോട് പറഞ്ഞു.

അർജുന് വേണ്ടിയുള്ള രക്ഷാപ്രവർത്തനം കേന്ദ്രസേനയുടെ സഹായം സംസ്ഥാന സർക്കാർ ആവശ്യപ്പെട്ടിട്ടുണ്ട്; മന്ത്രി പി രാജീവ്‌

അർജുന് വേണ്ടിയുള്ള രക്ഷാപ്രവർത്തനം കേന്ദ്രസേനയുടെ സഹായം സംസ്ഥാന സർക്കാർ ആവശ്യപ്പെട്ടിട്ടുണ്ടെന്ന് മന്ത്രി പി രാജീവ് റിപ്പോർട്ടറിനോട് പറഞ്ഞു.  കർണാടക സർക്കാർ വഴിയാണ് അത് ചെയ്യേണ്ടത്. കർണാടക സർക്കാരിനെ ഈ ഘട്ടത്തിൽ വിമർശിക്കുന്നത് ഉചിതമാകില്ല. അർജ്ജുനെ ജീവനോടെ കണ്ടെത്താൻ വേണ്ട ഇടപെടൽ വേണമെന്ന് സംസ്ഥാനം ആവശ്യപ്പെട്ടിട്ടുണ്ട്. കുറവുകളും പ്രശ്നങ്ങളും ശ്രദ്ധയിൽപ്പെട്ടാൽ സർക്കാർ നേരിട്ട് അറിയിക്കും. അതിനപ്പുറത്തേക്ക് പരസ്യമായി കുറ്റപ്പെടുത്തുന്നത് ഈ ഘട്ടത്തിൽ ശരിയല്ലെന്നും പി രാജീവ് വ്യക്തമാക്കി.

അർജുനെവിടെ? അധികൃതർക്കെതിരെ ആഞ്ഞടിച്ച് ബന്ധുക്കൾ

തെരച്ചിൽ കാര്യക്ഷമമല്ലെന്ന് അർജ്ജുൻ്റെ ബന്ധു ജിതിൻ. വാച്ചിൽ നോക്കിയാണ് രക്ഷാപ്രവർത്തനമെന്നും ജിതിൻ ആരോപിച്ചു. ലോറി ഉടമ മനാഫിനെ പൊലീസ് മർദ്ദിച്ചുവെന്നും ജിതിൻ ആരോപിച്ചു. രണ്ട് ദിവസം വേണമെന്ന് എച്ച്ഡി കുമാരസ്വാമി പറഞ്ഞു. അർജുനായി രണ്ട് ദിവസം കാക്കണോയെന്നും ജിതിൻ ചോദിച്ചു.

രക്ഷാപ്രവര്‍ത്തനത്തിന് സൈന്യം വേണം

രക്ഷാപ്രവര്‍ത്തനത്തിന് സൈന്യമിറങ്ങണമെന്ന് ആവർത്തിച്ച് കാണാതായ അര്‍ജുന്റെ ബന്ധുക്കള്‍. പരിശോധനയില്‍ അര്‍ജുനെ കുറിച്ച് യാതൊരു സൂചനയും ലഭിക്കാത്ത സാഹചര്യത്തിലാണ് ആവശ്യവുമായി കുടുംബം രംഗത്തെത്തിയിരിക്കുന്നത്. തെരച്ചിലിന് സൈന്യത്തിന്റെ സഹായം വേണമെന്ന് വെള്ളിയാഴ്ച മുതല്‍ അധികൃതരുടെ ശ്രദ്ധയില്‍പ്പെടുത്തിയിട്ടും നടപടിയുണ്ടായില്ലെന്നും ബന്ധുക്കള്‍ പറയുന്നു.

