![മധ്യപ്രദേശില് ചൗഹാനോ കമല്നാഥോ? അഞ്ചാം വിജയം തേടി ബിജെപി, പ്രതികാരം വീട്ടാൻ കോൺഗ്രസ്](http://media.assettype.com/reporterlive%2F2023-12%2Fda305367-b35d-42b2-b69d-4ada10407a55%2FMP.jpg?w=480&auto=format%2Ccompress&fit=max)
ന്യൂഡൽഹി: മധ്യപ്രദേശിന്റെ ജനവിധി എന്തെന്ന് അറിയാൻ ഇനി മണിക്കൂറുകള് മാത്രം ബാക്കി. ഒമ്പത് എക്സിറ്റ് പോളുകളിൽ നാലെണ്ണം ബിജെപി വലിയ മാർജിനില് വിജയിക്കുമെന്നാണ് പ്രവചിക്കുന്നത്. ആ നാല് എക്സിറ്റ് പോളുകളിൽ മൂന്നെണ്ണത്തിൽ 230 സീറ്റുകളിൽ 139-ലധികം നേടുമെന്നും പ്രവചിക്കുന്നു.
എതിരാളികൾക്ക് മേൽ വലിയ വിജയം തന്നെ കരസ്ഥമാക്കാമെന്നാണ് കോൺഗ്രസിന്റെ പ്രതീക്ഷയെങ്കിലും അതിനോട് എക്സിറ്റ് പോളുകൾ വിയോജിക്കുകയാണ്. സർക്കാർ രൂപീകരണത്തിന് ആവശ്യമായ 116+ സീറ്റുകള് ലഭിക്കുമെന്ന് പ്രവചിക്കുന്നുണ്ടെങ്കിലും ഓരോ പോളിലും ബിജെപിയും കോൺഗ്രസിന് അടുത്ത് തന്നെയുണ്ട്. കഴിഞ്ഞ നാല് തെരഞ്ഞെടുപ്പുകളിൽ മൂന്നിലും ബിജെപിക്ക് അനുകൂലമായിട്ടാണ് മധ്യപ്രദേശ് ജനവിധിയെഴുതിയത്.
കോൺഗ്രസിനും മുൻ മുഖ്യമന്ത്രി കമൽനാഥിനും 2020-ന്റെ പ്രതികാരത്തിനുള്ള അവസരമാണിത്. 2020-ൽ ജ്യോതിരാദിത്യ സിന്ധ്യ ബിജെപിക്കൊപ്പം ചേർന്നതിനെ തുടർന്ന് സർക്കാർ വീഴുന്നത് പാർട്ടിക്ക് കാണേണ്ടി വന്നു. 5 വർഷമായി ബിജെപി കൈവശം വച്ചിരുന്ന സംസ്ഥാനം കമൽനാഥും സംഘവും തിരിച്ച് പിടിച്ച് രണ്ടുവർഷത്തിന് ശേഷമായിരുന്നു ഇതെന്നതും ശ്രദ്ധേയമാണ്.
'ഇതിന് ഉത്തരവാദികൾ ഒന്ന് ഓർക്കുക, ഇന്ന് എന്ന ദിവസത്തിന് ശേഷം നാളെ ഉണ്ടാകും. അതിന് ശേഷം മറ്റെന്നാളുമുണ്ടാകും,' എന്ന് കമൽനാഥ് അന്ന് പറഞ്ഞിരുന്നു. ആ ദിവസമായിരിക്കുമോ ഈ വോട്ടെണ്ണല് ദിനമെന്ന് പ്രതീക്ഷയോടെ ഉറ്റുനോക്കുകയാണ് കോൺഗ്രസ്.
എന്നാൽ ശിവരാജ് സിംഗ് ചൗഹാൻ ഇഞ്ചോടിഞ്ച് മത്സരമുണ്ടാകാനുളള സാധ്യതയെ തള്ളിക്കകളയുകയാണ്. സംസ്ഥാനത്ത് ബിജെപിയുടെ പ്രവർത്തന മികവിനെ അംഗീകരിക്കുമെന്നാണ് ശിവരാജ് സിംഗ് ചൗഹാന്റെ പക്ഷം. ബിജെപി മോദി ഫാക്ടറിലും ഏറെ പ്രതീക്ഷ വെക്കുന്നു.