ന്യൂഡല്‍ഹി: വരുന്ന സ്ഥാപകദിനത്തില്‍ നാഗ്പൂരില്‍ പത്ത് ലക്ഷം പ്രവര്‍ത്തകര്‍ പങ്കെടുക്കുന്ന കൂറ്റന്‍ റാലി സംഘടിപ്പിക്കാന്‍ തീരുമാനിച്ച് കോണ്ഗ്രസ്. ഡിസംബര്‍ 28ന് നടക്കുന്ന റാലിയില്‍ പാര്‍ട്ടി ദേശീയ അദ്ധ്യക്ഷന്‍ മല്ലികാര്‍ജുന്‍ ഖാര്‍ഗെ, സോണിയാ ഗാന്ധി, രാഹുല്‍ ഗാന്ധി, പ്രിയങ്ക ഗാന്ധി എന്നിവര്‍ പങ്കെടുക്കും.
റാലി സംഘാടനവുമായി ബന്ധപ്പെട്ട് ഇന്ന് മഹാരാഷ്ട്രയില്‍ യോഗം നടന്നു. എഐസിസി സംഘടന ജനറല്‍ സെക്രട്ടറി കെ സി വേണുഗോപാല്‍, മുതിര്‍ന്ന നേതാവ് മുകുള്‍ വാസ്‌നിക് എന്നിവരുടെ സാന്നിദ്ധ്യത്തിലാണ് യോഗം നടക്കുന്നത്.
യോഗത്തില്‍ മഹാരാഷ്ട്ര കോണ്ഗ്രസ് അദ്ധ്യക്ഷന്‍ നാനാ പട്ടോള്‍, മുന്‍ മന്ത്രി ബാലാസാഹേബ് തോറാട്ട്, പ്രതിപക്ഷ നേതാവ് വിജയ് വഡേട്ടിവാര്‍, മുന്‍ മുഖ്യമന്ത്രിമാരായ അശോക് ചവാന്‍, പൃഥ്വിരാജ് ചവാന്‍ എന്നിവരടക്കമുള്ള മുതിര്‍ന്ന സംസ്ഥാന നേതാക്കളും യോഗത്തില്‍ പങ്കെടുത്തു.