അര്‍ജുനെ കണ്ടെത്തുന്നതിനാണ് മുന്‍ഗണന: മുഹമ്മദ് റിയാസ്

മണ്ണിനടിയില്‍ അകപ്പെട്ട അര്‍ജുനെ കണ്ടെത്തുന്നതിനാണ് മുന്‍ഗണനയെന്ന് മന്ത്രി പി എ മുഹമ്മദ് റിയാസ്. അര്‍ജുന് വേണ്ടിയുള്ള തെരച്ചില്‍ ഊര്‍ജിതമായി നടക്കുന്നുണ്ട്. രക്ഷാപ്രവര്‍ത്തനത്തിന് മുഖ്യമന്ത്രി നേരിട്ട് ഇടപെടുന്നുണ്ട്. കര്‍ണാടക സര്‍ക്കാരിന്റെ സഹകരണം സംബന്ധിച്ച് പറയേണ്ട സമയമല്ല ഇതെന്നും റിയാസ് പ്രതികരിച്ചു.

കുമാരസ്വാമി അപകടസ്ഥലത്ത്

കേന്ദ്രമന്ത്രി കുമാരസ്വാമി അപകടസ്ഥലത്തെത്തി. അപകടം നടന്ന് അഞ്ചാം ദിവസമാണ് കുമാരസ്വാമി ഷിരൂരില്‍ എത്തിയത്.

രക്ഷാപ്രവര്‍ത്തനം ഏകോപിപ്പിക്കാന്‍ കേരളത്തില്‍ നിന്നുള്ള എംവിഡി എന്‍ഫോഴ്‌സ്‌മെന്റ് സ്‌ക്വാഡ്

രക്ഷാപ്രവര്‍ത്തനം ഏകോപിപ്പിക്കാന്‍ കേരളത്തില്‍ നിന്നുള്ള എംവിഡി എന്‍ഫോഴ്‌സ്‌മെന്റ് സ്‌ക്വാഡ്. രണ്ട് എംവിഐമാരും ഒരു എഎംവിഐയുമാണ് ഷിരൂരിലേക്ക് തിരിച്ചത്.

അര്‍ജുനെ കാണാതായി 100 മണിക്കൂര്‍

മണ്ണിടിച്ചിലിനെ തുടര്‍ന്ന് അര്‍ജുനെ കാണാതായിട്ട് 100 മണിക്കൂറുകള്‍ പിന്നിടുന്നു. ഇപ്പോഴും കാര്യക്ഷമമല്ലാത്ത രക്ഷാപ്രവര്‍ത്തനമാണ് നടക്കുന്നതെന്നാണ് ബന്ധുക്കള്‍ ഉള്‍പ്പടെ വിമര്‍ശനം ഉന്നയിക്കുന്നത്.

പരിശോധനയ്ക്ക് കേരളത്തില്‍ നിന്നുള്ള പ്രത്യേക സംഘം

മണ്ണ് മാറ്റിയുള്ള പരിശോധനയ്ക്ക് കേരളത്തില്‍ നിന്നുള്ള പ്രത്യേക സംഘം ഷിരൂരിലേക്ക്. തിരുവനന്തപുരത്ത് നിന്നുള്ള സംഘമാണ് എത്തുന്നത്. ഇത്തരം ദുരന്തങ്ങളില്‍ രക്ഷാപ്രവര്‍ത്തനം നടത്തി മുന്‍പരിചയമുള്ള സംഘമാണ് സ്ഥലത്തെത്തുന്നത്. മന്ത്രി ഗണേഷ് കുമാറിന്റെ ഇടപെടലിലാണ് പ്രത്യേക സംഘം എത്തുന്നതെന്ന് ലോറി ഉടമ മനാഫ് റിപ്പോര്‍ട്ടറിനോട് പറഞ്ഞു. രക്ഷാപ്രവര്‍ത്തനത്തെ കുറിച്ച് രൂക്ഷ വിമര്‍ശനം ഉയരുന്നതിനിടെയാണ് കേരളത്തില്‍ നിന്നുള്ള സംഘമെത്തുന്നത്.

