കൊല്ലം: സംസ്ഥാനത്ത് ഭവന രഹിതരുടെ വീടെന്ന സ്വപ്നം യാഥാർഥ്യമാക്കിയത് ലൈഫ് ഭവന പദ്ധതിയെന്ന് ധനമന്ത്രി കെ എൻ ബാലഗോപാൽ. വിദേശ രാജ്യങ്ങളിൽ പോലും ഭരണകൂടം വീട് നിർമ്മിച്ചു നൽകുന്ന പദ്ധതികൾ വിരളമാണ്. പ്രാദേശിക ഭരണകൂടത്തിന്റെയും സംസ്ഥാന സർക്കാരിന്റെയും കൂട്ടായ പ്രവർത്തനമാണ് ലൈഫ് പദ്ധതി വൻ വിജയമാകാൻ കാരണമായതെന്നും മന്ത്രി പറഞ്ഞു. കുളക്കട ഗ്രാമപഞ്ചായത്തിൽ ലൈഫ് ഭവന പദ്ധതിയിൽ ഉൾപ്പെടുത്തി നിർമ്മിച്ച വീടുകളുടെ താക്കോൽ ദാനം നിർവഹിച്ചുകൊണ്ട് സംസാരിക്കുകയായിരുന്നു മന്ത്രി.
24 കുടുംബങ്ങൾക്കാണ് കുളക്കട ഗ്രാമപഞ്ചായത്തിന്റെ ഉടമസ്ഥതയിലുള്ള ഭൂമിയിൽ വീടുകൾ നിർമിച്ചു നൽകിയത്. പഞ്ചായത്തിലെ മുൻ ഭരണസമിതിയുടെ കാലത്ത് സ്ഥലം ഏറ്റെടുക്കൽ നടപടികൾ പൂർത്തീകരിച്ചിരുന്നു. കുളക്കട ഗ്രാമപഞ്ചായത്ത് പ്രസിഡന്റ് പി ടി ഇന്ദുകുമാർ അധ്യക്ഷനായ ചടങ്ങിൽ കൊടിക്കുന്നിൽ സുരേഷ് എം പി മുഖ്യപ്രഭാഷണം നടത്തി.
കുളക്കട ഗ്രാമപഞ്ചായത്ത് വൈസ് പ്രസിഡന്റ് കവിത ഗോപകുമാർ, വെട്ടിക്കവല ബ്ലോക്ക് പഞ്ചായത്ത് പ്രസിഡന്റ് കെ ഹർഷകുമാർ, ജില്ലാ പഞ്ചായത്തംഗം ആർ രശ്മി, സ്ഥിരംസമിതി അധ്യക്ഷർ, ജനപ്രതിനിധികൾ, രാഷ്ട്രീയകക്ഷി നേതാക്കൾ തുടങ്ങിയവർ താക്കോൽ ദാന ചടങ്ങിൽ പങ്കെടുത്തു.