ലോറി എവിടെയാണെന്ന് വ്യക്തമായിട്ടില്ലെന്ന് എന്‍ഐടി സംഘം

ലോറി എവിടെയാണെന്ന് വ്യക്തമായിട്ടില്ലെന്ന് എന്‍ഐടി സംഘം. പരിശോധന തുടരുകയാണ്. ജിപിഎസ് സിഗ്നല്‍ ലഭിച്ച സ്ഥലത്ത് പരിശോധിച്ചെങ്കിലും പോസിറ്റീവായ ഒന്നും കണ്ടെത്താനായില്ല. കൂടുതല്‍ പരിശോധന തുടരുകയാണ്. ഗ്രൗന്‍ഡ് പെനട്രേറ്റിങ് റഡാര്‍ ഉപയോഗിച്ചാണ് എന്‍ഐടി സംഘത്തിന്റെ പരിശോധന തുടരുന്നതെന്നും എന്‍ഐടി വിദഗ്ധന്‍ നീല്‍ വ്യക്തമാക്കി.

ഒരു വാഹനത്തിന്റെ ആകൃതിയില്‍ സിഗ്നല്‍ ലഭിക്കുന്നുണ്ടോ എന്നാണ് പരിശോധിക്കുന്നത്. എന്നാല്‍ ആ രൂപത്തില്‍ ഒന്നും കണ്ടെത്തിയിട്ടില്ല. കൂടുതല്‍ പരിശോധനയില്‍ വ്യക്തമായേക്കുമെന്നും അദ്ദേഹം പറഞ്ഞു. ലോറി ഉണ്ടാകാന്‍ സാധ്യതയുള്ള എല്ലായിടത്തും പരിശോധന നടത്തുകയാണ്.

പരിശോധന ആരംഭിച്ചു

റഡാറില്‍ ലോറിയുടെ ലൊക്കേഷന്‍ കണ്ടെത്തിയിടത്ത് പരിശോധന ആരംഭിച്ചു. എന്‍ഐടിയുടെ വിദഗ്ധ പരിശോധനയിലാണ് ലോറിയുടെ ലൊക്കേഷന്‍ കണ്ടെത്തിയത്.

പ്രതീക്ഷയുടെ മണിക്കൂറുകള്‍

മണ്‍കൂനകള്‍ക്കിടയിലാണ് ലോറിയുള്ളത്. ലോറി ലൊക്കേറ്റ് ചെയ്ത സ്ഥലത്തെ മണ്ണ് നീക്കും. കാലാവസ്ഥ അനുകൂലമായതിനാല്‍ ഉടന്‍ തന്നെ അര്‍ജുനെ കണ്ടെത്താനാകുമെന്നാണ് പ്രതീക്ഷ.

ലോറി റഡാറില്‍, ലൊക്കേഷന്‍ കണ്ടെത്തി

റഡാർ ഉപയോഗിച്ചുള്ള പരിശോധനയില്‍ ലോറിയുടെ ലൊക്കേഷന്‍ കണ്ടെത്തി. റഡാറില്‍ ലോറിയുടെ സ്ഥാനം വ്യക്തമാകുകയായിരുന്നു.

'ഭൂപ്രകൃതി ഇങ്ങനെയായതിനാൽ മണ്ണ് നീക്കുമ്പോൾ വീണ്ടും മണ്ണ് വീഴുന്നു' 

റഡാര്‍ ഉപയോഗിച്ച് തെരച്ചില്‍

റഡാര്‍ ഉപയോഗിച്ചുള്ള തെരച്ചിലിന് നേതൃത്വം നല്‍കാന്‍ എന്‍ഐടിയില്‍ നിന്നുള്ള വിദഗ്ധ സംഘമെത്തും

കണ്ടെത്താനുള്ളത് അർജുനടക്കം മൂന്ന് പേരെ

രക്ഷാപ്രവര്‍ത്തനത്തില്‍ അലംഭാവമെന്ന് ലോറി ഉടമ

രക്ഷാപ്രവര്‍ത്തനത്തില്‍ അംഭാവമെന്ന് ലോറി ഉടമ മനാഫ്. എസ്പിയും കളക്ടറും മാത്രമാണ് സംഭവ സ്ഥലത്തുള്ളത്. മറ്റ് ഉദ്യോഗസ്ഥര്‍ ഒന്നും സ്ഥലത്തില്ല. അനുഭവ സമ്പത്തുള്ള ഉദ്യോഗസ്ഥരില്ല. രക്ഷാപ്രവര്‍ത്തനത്തിന് കഴിഞ്ഞ ദിവസത്തെ വേഗത പോലും ഇന്നില്ല. അനുകൂല കാലാവസ്ഥയായിട്ട് പോലും രക്ഷാപ്രവര്‍ത്തനം കാര്യക്ഷമമല്ലെന്നും മനാഫ് പ്രതികരിച്ചു.

എച്ച് ഡി കുമാരസ്വാമി അപകടസ്ഥലത്തേക്ക്

കേന്ദ്രമന്ത്രി എച്ച് ഡി കുമാരസ്വാമി അപകടം നടന്ന ഷിരൂരിലേക്ക് തിരിച്ചു.

കര്‍ണാടക സര്‍ക്കാരുമായി ബന്ധപ്പെടുന്നുണ്ടെന്ന് ചീഫ് സെക്രട്ടറി

കര്‍ണാടക സര്‍ക്കാരുമായി ബന്ധപ്പെടുന്നുണ്ടെന്ന് ചീഫ് സെക്രട്ടറി. സാധ്യമായ എല്ലാ പ്രവര്‍ത്തനങ്ങളും ചെയ്യുന്നുണ്ട്. റഡാര്‍ ഉപയോഗിച്ചുള്ള പരിശോധന നടക്കും. അര്‍ജുന്‍ തിരിച്ചുവരുമെന്നാണ് പ്രീക്ഷയെന്നും കാലാവസ്ഥ അനുകൂലമായാല്‍ രക്ഷാപ്രവര്‍ത്തനം വിജയകരമാകുമെന്നും ചീഫ് സെക്രട്ടറി വി വേണു പറഞ്ഞു.

അർജുന്റെ കുടുംബത്തിന്റെ ആശ്വാസമാണ് പ്രധാനം: എ കെ ശശീന്ദ്രൻ

അർജുന്റെ കുടുംബത്തിന്റെ ആശ്വാസമാണ് പ്രധാനമെന്ന് മന്ത്രി എ കെ ശശീന്ദ്രൻ. അർ‌ജുന്റെ വീട്ടിൽ സന്ദർശനം നടത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. കർണാടകയിലെ ഉദ്യോഗസ്ഥരുമായി നിരന്തരം ബന്ധപ്പെടുന്നുണ്ട്. ചീഫ് സെക്രട്ടറിയുമായി ഫോണിൽ സംസാരിച്ചു. ഓരോ മണിക്കൂറിലും പൊലീസിനു വിവരം ലഭിക്കുന്നുണ്ട്. സർക്കാരും മറ്റ് രാഷ്ട്രീയ പാർട്ടികളിലെ നേതാക്കളും ഫലപ്രദമായി ഇടപെടുന്നുണ്ടെന്നും ശശീന്ദ്രൻ പറഞ്ഞു.

രക്ഷാദൗത്യത്തിലെ ഏകോപനത്തിൽ പാളിച്ച

രക്ഷാദൗത്യത്തിലെ ഏകോപനത്തിൽ പാളിച്ച. ആറുമണിക്ക് തുടങ്ങാം എന്ന് പറഞ്ഞിരുന്ന ദൗത്യം ആരംഭിച്ചത് ഏഴുമണിക്ക് ശേഷമാണ്. കേരളത്തിൽ നിന്നുള്ള ഉദ്യോഗസ്ഥരെ തടഞ്ഞു. മോട്ടോർ വാഹന വകുപ്പ് ജീവനക്കാരും പൊലീസുമാണ് കേരളത്തിൽ നിന്നും എത്തിയത്. രക്ഷാദൗത്യം കൃത്യമായി നടക്കുന്നില്ലെന്ന് ബന്ധുക്കളും ആരോപിച്ചിരുന്നു. റഡാർ ഇതുവരെ എത്തിച്ചിട്ടില്ല. മഴ മാറി നിൽക്കുമ്പോഴും പ്രവർത്തനം ഊർജിതമല്ലെന്നും വിമർശനമുണ്ട്.

കര്‍ണാടക മന്ത്രിയുമായി സംസാരിക്കുമെന്ന് കെ സി വേണുഗോപാല്‍

രക്ഷാപ്രവര്‍ത്തനം സംബന്ധിച്ച് രാവിലെ വീണ്ടും കര്‍ണാടക മന്ത്രിയുമായി സംസാരിക്കുമെന്ന് കെ സി വേണുഗോപാല്‍ എംപി. അര്‍ജുന്റെ രക്ഷാപ്രവര്‍ത്തനത്തിന് ആവശ്യമായ എല്ലാ ഉപകരണങ്ങളും എത്തിക്കും. ഇന്ന് കണ്ടെത്താനാകുമെന്നാണ് പ്രതീക്ഷയെന്നും അദ്ദേഹം പറഞ്ഞു.

കേരളത്തില്‍ നിന്നുള്ള മോട്ടോര്‍ വാഹനവകുപ്പ് ഉദ്യോഗസ്ഥരെ കടത്തിവിട്ടില്ല

അങ്കോളയിലെത്തിയ കേരളത്തില്‍ നിന്നുള്ള മോട്ടോര്‍ വാഹനവകുപ്പ് ഉദ്യോഗസ്ഥരെ രക്ഷാപ്രവര്‍ത്തനം നടക്കുന്നയിടത്തേക്ക് കടത്തിവിട്ടില്ല. കളക്ടര്‍ എത്തിയശേഷം മാത്രമേ അനുവദിക്കൂ എന്നാണ് വിശദീകരണം.

അഞ്ച് ദിവസമായി, എന്തുകൊണ്ട് രക്ഷാപ്രവര്‍ത്തനത്തിന് ഇത്രയും താമസം വന്നു?: അര്‍ജുന്റെ സഹോദരി

മണ്ണിടിച്ചിലുണ്ടായി അഞ്ച് ദിവസമായിട്ട് ഇന്നലെ ഉച്ചയ്ക്ക് ശേഷം മാത്രമാണ് കാര്യക്ഷമമായ രക്ഷാപ്രവര്‍ത്തനമുണ്ടായതെന്ന് അര്‍ജുന്റെ സഹോദരി അഞ്ജു. എന്തുകൊണ്ടാണ് രക്ഷാപ്രവര്‍ത്തനത്തിന് ഇത്രയും താമസം വന്നതെന്നും അവര്‍ ചോദിച്ചു. അര്‍ജുന്‍ മനസിന് ഒരുപാട് ധൈര്യമുള്ളയാളാണ്, അതിജീവിക്കുക തന്നെ ചെയ്യുമെന്നും അഞ്ജു പറഞ്ഞു.

ലോറിക്ക് അടുത്തെത്തുക കഠിനം; അർജുനെ കാത്ത് പ്രാർത്ഥനയോടെ കുടുംബം

രക്ഷാപ്രവര്‍ത്തനത്തില്‍ തുടക്കത്തിലേ വീഴിച്ച

രക്ഷാപ്രവര്‍ത്തനത്തില്‍ തുടക്കത്തിലേ വീഴിചയുണ്ടായെന്ന് അർജുന്റെ കുടുംബം. തെരച്ചിലിനായി സൈന്യം എത്തണമെന്നും കുടുംബം ആവശ്യപ്പെട്ടു.

ദൗത്യസംഘം എത്തി

രക്ഷാപ്രവർത്തനത്തിന് എൻഡിആർഎഫിന്റെ രണ്ട് ടീം എത്തി. പ്രതികൂല കാലാവസ്ഥ വെല്ലുവിളിയാണ്. കൂടുതൽ യന്ത്ര സംവിധാനം എത്തിച്ചുള്ള പരിശോധനാണ് ആലോചിക്കുന്നത്. തെരച്ചിലിന് റഡാർ സംവിധാനവും എത്തിക്കും. നേവിയും ഫയർഫോഴ്സും തിരച്ചിലിൽ സഹായിക്കും.